40
Biakinn Sakleh Tuk Muhnak
Jerusalem Ah Ezekiel Pui Haw
1 Sal ka tannak uh kum sawm nih le kum nga kum, Jerusalem a laknak haw kum sawm le kum linak, kum thak ni sawm ni-in, Topa i khut cu huham nasezet tuah ka humah hengin mundangah keimah pui hi.
2 Muhnak ka neihmi ah, Pathian in Israel ngamah hawhpihin, mualsang pa khat humah koih hi. Ka mai ah khuapi a bangmi inn honpi umin mu ing.Ref 40:2 Mang 21:10;
3 Nek deuhtikin daal bangin a de mi, pa khat mu ing. A tehnak tuk nimkhau le ngolhkang cawi thahin kongkhahah dingin mu ing.Ref 40:3 Mang 11:1; 21:15;
4 Ka lakah, “Mihing pa, Ezekiel aw, atu a ka muhtik tukmi hi komzetno zo inna, ngai in hi. Hilai munah ka hawhpihnak thu cu na hi. Na muhmi hempoh hi Israel tei lakah hilhin,” ti hi.
Nisuahnak Lam Kongkhah
5 Ka muhmi cu Biakinn hi in, a kimkot cu kulhtian tuah upmi hi. Daal bangin a almi pa in, a tehnak ngolh tong luk sau cu la in, Biakinn kulhtian cu teh hi. Tong luk sangin tong luk sah hi.
6 nisuahnak lam a ummi kongkhah lamah hawh hi. Kailawn tianmi humah kai in, humtabel a hen ten kongka cu tehin tong luk sah hi.
7 Mah i langlamah hawhnak lampi umin, taklam le veilamah inn cinnak khan thum ten um hi. Mah khante cu a tung le a zal can tenin, tong luk sau in, zal hi. Khantian pa khat le pa khat laklawh a, kulhtian cu tong nga sah hi. Mah khan dottu ah lampi pa khat tong luk sau umin, Biakinn lam hektu khan ngengpi ah heng hi.
8-9 Mah khan ngengpi cu a teh ten tong liat zal hi. Hi khan cu Biakinn nekbel kongka suakin Biakinn nekbel kulhtian cu tong nih sah hi.
10 (Hi inncingtu tei khan cu teve khawngin, a lak lawh haw a, kulhtiante vang a sah dan bangve ten hi.)
11 Mah nungten lampi a, kongka cu tehin tong sawm le tong thum zal hi. Kongkhah pa khat le pa khat laklawh vang tehin tong sawm zal hi.
12 Inncingtu tei khan i mailam zawn tekah kulhtian niamno ten umin, tong khat ten sah hi. (A khante cu tong luk zal le sau khawng haw hi.)
13 a khan nunglam kulhtian tawpnak pen lampi langkhat lam a, um khan i nunglam kulhtian tawpnak tian tehin, tong sawm nih le tong nga bang kim hi.
14 A tawpnak a ummi khan pen kulhtian cu inntual lamah pehzom vawk hi. Mah khan cu tong sawm nih zal hi.
15 Lampi cu kongkhah pualam kulhtian pen a nungdawlbel khan i kulhtian pualeu lam tian tong sawm nga sau hi.
16 Mah khan tei a pualam pangah tukvelh neuno um tekin khan pa khat le pa khat laklawh pang hei ah tukvelh neuno um tek hi. Lam mawk a kulhtian humah tuumkung phel kehmi zukte um hi.
A Pualam Inntual
17 Mahpa in, lampi pen inntual tian pui hi. Inntual i pualeu lamah khan sawm thum um a, mah khan tei mai ah suang phahmi inntual umin,
18 a laizang inntual cu khuh khawng hi. Mah suang phahmi inntual cu a laizang inntual sangin niam saw hi.
19 A laizang hawhnak lampi cu a sang saw deuh bawlin, mah lampi pa nih laklawh cu a teh ten tong za khat hi.
Saklam Kongkhah
20 Saklam pen a pualeu lam inntual hawhnak lampi cu tehleh hi.
21 Mah lampi i vei le takah ngalvilnak khan pa thum ten a ummi le a laklawh haw a kulhtiante le khan ngengpi pa khat a ummi cu nisuahnak kongkhah lam a um khante tuah tiadun khawng haw hi. Lampi cu tong sawm nga sau in, tong sawm nih le tong nga zal hi.
22 Khan ngengpi, tukvelhte le zuk a suai haw mi tuumkungte cu nisuahnak lam kongkhah a ummite bang bok hi. Kongkhah tian kainak kalbak salih umin, khan ngengpi cu inntual dottubelah umin, inntual lam hek hi.
23 A pualam inntual kaltan vawkin, a laizang inntual lamah, saklam kongkhah pen nisuahnak lam bangin lampi pa khat um hi. Mah lampi pa nih laklawh cu tehin, tong za khat bang sau hi.
24 Mahnung ten hanglamah hawhpihin, lampi pa khat mu ung hi. A teh ten lampi dangte bang leleng hi.
25 Hi lampi el a, khante cu khan dangte bang lengin tukvelh neitik haw hi. Hi lampi cu tong sawm nga sau in, tong sawm nih le pa nga zal hi.
26 Mah lampi hen laih ngawlin kalbak salih um, a tawpnakah khan ngengpi um bokin inntual lam hek bok hi. Lampi mawk kulhtian sunglamah mundang bang lengin tuumkung zuksuai um hi.
27 A laizang inntual hawhnak um leleng bokin mahpa in, a teh ten lampi pa nih laklawh cu tong za khat bang kim hi.
A Laizang inntual: Hanglam Kongkhah
28 Mahpa in, hanglam lampi pen a laizang inntual tian hawhpih hi. Mah lampi cu pualam a um lampi tuah tiave leng hi.
29-30 Inn cinnak khante, khan ngengpi le a sunglam pangte cu lampi dang el a um khan tia leng hi. Hi khante ah tukvelhte um bok hi. Tong sawm nga sau in, tong sawm nih le tong nga zal hi.
31 Khan sung tumnak ngengpi cu inntual dangah hekin lampi mawk kulhtian humah tumkung zukte suai haw hi. Hi kongkhah kainakah kalbak liat um hi.
A Laizang Inntual: Nisuahnak Kongka
32 Mahpa in, nisuahnak lampi lam pen a laizang inntual tian hawhpih hi. Lampi cu a dangte tuah tiave leng hi.
33 Inn cinnak khante, khan ngengpi le a sunglam pangte cu lampi dang el a ummi tia leng hi. Kulhtian tihkimah tukvelh umin khan ngengpi ah vang um bok hi. Tong sawm nga sau in, tong sawm nih le tong nga zal hi.
34 Khan ngengpi cu a pualam inntual lam hek hi. Lampi mawk tuan humah tuumkung zukte suai haw hi. Hi kongkhah kai tohnak tukin kalbak liat um hi.
A Laizang Inntual: Saklam Kongkhah
35 Mahpa in, saklam lampi ah hawhpih hi. Lampi cu a dangte tuah tiave leng hi.
36 Mundang a um bang lelengin, inn cinnak khante, khan ngengpi le kulhtian tihkimah tukvelh um bok hi. Tong sawm nga sau le tong sawm nih le tong nga zal hi.
37 Khan ngengpi cu a inntual pualam hek hi. Lampi mawk hum tuanah tuumkung zuksuai haw hi. Hi kongkhah kai tohnak tukin kalbak liat um hi.
Saklam Kongkhah El Innte
38 A pualam inntualah saklam hawhnak cu lampi sunglam tuah pehzomdunin, inn neuno pa khat um hi. Mah inn neuno cu inntual lam a hektu khan ngengpi lamah hongin, mahlai ah halkang biakpiaknak tuk cikte som haw hi.
39 Hi khan ngengpi sungah cabuai pa li umin, mawk khatah pa nih veve um hi. Hi cabuai tei humah halkang biakpiaknak tukin hihen, sualhah biakpiaknak tukin hihen, kuan lehnak biakpiaknak tuk hihen, piakmi ngante ngawhnak mun hi.
40 A khan pualeu lamah a khansung a cabuai bangkek, cabuai pa li um bokin saklam kongkhah sung tumnak mawknihah pa nih veve koih haw hi.
41 A venghawngin cabuai liat, biakpiaknak tuk ngan ngawhnakah um haw hi; a khansungah cabuai pa li, inntualah cabuai pa li um hi.
42 Inn neuno sung a, cabuaite cu suang tuah seekmi hi. Mah cabuaite cu tong khat a zallam le a sau lam tong khat veve hi a, tiavedun haw hi. Biakpiaknak tukin piakmi ngante vahnak le ngawhnak hiamnam hempoh cu hi suang cabuai humah koih leleng haw hi.
43 Mah cabuai mawkah a mawk hehnak khutpek tia cu a kim suakin um hi. Biakpiaknak a piakmi cik hempoh cu mah cabuai humah koih haw hi.
44 Mahpa in, a laizang inntualah pui in, mah inntual lam hek thahin, sakmi inndat pa nih um hi. Pa khat cu hanglam kongkhah elah umin, saklam hek hi.
45 Hanglam a hektu khan cu Biakinn nadektu thiampi tei umnak khan hi.
46 Saklam a hektu khan cu biaklandawh a nadektu thiampi tei umnak khan hi tin hilh hi. Thiampite cu a venghawng haw in, Zadok i cikhaihte haw hi. Levi hinnam sung pen amuhte bek hi Topa i umnak munah Topa i nadek tukin a tum thei haw hi.
A Laizang Inntual le Biakinn
47 Mahpa in, a laizang inntual cu tehin, tong za khat zalin, tong za khat sau hi. Biakinn cu nitumnak lamah umin, a mai ah biaklandawh pa khat um hi.
48 Biakinn sung tumnak khansungah pui hi. Tumnak kongka cu tehin, tong nga sahin, tong sawm le tong li zal hi; a mawk a kulhtiante cu tong thum sah hi.
49 Mah khan tumnakah kalbak umin, tong sawm nih sau in, tong sawm le tong nih zal hi. Tumnak taklam le veilamah khuam ngengzet pa khat veve um hi.