39
Gog Caksuknak
1 Cungnungbel Topa in, “Mihing pa, Ezekiel aw, Meshek le Tubal miphun tei uktu bawibel Gog lakah hilh inna, a ngal ka hihnak cu phuangin hi.
2 Mun dangah hawhtik tung, Israel ngam mualhum a hen laklawh saklamah puito ngut tung.
3 a veilam khut a, thalkung le a taklam khut a thalcangte cu caksuktik khawng tung.
4 Gog le a ngalkapte a mailam a, tangtute cu Israel mualhumah thi khawng haw tuk a, luang haw cu vano le ngamsa tei an in suaktik tung.
5 Lenkolh lakah lumin, thi haw tuk hi. Cungnungbel Topa keimah in hilh zo ing.
6 Kuamah i dondak khak ngawlmi, tuipi mawk tuan a ummite le Magog ngamah mei in kangtik tung a, Topa ka hihlam cu mi hempoh ten thei haw tuk hi.
7 Ka min thiangtho cu Israel mite theitik tung a, kuamah in ka min thangnautik haw tukma toh hi. Miphun hempoh ten keimah hi Topa, Israel Pathian Thiangtho ka hihlam thei haw tuk,” ti hi.
8 Cungnungbel Topa in, “Ka hilhsa mi, a ni cu heng tuk hi, heng tatak tuk hi.
9 Israel ngam khuapi sung a umte cu tulin, ngal tei zammi hiamnamte cu tuahthing tukin cawm haw tuk hi. Lumphawte, thalkung le thalcangte, ceipi le tembekte cu mei ah thingdang tuah ngawlin kum salih phat tuk hi.
10 Hampa lakah tuahthing zei haw tukma, tupi sung a thing vang phuk haw tukma, itahim titale ngal tei zammi hiamnamte cu tuahthingin mang haw tuk hi. Amuh ngutu le suamtute cu ngu in, suam haw tuk tin,” ti hi. Cungnungbel Topa in hilh zo hi.
Gog Vui Haw
11 Topa in, “Mah hun a kim ten Gog cu Israel ngam Tuipi Thi i nisuahnak lam Khualzin tei Munlawnah vuinak tuk mun pia tung. Gog le ngalkapte cu mahlai ah vui hi haw tuk a, mah munlawn cu ‘Gog ngalkap tei munlawn,’ tih hi tuk hi.
12 Israel miten a ngamsung cu thiangtik tukin miluangte cu ha salih sung vui haw tuk hi.
13 Ngamsung mi hempoh ten miluang vui cu bawm haw tuk a, ka sunloihnak a lang ni ten upatnak cotu hi haw tuk hi. Cungnungbel Topa keimah in hilh zo ing.
14 Ha salih nungten ngamsung thianthoh theihnak tukin vui laihngawl mithi luang hempoh zei kawkawi tukin mi khenkhat teng tuk hi.
15 Mahti bangin a vah haw ten nguh amu haw tale sialsiahnak bawlin, khan cotu ten Gog Ngalkap Tei Munlawnah vui haw tuk hi.
16 (Mah elah khua pa khat um tuk a, ngalkap honpite phawhngilh ngawlnak tukin minsa haw tuk hi.) ngamsung cu thianthohtik hileh tuk hi tin,” ti hi.
17 Cungnungbel Topa in ka lakah, “Mihing pa, Ezekiel aw, amu ca in ka bawlmi biakpiaknak cik ei tukin khua tihkim pen vano le ngamsate samin hi. Israel mual humah an eih puaipi um tuk a, mahlai ah cik ei in, thisan dut haw tuk hi.Ref 39:17-20 Mang 19:17-18;
18 Tuucingte, tuunote, keelcangte le khuicang thaute ngawhmi bangin, thahmi ngalkap tei cik ei in, leihum uktu bawi tei thisan dut haw tuk hi.
19 Hite hi biakpiaknak bangin ka thah ten vano le ngamsa ten a ei theih zah haw in, a thau ei haw tuk a, nguivo in thisan dut haw tuk hi.
20 Cipuh le cipuh ngalkapte hihen, ngalkap le ngaldotute hei hihen, a mat theihzah haw manin, ka cabuai humah ei haw tuk hi. Cungnungbel Topa keimah in hilh zo ing,” ti hi.
Israel Tundin Lehnak
21 Topa in, “Miphun tei lakah ka sunloihnak langtikin, a dikcangmi ka thukhennak cu ka huham tuah iti bangin bawlsuak ing tih cu lak tung hi.
22 Mahnung ten Israel miten keimah cu Topa Pathian hi tih thei haw tuk hi.
23 Ka humah sualnak a bawl haw hangin Israel cu saltannak mun heng haw tih miphun ten thei haw tuk hi. Nunghekin ngal ing a, ngal ten neh haw in, ngaldonak munah ngal tei khutin thitik ing.
24 A thianthoh haw ngawlnak le a phat haw ngawlnak hangin a thuak haw tuk zah cu a hum hawah hengtikin nunghek ing,” ti hi.
25 Cungnungbel Topa in, “Mahnaven atu-in Jakob casuan Israel tei humah hehpihnak nei tung a, mi khangto le mi neinung hi lehtik tung hi. Ka min thiangtho cingkhawi tung hi.
26 A ngamsung hawah thinsuknak imah um ngawlin le kuamah in dondak ngawlin a um haw ten keimah a nauneh haw hangin zakca le mualpho in, a um haw cu phawkngilleh thei haw tuk hi.
27 Mi thiangtho ka hihlam miphun tampi tei lakah langtiknakin, na ngal tei umnak ngamah khen khek a hihnak haw pen kihpihleh tung hi.
28 Ka mihing ten a Topa le a Pathian haw ka hihnak cu thei haw tuk hi. Mahti bangin thei haw tuk hi, itahim titale saltannak munah a muhte a kuattu le atu-in, pa khat hei tang ngawlvo in, a ngamsung hawah kai khawmtu le puikiktu cu keimah ing.
29 Israel mi humah ka hawvang buak tung a, ituk mahten ka mai selleh tukma toh ing. Cungnungbel Topa keimah in hilh zo ing tin,” ti hi.