34
Israel Tuucingte
1 Topa in,
2 “Mihing pa, Ezekiel aw, Israel uktu tei phat ngawl daan hi hilhin hi. Profet awn tuah hilh inna, Cungnungbel Topa keimah in, a lak haw a, ka otmi bangin hilhin hi. Noh Israel tuucingte, cimnak thuak tuk uh ci! Nangmuh le nangmuh cu cingkhawi dunzet nave uhcin na tuu uhte cu cingkhawi awng ma uh ci.
3 Tuu nawitui in uh ci a, tuumul puante silhin le tuu phabelte ngo in ei uh ci. Mahnaven tuute cingkhawi awng ma uh ci.
4 Tuu nawmtamte phano zo ngawlin a na mite le a liamte a meima haw tuamsak ngawlin, a vakvaite vang zei in, pui kikleh nuam hihim ma uh ci. Bawlsia niknek lamsang uh ci.
5 Mah tuute cu khaltu a neih haw ngawl hangin ngam tihkimah khen khek khawng haw a, sahang ten manin ei haw hi.Ref 34:5 Mipum 27:17; 1Kum 22:17; 2Khang 18:16; Mt 9:36; Mk 6:34;
6 Mah hangin ka tuute cu mual le luamah vakvai khawng haw hi. Leihum khua tihkimah khen khek khawng hi haw in, kuamah in zei ngawlin le puileh tuk a tumtu hei um haw ma.
7 “Tuucingte, Topa keimah in, na lak uh a ka hilhmi hi ngai hem un.
8 Keimah cu a nungmi Pathian ing tih cu ciangno in hilh ing. Ka hilhmi hi na ngai uh ahin pha saw hi. Tuucing a um haw ngawl hangin ka tuu cu sahang ten zuanin manin ei haw hi. Ka tuucing ten tuu cu zei tum haw ma hi. Tuu hi ngawlin amuh le muh cingkhawidun saw haw hi.
9 Mah hangin tuucingte ka hilhmi hi ngai hem un hi.
10 Cungnungbel Topa keimah in phuang ing: Keimah hi na ngal uh ing. Ka tuu cu nangmu lak pen la tung amuh khaltu hileh tukma toh uh ci, nangmuh le nangmuh vang cingkhawiduntik tukma toh ing. Na lak pen ka tuu cu la tung a eileh tukma toh uh ci,” ti hi.
Tuucing Pha
11 Cungnungbel Topa Keimah in hilh ing. Keimah loli in ka tuute cu zei tung a, cingkhawi tung hi.
12 Tuucingin, a vakvaimi tuute cu komno zo in, a pui khawm bangin bawlbok tung hi. Khuathim le siatlalnak ni-in, khen khek khawngin, a umnak mun haw tihkim pen pui kikleh khawm tung.
13 Ngam dadang pen tultik tung a, munkhatah hulawmin, amu ngamah pui kikleh tung. Israel mualsang le luimawkte ah pui tung a, hamhing umnak le a nopmi munah cawmleh tung hi.
14 Israel ngamsung mualhum lakah hihen, lui sung le munlawn hamhing munah hihen, lungmuang zetin tahaw tuk a, hampa pet he heuh haw tuk hi.
15 Ka tuute khaltu cu keimah hi tung a, colhnak mun vang zei sak tung. Cungnungbel Topa keimah in hilh zo ing.
16 “A paimi tuute zei in, a vakvai mite pui kikleh tung, a maliam mite a meima haw kensakin, a natute damtik tung; mahnaven a thaumi le a ngilte cu siatsuah khawng tung; itahim titale kei cu a dikmi bawltu tuucing ing.”
17 “Noh ka tuu honte, Cungnungbel Topa keimah in hilh ing: bulpak tekin, na thu uh khen tung, a phami le a sia mi cu deidan tung a, tuu le keel khen tung hi.
18 Mi khenkhat ten hampa phabel na eih uh hei lungkim ngawlin, na eih uh ngawlmi vang sikpek khawng uh ci! Tui thiang zetin uh ci a, na in ngawl uhmi tui cu nawitik uh ci.
19 Ka tuuhon dang ten na sihpek uhmi hampa le na nawitik sa uhmi tui a eih le in haw kul,” ti hi.
20 “Mah hangin Cungnungbel Topa keimah in hilh ing: tuu ngil le tuu nawmtam laklawhah thukhentu hi tung hi.
21 Tuu damngawlte cu a mawklamah saihvawkin, pualeu lamah vawk uh ci.
22 Mahnaven ka tuute cu pan tung a, siatsuahleh tukma toh uh ci. Ka tuute pa khat nung pa khat a thu haw khen tung, a sia le pha dan tung hi.
23 Amuh cingtu tukin ka nadektu David bang kumpi pia tung a, cingkhawi tuk hi.Ref 34:23 Mang 7:17;
24 Topa keimah hi a Pathian hi tung a, amuh uktu kumpi cu ka nadektu David bang hi tuk hi. Keimah in hilh zo ing.Ref 34:24 Ezk 37:24;
25 A himnak haw tukin a lak hawah thutepnak bawl tung. Ngamsung a, sahang lauhuaite paitik khawng tung a, ka tuute cu hampa lakah himdam zetin um haw tuk a, tupi sungah bok thei haw tuk,” ti hi.
26 “Muicu pia tung a, ka mual thiang elkimah um haw tuk hi. Mahlai munah a kul can haw ten muicu nguahzutik tung hi.
27 Thingkung ten ngah haw tuk a, lo ngam pen an suah tuk, akua hei hihen amu ngam tekah himdam zetin um haw tuk hi. Ka mihingte a kennak haw thik taicin cu cattik khawngin sal a bawltu tei khut sung pen ka luattik hun ten, Topa ka hihlam cu thei haw tuk hi.
28 Pathian thei ngawl miphun ten suam haw tukma toh, sahangte vangin manin, eileh haw tukma toh hi. Himdam zetin um haw tuk a, kuamah in nawmcanleh haw tukma toh hi.
29 Lo ngampha pia tuk ka hih hangin ngilkial dangdumin cimnak cu cawltik tung hi. Miphun dang ten nuihcipleh haw tukma toh.
30 Israel cu hupin, ka mihing a hihnak haw cu mi hempoh ten thei haw tuk hi. Cungnungbel Topa keimah in hilh zo ing.”
31 “Noh ka tuute, ka cawmmi ka tuu honte cu ka mihing hih uh ci. Keimah hi na Pathian uh ing. Cungnungbel Topa in,” ti hi.