33
Vilvengtu Ezekiel
(Ezk 3:16-21)
1 Topa in,
2 “Mihing pa, Ezekiel aw, ngam pa khatah ngaldonak ka hentik ten iti bang him tih cu na mihingte hilhin hi. Mah ngam mihing ten amu lak pen mi pa khat vilvengtu tukin teng haw hi.
3 Ngal tei hunlih amuh haw ten mi hempoh ngallin piaknakin pengkul tum hi.
4 Mi pa khatin mah pengkul tum thawm za naven kinmawh ngawlin ngalte hungin amah a that haw tale, a thisan cu ama lu humah umin, amah mawhsiat hi tuk hi.
5 Ngallinnak piakmi thei naven imah a sial ngawl hangin a thih cu ama sualman hi. Ngallinnak piakmi a ngaita ahin, luat thei tuk naven!
6 Ngalviltu in ngal tei hun lih cu mu naven ngallinnak a pia ma tale ngalte cu hungin misualte cu that haw tuk hi. Mahnaven a thisan man haw cu ngalviltu lakah sot tung hi.
7 “Mihing capa, nangmah cu Israel miphun tei ngal vilvengtu in bawl tung hi. Ngallinnak ka piakmi a lak hawah pia sa lawnin hi.
8 Misual pa khat cu thi tuk hi tin, ka hilh nungten a nunnak hup thei tukin le a nunzia thek tukin ngallinnak na pia ma ahi tale, a sualmanin thi tuk hi. A thisan man cu na humah sot tung.
9 Ngallinnak pia navecin a sualnak a khel cuang ma tale, a sualmanin thi tuk naven na nunnak cu hup tung,” ti hi.
Bulpak Dehvo
10 Topa in, “Mihing pa, Ezekiel aw, Israel miten ‘Ka sualnak uh le thilpha ngawl ka bawlmi uhin ka van uh ngittik hi. Ka taksa uh kiam cucung a hih ten itin kaw ka nun theih tuk uh?’ tin a tih lih haw bangin a lak hawah ti lehin hi.
11 Phano in hilhin; Cungnungbel Topa keimah cu a nungmi Pathian ka hih bangin hilh ing hi; misual pa khat a thih muh cu ka lungdam zawng kha ma hi. Sualnak zamsanin, a nuntuk cu mu nuam saw ing. Maw Israel, thilpha ngawl na bawlmi cu cawl tohin hi. Ita thih tuk cu nuam li nge cim?
12 “Mihing pa, Ezekiel aw, Israel mite hilhin: mipha pa khat a sual tale, a phatnakin pan tukma hi. Mipha ngawl pa in, a phatngawlnak a colhsan tale dantat hi tukma hi; mahnaven mipha pa khatin sualnak bawl a pan tale, a nunnak cu khawih hi tukma hi.
13 Mipha pa khat lakah nunnak thutiam ing; mahnaven thilpha a bawlsate cu tawk leng poh tin, a ngaihsut i hum pen sualnak a bawl tale thilpha a bawl mite cu cingleh tukma toh ing. A sualnak hangin thi tuk hi.
14 Mipha ngawl pa khat cu thi tuk ci tin, ngallinnak pia ing; mahnaven sualnak bawl cu cawlin, a dikmi le a pha mi a bawl tale,
15 tehkipnakin sum cawitu i thutepnak thil a lakmi cu pia lehin, a ngukmi nate vang a pia kikleh ahi tale, sualnak zamsanin, nunnak piatu i daan a zui hangin thi ngawlin nung tuk hi.
16 Sualnak a bawl mite cu ngaidam tung hi. Itahim titale a dik le a pha mi a bawl hangin nung tuk hi.
17 “Na mihing ten ka thil bawl daan hi man kha ma ti haw hi. Mah kha ma, amu thil bawl daante saw hi si a man ngawl.
18 Midik pa khatin thilpha ngawl a bawl pan tale thi tuk hi.
19 Mipha ngawl pa khatin, sualnak bawl colhsanin, a dikmi le a pha mi a bawl tale, a nunnak cu hup ngah hi.
20 Mahnaven Israel, ka bawlmi hi nangin man ma hi ti ci. Akua nabang na bawl uhmi bangin thukhen tung,” ti hi.
Jerusalem Siatnak Thuthang
21 Sal ka tannak uh kum sawm le kum nih kum, ha sawm ha, ni nga ni-in, Jerusalem pen a luatmi pa khat ka lakah hungin, Jerusalem khuapi sia zo hi, tin hilh hi.Ref 33:21 2Kum 25:3-10; Jer 39:2-8; 52:4-14;
22 Mahpa i hen laih ngawl, ni khatnak taklamin, Topa i huham cu ka lakah heng hi. Mahpa cu a zingten hengin, Topa in ot theihnak huham pialeh hi. Mah hangin awnleh thei ing.
Mipi Tei Sualnak
23 Topa in,
24 “Mihing pa, Ezekiel aw,” Israel ngam a sia khawng zo mi, khuasung a um mipi ten, “Abraham cu mi pa khat bek hi naven ngam buppi cu a lakah pia in um hi. Kohte cu mi tamzet hi ung a, atu-in hi ngam cu keimu ta hi zo tin ti haw hi.”
25 “Cungnungbel Topa keima hilhmi bangin hilhin hi. A sung a, thi a um laihmi tei cik ei in, milim bia uh ci. Mi that uh ci a, hi ngam hi keimu ta hi tin, itin kaw na ngaihsut theih uh?
26 Na ngalnam uh muangin, na thil bawl uhte hi ningdelhhuaizet hi. Akua na bangin angkawm sualnak bawl uh ci. Hi ngam hi keimu ta hi tin, akua in kaw noh a ngaisungtik?
27 “Cungnungbel Topa keimah hi a nungmi Pathian ka hih bangin ngallinnak ka piak bangin hilhin hi. A sia khawng zo mi khuasung a ummite cu thah hi haw tuk hi. Hampalak a um mihingte cu sahang ten ei haw tuk a, mualhum le suanghol sungah a ngelh mite cu natnak thuakin thi haw tuk hi.
28 Hi ngam cu ngamkhingah ka bawl ten a thupi sazet haw mi a ngilnak haw cu bo tuk hi. Israel ngam mualsangte cu cam mahtakin, a sung cu kuamah in tawk thei haw tukma hi.
29 Mipite a sual haw hangin dantat ing a, a ngam haw cu ngamkhingah ka bawl ten keimah hi Topa hi tih cu thei haw tuk,” ti hi.
Profet Awn
30 Topa in, “Mihing pa, Ezekiel aw, na mihingte cu khuapi kulhtian elah hihen, a inn kongka elah hihen, a tawhdun haw ten nangma thu bek son haw hi. Pa khat le pa khat, ‘Atu-in, Topa i awnkam iti bang kaw a hen, ngai hih nung,’ tin tidun haw hi.
31 Mah hangin ka mihingte cu a bawl mek haw mi bangin, na thuhilhmi ngai tukin khawmdun haw naven bawl tuk na hilhmi bawl haw ma. Itnak awnkam cu a muk haw pen tul li bok naven hampum leleng haw laih hi.
32 Nang cu amu ca in, lawm la sathiam le aw phazet hi navecin a lungnopnak haw tukin le a colhdamnak haw tukin cuang saw cuang ma ci; tingtang tumtu in suak thong ci. Na otmi cu thei khawng haw naven pa khat hei zui nuam haw ma.
33 Mahnaven na otmi hempoh a kim khawng ten, na thuson lihte kim khawng hi tih a theihbek haw ten amu lakah profet na umlam thei haw tuk,” ti hi.