32
Tuisaltam Bang Kumpi
1 Sal ka tannak uh kum sawm le kum nih kum, ha sawm le ha nih ha, ni khat ni-in, Topa in,
2 “Mihing pa, Ezekiel aw, Izipt kumpi lakah ngallinnak cu ciangno pia in hi. Ka thu cu a lakah hi bangin na hilhin hi. Miphun tei lakah kiosa bangin ngamta in, tui sungah a vak limi tuisaltam bangve cin hi. Na ke tuah tui nawitik ci a, nguntuite nawitik khawng ci.
3 Miphun hempoh cu a tawhdun khawm haw ten ka suuk tuah awk tung a, amuh ten tuimawkah dok haw tuk hi.
4 Lei ah vawk tung a, na cik eitu tukin vano le ngamsa hempoh sam tung.
5 Muatin, a zan tohmi na luang cu mual le munlawnte khuhnakin mang tung.
6 Na thisanin mualsangte a noih khawng laklawhin le ngun tuite a dim khawng laklawh leihsuk li tung.
7 Nangmah ka siatsuah ten van cu lang ngawlin khuh tung a, aksite thimtik khawng tung. Ni cu meingo limah ngelh tuk a, hade hei vak tukma hi.Ref 32:7 Isa 13:10; Mt 24:29; Mk 13:24-25; Lk 21:25; Mang 6:12-13; 8:12;
8 Van a, um vaknak hempoh cuhmit khawng tung a, na ngam cu thimnakin khuh khawng tuk hi. Cungnungbel Topa Keimah in hilh zo ing.
9 “Nangmah ka siatsuahnak thuthang cu na theih awng ngawlmi ngamah than tung a, miphun tampi cu lungnop viang haw tukma hi.
10 Na hum a, ka bawlmi ten miphun tampi cu amthongin bawl tuk hi. Ka ngalnam ka dan toh ten kumpi tampi cu thinsu in can tawtok haw tuk hi. Na lup ni ten a venghawng haw in amu nunnak tek ngaisungin, thinsu in can li haw tuk,” ti hi.
11 Cungnungbel Topa in, Izipt kumpi lakah, “Babilon kumpi i ngalnam tawk tuk ci.
12 Hehpihnak nei ngawl miphun tei ngalkap ten a ngalnam haw suahin, na mihingte sattan haw tuk hi. Na mihingte le na tuangkhawnnak hempoh cu siatsuah khawng haw tuk hi.
13 Tui luannak luam tihkimah na ngante that tung a, tui nawitiktu tukin mihing le ngante cu lui ah hawh haw tukma toh hi.
14 Na tuisung a, buakte cu nimtik khawng tung a, na tuite cu sathau bangin thiang kilkelin luang haw tuk hi. Cungnungbel Topa Keimah in hilh zo ing.
15 Izipt cu ngamkhingin suaktik tung a, mahlai a mihing hempoh ka siatsuah khawng ten keimah hi Topa ka hihlam cu thei tuk uh ci.
16 Hi ngallinnak piakmi hi mithi vuinak la in suak tuk hi. Izipt le a mihing tei humah thasiatnak langtiknak tukin, numei ten sa haw tuk hi. Cungnungbel Topa Keimah, in hilh zo ing,” ti hi.
Mithi Khua
17 Sal ka tannak uh kum sawm le kum nih kum, ha khat ha, ni sawm le ni nga ni-in, Topa in ka lakah,
18 “Mihing pa, Ezekiel aw,” Izipt mitei ca in mithi ngai in umin hi. Mithi khua ah miphun ngilzette tuah kuatin hi.
19 A lak hawah: Midang sangin mawi cuang ing tin ngaisungdun cim maw? Mithi khua ah hawhin Pathian thei ngawlte tuah mengdenin umden tuk ci.
20 “Izipt mite cu ngal tei khut tuah a thi mite tuah lum ten haw tuk hi. Amuh that khawngtu tukin ngalnam mansa in um hi.
21 Ngal phabelte le Izipt pen ngal a dotu ten mithi khua pen Izipt mite cu muak haw in, ‘Ngal khutah a thi mi Pathian thei ngawltute cu hilai ah hungin lum hawta hi,’ tin au haw tuk hi.
22 “Mahlai munah Assiria vang um bok hi; a ngalkap tei khan cu a elkim mun tihkimah um haw hi. A venghawng haw in, ngal tei khut tuah thi haw hi.
23 A khan haw cu mithi khua, a thuknakbel munah um hi. A ngalkapte cu ngaldonakah thi haw in, a khan haw ten kil haw hi. Mahte cu a dam laih haw in, a nungmi tei ngam lauthawngtik li tute haw hi.
24 “Elam vang mahlai ah um bok; a ngalkap tei khan cu a elkimah um khawng hi. A venghawng haw in, ngal khut tuah a thi mite haw hi, mithi khua ah vunceptan ngawlin hawh haw hi. A dam laih haw in khua tihkimah mulcangsuak launak a umtiktu hi haw naven atu-in mualpho le mengdenin um zo haw hi.
25 Elam cu ngal tei khutin, a thi tei lakah zau hi; a ngalkap tei khan cu a elkimah um hi. A venghawng haw in vunceptan ngawl, ngal tei khut tuah a thi mi nguakcang haw hi. A nunlaih haw in khua tihkimah mulcangsuak launak a dimtiktu hi haw naven atu cu ngal tei thahmi lakah telin, mualpho le mengdenin thi haw hi.
26 “Meshek le Tubal vang mahlai ah um haw; a ngalkap tei khan cu a elkim hawah um hi. A venghawng haw in vunceptan ngawl, ngal tei thahmi nguakcang haw hi. A nungmite lau tukin nawmcan litu haw hi.
27 Tanglaih a ngalpha minthangte cu a thih haw ten hiamnam kimno tuah vui haw hi. A ngalnam haw cu a lu nuai hawah koihin, a lumphaw haw cu a luangpi haw humah koih haw hi. Mahnaven amuhte cu mah ti bangin upatnak tuah vui tawk haw ma hi. Hi ngalphate cu a nungmi tei launak tuah nawmcan tukin huham nei haw hi.
28 “Mahti bangin Izipt mite cu vunceptan ngawl, ngal thahmi tei lakah sihpekin um haw tuk hi.
29 “Edom vang mahlai ah a kumpite le a hotute tuah um haw hi. Amuhte cu ngalkap ngilzet haw naven atu-in mithi khua ah vunceptan ngawl, ngal thahmite tuah um haw hi.
30 “Saklam kumpite le Sidon mite vang mahlai ah um haw hi. A huham haw tuah khua tihkimah mite lauthawngtik haw naven atu-in ngal thahmi le vunceptan ngawlmi tuah mualpho in cawl zo haw hi. Mithi khua a hawhtute tuah mualphonak cu kawmdun haw hi.
31 “Hi bangin ngal thahmite hempoh amuh haw ten Izipt le a ngalkap tei ca in, amuh le muh hehnem dunnak haw hi tuk hi,” tin, Cungnungbel Topa in ti hi.
32 “Izipt kumpi cu a nungmite launak tuah nawmcantu tukin ngaisung ing, mahnaven amah le a ngalkapte cu thah hi haw tuk a, ngal khut tuah a thi mi vunceptan ngawlte tuah vui hi haw tuk,” ti hi. Cungnungbel Topa in hilh zo hi.