31
Izipt le Sidar Thing Tehkipnak
1 Sal ka tannak uh kum sawm le kum khat kum, ha thum ha, ni khat ni-in, Topa in ka lakah,
2 “Mihing pa, Ezekiel aw,” Izipt kumpi le a mihing tei lakah hi bangin hilhin:
Iti bang huham nei kha cim!
Tehkip theih tuk um haw ma?
3 Lebanon ngam a,
a cehsai bimbemmi le
a kangkakte tuah a ummi
sidar thing bang ci.
Meingo khong tianin, a sang zetmi
thing hi ci.
4 Mah thing khangtiktu tukin
leinuai ah ciktui um haw hi.
Mah thing i dinnak mun cu
kawttik leleng haw hi.
Tupi sung a, thing dang tei lakah
luino hengtik haw hi.
5 Tui phano a ngah hangin,
mah thing cu
thing dangte sangin
sang saw in, a kak tam zetin
sauzet haw hi.
6 Vano tihkim ten a kangkak humah
bu sa haw;
A lim nuai ah ngamsa ten
cano nei haw;
A nilimah leihum miphun hempoh ten
cawlhnakin mang haw hi.
7 Mah thingkung cu
i tizahin kaw a mawi?
Sang zetin, a kangkakte vang
sauzet haw i;
A zungte cu thukzetah a luangmi
tui tian heng haw hi.
8 Pathian huan a, sidar thing hei in
kim ma hi.
Iti bang cak thing hei in,
mahti bang a kak pha
nei um haw ma;
Iti bang tupi hei in,
mahti bang
a kak pha nei haw ma;
Pathian huan sung hei ah
mahti bang thing mawi
nei haw ma,Ref 31:8 Pian 2:9;
9 A zammi a kangte tuah
mawizet tukin ka bawlmi hi.
Pathian i Eden huan thing tei
hawzak lihmi hi.
10 “Atu-in, Cungnungbel Topa Keimah in, meingo khong tian, a khangtomi thingkung cu iti bang thil a humah heng tuk him tih hilh tung. Mah thingkung cu sang dedeuhin uangthuang dedeuh hi.
11 Mahti bangin a uangthuan hangin amah cu lawl zo ing; ngamdang bawi tei khut sungah hengtik zo toh ing. Mah bawi in, a phatngawlnak bangin a humah nadek tuk hi.
12 Hehpihnak nei ngawl ngamdangmi ten phuk haw tuk a, zamsan haw tuk hi.
13 A tumi thing i humah vanote kopin, a kak humah ngamsate vak kawi haw tuk hi.
14 Mah hangin tu pepan thingkung dang cu iti bang pha in, tui a ngah haw hei in, mah thingkung bangin a sangmi le meingo khongtotu thingkung cu umleh haw tukma toh hi. A venghawng haw in mihing bangin thi khawng haw tuk a, mithi khua a hawhsate a zuitu hi bok tuk,” ti hi.
15 Cungnungbel Topa in hi bangin hilh hi, “Mah thingkung cu mithi khua ah a hawh ni ten, khawngaih langtiknak le leinuai a tui cu amah khuhtu in bawl tung. Ngun tuipite khangtik tung a, lui neunote cu luangtik tukma toh ing. Mah thingkung a thih hangin Lebanon Mualsang humah thim pathian tungtik tung a, tupi sung a thingkung hempoh thim suasualtik khawng tung.
16 Mithi khua ah ka kuat ten a lup thawmngingin, mi hempoh hingtik khawng tung. Mah thingkung atu hangin Eden huan a, thingkung hempoh, a cuang a tenmi thingte le tui pha zetin, a ngahtu Lebanon thingkungte cu mithi khua a hawh satu thingte a hih haw hangin a lungdamzet haw tuk hi.
17 Mah thingkungte tuah munkhatin, atu sami thingkungte khawmleh tukin mithi khua Sheol ah hawh haw tuk hi. A lim a, umtu hempoh cu miphun dadang tei lakah khenkhek khawng hi haw tuk,” ti hi.
18 “Hi thingkung cu Izipt kumpi le a mihingte hi. Eden huan a, thingkungte hei amah bangin a sangmi le mi mit la thei um haw ma hi. Mahnaven Eden huan a, thingkung dang bang bokin mithi khua ah hawh haw tuk a, ngaldonakah a thi mi le Pathian thei ngawlmi tei lakah khawmcih tuk hi. Keimah in hilh zo ing,” tin Cungnungbel Topa in ti hi.