28
Taiar Kumpi Siatnak Tuk Profet Otmi
1 Topa in,
2 “Mihing pa, Ezekiel aw, Taiar uktu bawi lakah Cungnungbel Topa keima otmi hi hilhin: Uangthuang zetin pathian ing ti ci. Pathian ing a, kumpi khunnak humah khungin tuipi in kil khawng, pathian hi toh ing, ti ci. Nangmah le nangmah cu pathian bangin ngaisung duncop tuk navecin pathian kha ma ci, mihing hi ci.
3 Daniel sangin cip saw ing, ka lak pen sel theihmi thukuh umma, tin ngaisung ci.
4 Na cihnak le na thil thiamnakin, sui le ngun tuah hautikzet hi.
5 Sumbawl cu thiamzet ci, amet vang tampi ngah ci. Na hauh hangin pualthauzet ci.
6 “Atu-in, Cungnungbel Topa ka otmi cu hi bangin hi: pathian bangin cip ing tin, na ngaihsut duncop hangin,
7 nangmah a do tukin mi ngaihsaknak nei ngawl ngalte hunpih tung. Na cihnak le na thil thiamnak hangin thil mawizet tampi na khawl cu siatsuah khawng haw tuk hi.
8 Nang cu thatin, cinciak khanah vui haw tuk hi.
9 Nangmah that tukin a hun haw tuk ten pathian pah ing cuh ti leleng ni cim? Nangmah a thattute tuah na tawhdun uhten pathian hi ngawlin mihing hi thong tuk ci.
10 Pathian thei ngawl ngamdangmi tei khutah uico bangin thi tuk ci tin Cungnungbel Topa keimah in thupia zo ing,” ti hi.
Taiar Kumpi Caksuk
11 Topa in awnlehin,
12 “Mihing pa, Ezekiel aw, Taiar kumpipa i thuak tukmi cu ngaisung inna, thasia zetin hi. A lakah Cungnungbel Topa keima otmi hi hilhin: Mi cangkim le zohteh takmi hi ci. Iti zahin mipiang le micip hi cim?
13 Pathian huan Eden ah um ci. Suang manpha a phunkim mang ci: ruby le daimon suang manpha, suang aile manpha, a sanmi carnelian le jasper suang manpha, sapphire, emerald le garnet suang manphate mang ci. Sui manpha tampi nei ci. Mahte cu semsuah na hih ni pen nangmata tukin bawlmite hi.
14 A sunglawi vancungmi cherub cu nangmah cingtu tukin koih ing. Ka mual thiangtho ah umin, a de zawzokmi suang manpha lakah hawh ci.
15 Semsuah na hih ni-in, thilpha ngawl bawl na pat ni tian na nungcang cu sonsiat tuk imah umma hi.
16 Nate lei in zuak ci, na nanok leita hangin sualnakah heng ci. Mah hangin ka mual thiangtho pen nang cu hawlvawk ing a, nangmah a cingtu vancungmi ten a de mi suang manpha tei lak pen nang cu hawlvawk haw hi.
17 Mipiang na hih hangin uangthuangin, na minthannakin misil suaktik hi. Mah hangin lei ah vawksukin kumpi dadang tei ngallinnak tukin zamsan ing.
18 Nate lei in, na zuaknak pen a nawngkaimi tampi na bawl hangin na biakinn munte vang nintik khawng ci. Mah hangin khuapi cu mei tuah haal ing a, lei ah tham zo hi. A zotu hempoh ten vutin, na suahte mu haw hi.
19 Na lung-ap hun hengin, bothalta ci; a theitu miphun hempoh cu a mulling haw; nangmah bangin um sual kawn ung tih cu lauzet haw,” ti hi.
Sidon Siatnak Tuk Profet Otmi
20 Topa in, Ref 28:20-26 Joel 3:4-8; Zek 9:1-2; Mt 11:21-22; Lk 10:13-14;
21 “Mihing pa, Ezekiel aw, Sidon khuapi phatngawlnak cu sonin hi.
22 A lak hawah Cungnungbel Topa keima otmi hi hilhin: Maw Sidon, keimah hi na ngal ing. Na hum a thil ka bawlmi hangin miten keimah thangphat haw tuk hi. Na sung a ummite ka bawlsiat ten iti zahin, a thiangthomi hi kam ing tih ka laknak cu na muhten Topa ka hihlam thei tuk uh ci.
23 Natsia hengtik tung a, na lampi ah thisan luang tuk hi. Mun tihkim pen do haw tuk a, na mihingte that haw tuk hi. Topa ka hihnak cu thei tuk uh ci,” ti hi.
Israel In Muicu Ngah Tuk
24 Topa in, “Ngam nelte, Israel a zawnsaktu le a siatsuahtute cu pa khatno hei Israel tei humah ling le so bang hileh thei haw tukma toh hi. Keimah cu Topa ka hihlam thei tuk uh ci,” ti hi.
25 Cungnungbel Topa in, “Israel mite cu ka khen kheknak ngam pen kiklehtik tung a, mahten miphun hempohin, a thiangthomi ka hihnak cu thei haw tuk hi. Israel mite cu amu ngam, ka sila Jakob lak a, ka piakmi ngamah um haw tuk hi.
26 Mahlai ah lungmuang zetin um haw tuk hi. Innte sa in, sabit dumte bawl haw tuk hi. Amuh zawnsaktu le a bawlsiatu a elkim ngamte cu bawlsia tung a, Israel cu lungmuang zetin um haw tuk hi. Keimah cu Topa a Pathian haw ing tih thei haw tuk,” ti hi.