27
Taiar Khuapi Kahnak La
1 Topa in,
2 “Mihing pa, Ezekiel aw,” tuipi mawkah umin, miphun dangte tuipi mawk a umte tuah sum a bawlmi,
3 Taiar khuapi ca in mithi vuinak la sa in hi. Hihi Cungnungbel Topa i hilhmi hi tin hilhin hi.
Maw Taiar, mawinak lamah
cangkim ing ti ci.
4 Na inn, tuipi cu nangmah
a tungdingtu ten
timbaw mawizet bangin
bawlsak haw hi.
5 Nang a tungdingleh tukin le
na thing tukin Hermon Mual a,
cakthing mang haw hi.
Na puantaknak tukin
Lebanon pen sidar thing la haw hi.
6 Na lawngzahnak tukin
Bashan ngam pen khil thing
la haw hi.
Saipras a cakthing tuah
na suatte dawhin,
saiho tuah khuhin,
mawitik haw hi.
7 Na puanzak cu
nimzang ma neuno tuah
tahmi le Izipt ngam pen
coihmi puancoih mawi hi.
Lam khawlapi hei pen
theihtup theih hi;
na hum a nilim puanzak cu
puan phabel Saipras tuikulh a,
puan sandupte hi.
8 Nang a zaptute cu
Sidon le Arvad khua mi haw hi.
Na mithiamte cu timbaw
cingtu haw hi.
9 Hi timbaw bawltute cu
Byblos ah a cung haw hi.
Na dawl bawlnakah,
tuipi hum a
timbaw cingtu hempoh
ten sumbawl haw hi.
10 Persia, Lidia le Libia ngam a ngalkap ten na ngalkap dek haw hi. A lumphaw le a lukhu haw cu na ngalkap innah tak haw hi. Nangma ca minthannak a ngahtute cu amuhte hi.
11 Arvad ngalkap ten na ngal kulhtian cu cing haw in, Gamad ngalkap ten na ngalvilnak taitante cing haw hi. A lumphaw haw cu na pang humah tak haw hi. Nangmah a mawitiktu cu amuhte hi.
12 “Spain ngamah sumbawlin, na tampi ngun, thik, daal le suante tuah thek ci.
13 Grik ngam, Tubal le Meshek ngam hei ah sumbawlin, daal tuah bawlmi tuah salte thek ci.
14 Na van dangte tuah nadektu cipuhte, ngaldonak cipuhte le laakte cu Beth Togarmah pen thek ci.
15 Rhodes mite tuah vang sumbawl ci. Tuipi mawk a um ngam ten na vante cu saiho le thinghaang manpha tuah thek haw hi.
16 Na zuakmi nate le na deh suahmi nate cu Siria ten lei haw hi. Suanghing manpha, puansan, coihmawi puan, nimzang ma neuno tuah takmi puan, tuipi sung pen lakmi kep le ruby suang manphate cu na van ai-in pia haw hi.
17 Judah le Israel miten na van ai-in sangvut, khuaitui, olif thau le namtuite pia haw hi.
18-19 Damaskas miten na zuakmi na le nadeh suah uh mite lei haw in, mah tei ai-in Helbon pen sabittui le Sahar pen tuumulte pia haw hi. Na vante tuah a bawlsa haw mi thik le namtui thekdun uh ci.
20 Dedan miten na vante ai-in cipuh kung dapmi puan zuak haw hi.
21 Arab mite le Kedar ngamuktu ten na zuakmi na tei ai-in tuu le tuuno le keelte pia haw hi.
22 Sheba le Raamah sumbawltu ten na vante ai-in sui le ngun manpha, sui le namtui phabelte pia haw hi.
23 Haran, Kanneh le Eden khua ten, Sheba a sumbawltute le Asshur le Chilmad ten na lakah sumbawl haw hi.
24 Na lakah puan pha le puan mawi, puan sandup, coihmawi puan, a de mi puan phahte, pha zetin, a hual haw mi khuapi le khua neu deuhte zuak haw hi.
25 Na thil zuakmite cu van puatu timbaw ngengbel ten ahon, ahonin pua haw hi.
“Ngit zetin van puatu,
tuipi hum a timbaw bang ci.Ref 27:25-36 Mang 18:11-19;
26 Nangmah a zaptu ten
tuipi humah henpih haw hi.
Lei tuah a khawlanak mun pen
nisuahnak lam huihpi in
nuai nek hi.
27 Na hauhnak le na thil
zuakmi hempoh timbaw cingtu
na mihingte,
na timbaw hum a,
khutzung thiamte le
sumbawltute,
timbaw hum a ngalkap hempoh,
a venghawng haw in,
na timbaw huihin, a muhnek ten
tuipi sungah nim khawng
haw hi.
28 A nim li tohmi timbaw cingtu tei
au thawm cu tuipi mawkah
heng hi!
29 “Timbaw cu taisan khawngin,
timbaw cingtu hempoh
tuimawkah heng khawng haw hi.
30 Nangmah ngai in, nasezet kap haw hi.
A lu hum hawah leivul
leihduncopin, vut lakah
pel tawtok haw hi.
31 Nangmah ngaisungin
sam met khawng haw a,
thangkhau puan silh khawng haw hi.
A thin haw na in,
kap kukuih haw hi.
32 Nangma ca in mithi vuinak
la seh haw hi.
‘Tuipi sung a nim zomi Taiar cu
akua in kaw a tehkip thei tuk?
33 Na vante tuipi ngal a hen ten
mi hempoh tei kinmi
kimtik ci.
Na van manpha ten,
kumpi hautik khawng ci.
34 Atu-in tuipi sungah
nippih khawng zo ci.
Tuipi thuanthum taw dengah
nimsukta ci.
Na vante le na nadektu hempoh cu,
nangmah tuah tuipi sungah
pai thongta uh ci maw ti haw hi.’
35 “Tuipi mawk a um miphun ten na hum a hengmi amuh haw ten lamdang sa haw hi. A kumpi haw cawmin, mullingin, a mitmai hawah launak lang hi.
36 Nang cu muallet zo ci, kumkhua in muallet vawk zo ci a, leihum buppi ah sumbawltute cu mulling haw, nangmah bangin cangsual kha kawn ung tih lauzet haw hi.”