29
Izipt Siatnak Tuk Profet Otmi
1 Sal ka tannak uh kum sawm kum, ha sawm ha, ni sawm le ni nih ni-in, Topa in,
2 Mihing pa, Ezekiel aw, “Izipt kumpi Faro phatngawlnak cu phuangin hi. Amah le Izipt ngam pumpi dantatnak thuak haw tuk tin hilhin hi.
3 Izipt kumpi lakah, Cungnungbel Topa i otmi cu hi bangin hi: Nang tuisung a bokmi a lauhuai tuisaltam, kei hi na ngal ing. Nail ngunpi cu kata hi, keima bawl ti ci.
4 Na kha ah kawizang koih tung a, na ngunpi sung a, ngasate cu na phaw humah koptik tung hi. Mah ngasate tuah tuipi sung pen dok tul tung.
5 Nangmah hihen, ngasate hihen phillawnah vawk tung. Na luang cu phillawnah tangin, kuamah in vui haw tukma hi. Na cik cu ngamsa le vanote pia tung.
6 Izipt mi hempoh ten Topa ka hihlam cu thei haw tuk,” ti hi. Topa in, “Israel mite bawmtu tukin nangmuh Izipt mite muang haw naven nang cu a khoh ngawl pumpeng bangthong poh ci.Ref 29.6 Isa 36:6;
7 A vah haw ten ekin, a zak haw sunletin, a el haw helhtik ci.
8 Mah hangin Cungnungbel Topa keimah in hilh ing. Nangmah do tukin mi hah tung; na mihing le na ngante that haw tuk hi.
9 Izipt cu ngamkhingin suak tuk hi. Keimah cu Topa hi tih thei tuk uh ci.
“Nail Ngunpi cu keima ta, ka bawlmi hi, na tih hangin,
10 Keimah hi nangmah le na Nail ngunpi i ngal ing. Izipt ngam pumpi hi saklamah Migdol khua pen hanglamah Aswan khua tian Ethiopia ngam ngi hengin ngamkhing suaktik tung.
11 Mihing hihen, ngamsa hihen a sungah kuamah hawh haw tukma hi. Kum sawm li sung, a sungah imah um tukma hi.
12 Leihum buppi ah Izipt ngam cu ngamkhing belin bawl tung. Kum sawm li sung Izipt khuapi cu siatik tung; khuadang a sia mite sangin luai saw tuk hi. Izipt mite cu ngaltaimi in suak haw tuk hi. Ngam tihkimah tai haw tuk a, miphun dang tei lakah um haw tuk,” ti hi.
13 Cungnungbel Topa in, “Kum sawm li nungten Izipt mite cu ka khen kheknak ngamte pen pui kikleh tung a,
14 Izipt hanglam ngam, a suahkehnak haw khua le tui ah umtik tung. Mahlai ah ngam nawmtamzet hi haw tuk hi.
15 Ngam hempoh lak pen ngam nawmtambel hi haw tuk a, miphun dang uktu hileh haw tukma toh hi. Imah sial tak ngawlin bawl tung, amu deihdanin, a pui theih haw tuk pa khat hei um haw tukma toh.
16 Bawmtu tukin Israel miten muang haw tukma toh hi. Izipt tei thuakmi amuh haw ten amuh a muan uh hi khialzet hung hi, tih cu Israel miten thei haw tuk hi. Israel miten keimah cu Cungnungbel Topa hi tih thei haw tuk,” ti hi.
Kumpi Nebuchadnezzar In Izipt Neh Tuk
17 Sal a tannak uh kum sawm nih le kum salih kum, ha khat ha, ni khat ni-in, Topa in,
18 “Mihing pa, Ezekiel aw, Babilon kumpi Nebuchadnezzar in Taiar cu do hi. Nebuchadnezzar in, a ngalkapte vanngit puatikin a van puak haw mi a ngit leita hangin a lu haw kolh khawngin, a ko haw hawk khawng; mahnaven a cimkham zah haw in kumpi le ngalkap ten a ngah haw mi umma hi.
19 Mah hangin Cungnungbel Topa in hi bangin hilh ing hi: Izipt ngam cu kumpi Nebuchadnezzar lakah pia tung hi. A ngam haw cu simtum tuk a, nate lonsak tuk hi; a ngalkap tei thaman tukin Izipt ngam a hauhnakte cu pua khawng tuk hi.
20 A dehmanin Izipt ngam cu pia tung hi, itahim titale a ngalkap ten ka ca in nadek haw hi. Cungnungbel Topa keimah in hilh zo ing,” ti hi.
21 “Mahtibang hun a hen ten Israel cu miphun ngil zetin bawl tung a, nang Ezekiel cu mi hempoh ten a theih theihnak haw tuk mun pen awntik tung; mahten Topa ka hihlam cu thei haw tuk,” ti hi.