26
Taiar Siatnak Tuk Profet Otmi
1 Sal ka tan sawng uh kum sawm le kum khat kum, ha khat ha, ni khat ni-in, Topa in ka lakah,
2 “Mihing pa, Ezekiel aw,” Taiar khuapi sung um mipi ten a au lih haw mi cu hihi, hi: ‘Jerusalem sia khawng zo! Sumbawlnak tukin tha nei lehma toh! Eimuh zuamtu a ngal uh hileh thei haw tukma toh!’ ti haw hi.
3 “Mah hangin Cungnungbel Topa keimah in, ka otmi cu hi bangin hi: Taiar khuapi, Keimah cu na ngal ing. Miphun tampi cu nangmah do tukin hunpih tung a, tuihualpi bangin na humah heng haw tuk hi.
4 Na khuapi kulhtiante siatsuahin, na ngalvilnak taitan innte cu siatsuah khawng haw tuk hi. Keimah in leivulte cu phiat ciangtik tung a, suangbek zam tung.
5 Mah suangte cu tuipi sung a, dingmi suang hi tuk a, mah suang humah ngasa mantu ten a sukte pho haw tuk hi. Cungnungbel Topa keimah in hilh zo ing. Miphun tampi ten Taiar cu a nate lonsak haw tuk hi.
6 A ngamsung a, khuapi dangte vang ngalnamin that haw tuk hi. Taiar in keimah cu Topa hi tih thei tuk,” ti hi.
7 Cungnungbel Topa in, “Kumpi hempoh lak pen kumpi thawmngengbel, Babilon kumpi Nebuchadnezzar cu Taiar do tukin hunpih tung. Ngalkap tampi, cipuh, cipuhleng le cipuh ngalkapte tuah saklam pen hung haw tuk hi.
8 Ngamsung khuapi dang a umte cu ngaldonakah thi haw tuk hi. Ngal ten ngalkhamnak humkua luatin, lei tiang haw tuk a, lumphaw haw cu kulhtian bangin sahzet tuk hi.
9 Pangsuknak thingtum tuah na khuapi kulhtian cu suvawk haw tuk hi. Na ngalvilnak uh taitante cu heipi tuah phukin, phelet khawng haw tuk hi.
10 A cipuh tei tultikmi leikhu in, nohte khuh tuk hi. A sia zomi khuapi kongkhah pen a hawh haw ten a cipuh tei an a puaknak haw leng le cipuh leng a duhnak haw thawmin, na kulhtian uhte hing dudultik tuk hi.
11 Cipuh ngalkap ten na lampi uh humah mi nawt pepelin, mipi cu a ngalnam haw tuah that pepel haw tuk hi. A ngeng zetmi na khuam uhte lei ah tu khawng haw tuk hi.
12 Na hauhnak uh le na sum bawlnak uh nate cu amu nuanuamin la haw tuk hi. Na pang uhte cu phelet khawngin, na nopsaknak uh innte phelet khawng haw tuk hi. Suang le thingte, inn le pang a phiatlet haw mi cu tuipi thuanthum sungah vawk khawng haw tuk hi.
13 Na lasak uh botik tung a, na tingtang awte daitik tung.Ref 26:13 Mang 18:22;
14 Suangbek zamin, a humah ngasa mantu ten a sukte pho haw tuk hi. Na khuapi uh cu tundinleh hi tukma toh hi. Cungnungbel Topa keimah in hilh zo ing,” ti hi.
15 Topa Pathian in, Taiar khuapi lakah hi bangin awn hi: “Nehmi hi zo ci, na lup ten tuipi mawk a ummi ten, ngal tei thahmi tei a au kionak aw cu zain, a mulling haw tuk hi.
16 Tuipi thuanthum hum a khualzin miphun tei kumpi hempoh cu a khunnak haw hum pen tolh haw tuk hi. A puancual haw le a puan coihte dukin, lei ah cantawtokin khung haw tuk hi. Na thuak daan amuh haw ten a mulling haw tuk a, lau ngawlin um thei haw tukma hi.Ref 26:16-18 Mang 18:9-10;
17 hi mithi vuinak la hi sa haw tuk:
Khuapi minthangzet cu
sia zo hi.
A timbaw haw cu tuipi hum pen
pai zo haw hi.
Hi khuapi sungmi ten
tuipi thuanthum uk haw hi.
Tuipi mawk a um ngamte cu
lautik haw
18 Hi khuapi a caksuk ni ten
tuikulh tampi can tawtok haw hi.
Mahti bang siatsuahnak amuh haw ten
a mipi haw ten
lamdang sazet haw hi.”
19 Cungnungbel Topa in, “Siatsuah khawngin, kuamah i um nuam ngawlnak khuapi lop bangin ngamkhingin bawl tung. Tuipi thuanthum tui tuah khuh tung.
20 Tanglaihin, a nungmite tuah munkhatah um tukin mithi khua khuk thuk sungah khia tung. Mah leinuai ngam, kumkhua siatsuahmi ngamah mithite tuah umtik tung. Mah hangin kuamah i umnak hei hileh tukma toh ci. A nungmi tei ngam sungah panmun luah tukma toh ci.
21 Zamhah zetin sialsiahmi hi tuk ci a, mahten bolalta tuk ci. Miten zei haw tuk naven muleh haw tukma toh hi tin, Cungnungbel Topa in hilh zo hi.”Ref 26:21 Mang 18:21;