23
Numei Sual Tei Unau
1 Topa in,
2 “Mihing pa, Ezekiel aw, tanglaihin numei unau pa nih um haw hi.
3 A naupangno haw laihin Izipt ngamah umin, a khanglai bek haw ten a nuncan haw pha ma hi; nawi a metnuam hempoh mettik haw a, khanglai him ngawltohin numei pha ngawlin suak haw hi.
4 A upa saw cu Oholah hi in, a naunu cu Oholibah hi. A pa nih haw in, ka zi hi haw a, canu le capate hinsak haw hi. Oholah cu Samaria hi, Oholibah cu Jerusalem hi.
5 Oholah cu keima ta zo naven numei pha ngawl dek lelengin, Assiria ngam a, a mi ngawihte saw ngai in umsan thong hi.
6 A deihmite cu sandup puan silh ngalkapte, miphun pha pen hin sukmi le nadeh ngengzet a dektute hi haw in, cipuh ngalkap bawi, mipiangzet ngeh haw hi.
7 Assiria ngalbawi tei lakah numei pha ngawl dekin Assiria milimte biaknak le a tisa deihnakah nawngkaitik duncop hi.
8 Khanglai hi ngawltohin, numei pha ngawl a cannak Izipt ngam a um bang lelengin, numei pha ngawl na cu dek leng hi. A khanglai tung laih pepan panote a lakah zau mek haw a, numei pha ngawl bangin bawl li zo haw hi.
9 Mah hangin a ngaih zetmi le amah a hazawltu Assiria tei lakah pia tung hi.
10 Amuh ten a van duhsakin thacang hilhialin koih haw hi; a canu le capate cu man haw a, amah vang ngalnam tuah that haw in thukhennak thuak hi. Khua le ngam tihkimah numei ten a thu cu son leilui haw hi.
11 “Mahmi cu a naunu Oholibah in mu naven poi sa cuang ma hi. A unu Oholah sangin a luai saw lalaihin numei pha ngawl suak hi.
12 Amah vang taksa deihnak tuah dimin, Assiria miphun pha hinnamte, puan a de mi silhtu ngalkap bawite le cipuh ngalkap bawi mipiangzette cu deih hi.
13 Nungcang sia in nawngkai duncoptik hi. A nauta vang cu a unu bang lelengin zawngkhalzet bok hi.
14-15 “A nuncan sia sungah thuk dedeuhin nimsuk pepel hi. Babilon ngam bawi tei zuk cu pang humah suai in, si san noih haw a, elkilh kilhin, lupawng pawngtik haw; mahte cu ngai in umthong hi.
16 Mah zukte a muh bek ten ngai leita um thei ngawltohin, Babilon ah palai hah paih hi.
17 Babilon mite hungin zaupih haw hual paih haw hi. A thincimzet tuk bawlin nawngkaitik haw hi. Mahtin a nawngkai duncoptik haw nungten a thinna in ningdelhleh hi.
18 Mi theih khawng tukin bawlduncopin, numei pha ngawl a hihnak cu mi hempoh muh tukin tangzaakdun hi. A unu ka ningdelh bangin amah vang ningdelh ing.
19 Izipt ngam khanglai tung a hih laihin, numei pha ngawl a deh bangin atu hei dekin, luaisuk dedeuh hi.
20 Laakcang le cipuh cang bangin a na ngengin, a tui tam le sau mihukte cu kin tutuh,” ti hi.
21 Oholibah, Izipt ngam a, khanglaino na hih laih pepan na nungcang pha ma, pano ten na nawi metin khanglai him na hihnak pai tian hei in, na sualnak cu pehzom nuam pepel laih ci!
A Naunu Humah Pathian Thukhennak
22 “Mah hangin Oholibah, Cungnungbel Topa keimah in hilh ing. Na ngaihzette cu kham leita zo ci, mahnaven na humah a thin haw uktik tung a, nangmah kil tukin hunpih tung hi.
23 Babilon mi Khaldean mi, Pekod mi, Shoa mi, Koa mi le Assiria mite hunpih tung. Mah mipiangzet, miphun pha hinnamte le bawi upate, acozah bawite le cipuh ngalkap ngalbawite cu hulawm khawm tung.
24 Saklam pen sim haw tuk a, ngalkap tampi le cipuh leng le an puaknak lengte tuah hung haw tuk hi. Lumphaw le thik lukhu tuah ngalkap ten kil khawng haw tuk hi. A khutsung haw-ah pia tung a, amudan bangin na thu cu khen haw tuk hi.
25 Na humah ka thin a uk hangin, thinukin nangmah siatsuahtik tung hi. Na naal talhsak haw tuk, na beng ahsak haw tuk, na canote vang that haw tuk hi. Hi zuh hi, na canu le capate sut haw tuk a, nungcungin mei ah haal haw tuk hi.
26 Na puansilh botkek haw tuk a, na thil manphate la haw tuk hi.
27 Izipt ngam pen na neih zo mi nungcang pha ngawl le taksa nopnak na bawl lelengmi cu botik tung a, milimte cu zoleh tukma toh ci. Izipt ngam vang ngaisungleh tukma toh ci,” ti hi.
28 Cungnungbel Topa in, “Nangmuh a huatu le mitkemtu tei kut sungah pia tung.
29 Mahti bangin nohte a huat haw hangin na dehman hempoh laksak khawng haw tuk a, na puansilhte duhsakin, numei pha ngawlte bangin thacang hilhialin hah haw tuk hi. Na taksa i deihnak le numei pha ngawl na hihnak hangin,
30 na humah hiti bang nate hengtik hi. Miphun tampi tei ca in, numei pha ngawl dekin, a milimte tuah nawngkai duntik cop zo ci.
31 Na unu i thu na zui hangin dantatnak khuathai na in tukin pia bok tung,” ti hi.
32 Cungnungbel Topa in,
“Na unu i khuathai tuah intuk ci.
A khuat cu ngengin
thukzet hi.
Mi hempoh ten nang cu
zawnsakin,
nautat haw tuk hi.
Na in tukmi khuat cu
let duaduah hi.
33 Mah khuatin vancaukaptik tuk a,
khamzet tuk ci.
Launak le bawlsiatnak khuat le
na unu Samaria i khuat hi.
34 Bo bilhbelh tian intuk ci a,
na khuat keh mawk ten,
na nawi atkeh haw tuk hi.
Cungnungbel Topa in hilh zo ing,” ti hi.
35 Cungnungbel Topa in, “Keimah cu phawkngilin, nung na hek hangin le na taksa deihnak le numei pha ngawl na hihnak hangin thuak tuk ci,” ti hi.
Unau Nih Tei Humah Pathian Thukhennak
36 Topa in, “Mihing pa, Ezekiel aw, Oholah le Oholibah humah thukhen tukin mansa toh cim? Ningdelhhuai nate a bawl haw hangin mawhsiatin hi.
37 Angkawm sualnak bawlin, mi that haw hi: milimte tuah sualin, capa a hinsak haw mi vang that haw hi. Ka capate cu milim biakpiaknakah mang haw hi.
38 A bawl haw mi cu mahbek kha ma laih hi. Ka Biakinn nawngkaitikin, Sabbath ni vang palcat haw hi.
39 Milim biakpiaknakah ka canote a thah ni haw in, ka Biakinn ah hungin nawngkaitik haw hi.
40 “Ngam khawlapi a, um panote zawm lelem haw in, panote cu hung ngangai haw hi. Unau nihte cu tuibualin, a mitmul haw hangtik haw a, sui le ngun na manphate khaih leih luih haw hi.
41 Khunnak mawizet humah khungin, a mai hawah cabuai pa khat koihin, a humah na phapha ka piakmi, namtui le olif sathaute koih haw hi.
42 Imah kinmawh kha ngawltu, phillawn pen a hunpih haw mipi tei au thawm thang hi. Numei unau nih tei baanah cau buntikin, a lu hawah a mawi zetmi lukhuh khutik haw hi.
43 Ka lungmu sungno in, nupa sualnak bawlin a cawl dikdekmi numei nu cu a man lih haw mi a numei pha ngawl leleng hi, ti ing.
44 Hi numei pha ngawl pa nih tei lakah tu le tu hawh liphet haw hi. Nuncan sesuak, Oholah le Oholibah tei lakah kik lelem haw hi.
45 Midikcang ten hi numeite cu angkawm sualnak a bawl haw mi le mi a thah haw hangin lawl haw tuk hi. Itahim titale nupa sualnak bawl leleng haw in, a khut haw vang thisan bang,” ti hi.
46 Cungnungbel, Topa in hi bangin ti hi: “Amuh thinsutiktu le a na haw longtu tukin mi honpi hunpih un.
47 Mi honpi ten suang tuah sep haw henna, ngalnam tuah do haw hen; a canote thatin, a innte haal haw hen.
48 Hi ngam sungah nuncan sesuak cu kham tung; mah thu cu numei hempoh ten hi numei pa nihte bangin nupa sualnak a bawl haw ngawlnak tukin ngallin piaknak hi tuk hi.
49 noh unau nihte na nungcang uh ningdelhhuai a hih hangin le milim na biak uh sualnak hangin bawlsia tung hi. Keimah hi Cungnungbel Topa ka hihlam thei tuk uh ci,” ti hi.