24
Saalkaimi Beel
1 Sal ka tan sawng uh kum kuah kum, ha sawm ha, ni sawm ni-in, Topa in,
2 “Mihing pa, Ezekiel aw, tusun i ni le ha hi laisungah phano tiamtehin; itahim titale tuni hi Babilon kumpi pa in Jerusalem a kilpat ni hi.Ref 24:2 2Kum 25:1; Jer 52:4;
3 Keimah Cungnungbel Topa in ka mihing langpang tei ca in tehkipnak ka hilhmi cu na hilhin:
Mei humah beel suangin,
beel sungah
tui a dim thanin hi.
4 A sungah cik a ukbelte a daak le
a kawngte, a cuangin tenmi
sa nguh a tansa in koihin hi.
5 Cik ukbel tuu cikte hihen,
beel nuai ah thingte tuah
na tui cu so hen.
Cik le sa nguhte huanin,” ti hi.
6 Cungnungbel Topa in hi bangin ti hi: “Mithat tei umnak khuapi cu bolal zo hi! Som awng ngawl salkaimi beel bang hi. Cik tel khat nung tel khat thukleh li haw in, tel khat hei tangma toh hi.
7 Khua sungah mithat haw a, leivul khuh theihnakah thi cu luangtik haw ma. A mom zetmi suang humah luangtik haw hi.
8 Mahlai ah thisan cu zam ing, kuamah sel theih tuk ngawlin le thinuknak tuah phuba lak theihnak tukin,” ti hi.
9 Cungnungbel Topa in hi bangin ti hi: “Mi thattu tei umnak khuapi cu bolal tatak zo hi. Keimah loli in thing cawm tung a,
10 tam sesemin thing cu bet un. Mei lam unna, cik cu huan un. A tui kang khawngin huan un. A nguhte vang kang khawng tahen.
11 daal beel thacang cu meiling humah koih unna, san ha hum hen. Meiling sungah sal ek kaimi cu bo cuang tukma naven,
12 a sal ek a kang khawng ten beel thiangin suakleh tuk hi.
13 Jerusalem, na nungcang phatngawlnakin nawngkaitik hi. Thiangthotik tuk tum naveng nawngkai leleng ci. Ka thinuknak nasezet na thuak laklawh thiangtholeh tukma toh ci.
14 Cungnungbel Topa keimah in hilh zo ing. Na ka deh tatak hun heng zo. Na sualnakte hi umsan thong tuk mang, na humah hehpihnak nei tuk mang. Ka thinsup tuk mang. Na bawlmi hangin dantatnak thuak tuk ci,” tin Cungnungbel Topa in hilh zo hi.
Profet i Zi Thi
15 Topa in,
16 “Mihing pa, Ezekiel aw, na deihbelmi cu muanmawh khak ngawlin na lak pen la tung. Mahnaven phu viang pahsun, a kap hei kap pahsun, na hitui vang cak pahsuh hen.
17 Na ik tulmi vang kuamah in thei haw ma hen. Na mithi ngaih lang hen tin, na lu khuh ngawlin le na ke thacang tuah pualamah tul pahsun. Na mai khuh pahsun, mithi ngai tei eihmi an vang ei pahsun,” ti hi.
18 Mah ni zinglamin mipite tuah thu hilhdun li ung. Mah taklamin ka zi in zamsanta hi. A zingten Topa i hilh bangin um ing.
19 Mipi ten, “Ita hi bangin um cim? tin dong haw hi.
20 “ Topa in amu lakah thuhilh a,
21 nangmuh Israel tei lakah hi thu hilhtik hi. Israel mite, na Biakinn uh a khohkhahzet hangin uangthuang uh ci. Na zoh nuam uhmi le na zot nuambel uhmi Biakinn cu Topa in nawngkaitik tuk hi. Jerusalem ah a tang calam na innkua ten uh a, khangno deuhte cu ngal tei khutin thi haw tuk hi.
22 Mahnung ten keima bawl bangkekin bawlbok tuk uh ci. Na mai uh khuh tukma uh ci; mithi ngai tei eihmi cu ei tukma uh ci.
23 Mithi ngai tukma uh ci, a kah hei kah tukma uh ci. Lukhuh ngawlin le ke thacang tuah pualamah tul pahsuh un. Na sualnak uh hangin na taksa uh kiam susuk tuk a, tau ngeldun li tuk uh ci.
24 Noh tei ca in keimah cu sialsiahnak hi tung a, ka bawlmi hempoh hi bawlbok tuk uh ci. Topa in hi thute a kimtik ten Topa ka hihlam cu thei tuk uh ci, tin hilh ing.”
25 Topa in, “Mihing pa, Ezekiel aw, amu lak pen a kho zetmi Biakinn, a sunsakzet haw mi, sunglawi zetin, a zoh nuam haw mi le a zot nuamzet haw mi Biakinn cu laksak tung hi. A canu le capate vang laksak khawng tung.
26 Mahti bangin ka bawl ni ten, mah siatsuahnak pen a luattu pa kha khatin mah thu cu nangmuhte hilh haw tuk hi.
27 Mah ni ten na ot theih ngawlnak cu pai tuk hi; awnleh thei tuk ci, a luattu lakah awnleh thei tuk ci. Mipi tei ca in sialsiahnak hi tuk ci, mahten Topa ka hihlam cu thei haw tuk tin,” ti hi.