22
Jerusalem Sualnak
1 Topa in,
2 “Mihing pa, Ezekiel aw, mi thattute tei umnak khuapi ah thukhen tukin tuangtim toh a cim? Ningdelhhuai na tampi a bawlte hi ciang zetin, a lakah hilhin hi.
3 Cungnungbel Topa keima otmi hi hilhin: na mihing tampi thatin le milim bia in, na nawngkaitik duncop hangin na hun heng pal tuk hi.
4 Mithatin, na bawlcawmmi na milimte tuah na nawngkaitik duncop hangin na hun cu bo pal tuk hi. Mah hangin miphun tei cekpan bawlnakin le ngam tampi tei zotsak tukin bawl ing.
5 Daantin na neih ngawl hangin ngam khawla le a nai ti ngawlin a nautat lih haw hi.
6 Israel hotu ten amu zaangtha muangin mithat haw hi.
7 Khuapi sungmi ten nu le pa upattu um haw ma toh hi. Ngamdang mikhualte zolin, meivong le nu le pa nei ngawl tei hum pen nemcuamnak zei uh ci.Ref 22:7 Suah 20:12; 22:21-22; Daan 5:16; 24:17;
8 Mun thiangthote imah simsial ngawlin Sabbath vang cang ma uh ci.Ref 22:8 Thiam 19:30; 26:2;
9 Mi khenkhat ten mi that nuamin zolthu son haw hi. Mi khenkhat ten biakpiaknak cik ei haw hi. Mi khenkhat ten amu tisa deihnak bek kimtik tukin ngamta haw hi.
10 Mi khenkhat cu a pa haw i zi tuah zaukawm haw hi. Mi khenkhat ten numei tei thi neih laih hei kinmawh ngawlin sualpih lo haw hi.Ref 22:10-11; Thiam 18:7-20;
11 Mi khenkhat cu nupa sualnak bawl haw: midang ten a monu haw le a pa haw i canu hihen zolin, sualpih haw hi.
12 Nangmu lak pen mi khenkhat ten sum deih leita in mi that uh ci. Mi khenkhat ten a unau Israel tei lakah sumputikin, a khang la in le amet zei in hau haw hi. Kei cu thei khaleh haw ma toh tin,” Cungnungbel Topa in hilh zo hi.Ref 22:12 Suah 22:25; 23:8; Thiam 25:36-37; Daan 16:19; 23:19;
13 “Nguca in, mi na thah uh hangin ka khuttum tuah cuum tung.
14 Mahti bangin ka bawl ngangai ni ten cahnak le ngalphatnak nei ung tin maw na ngaihsut uh? Keimah Topa in hilh zo ing a, ka thu cu kimtik tung hi.
15 Na mihing uhte cu miphun dang tei lakah le ngam dadangah khen khek khawng tung a, thilpha ngawl na bawl uhmi cu botik tung hi.
16 miphun dang ten thangnautik haw tuk naven noh ten Topa ka hihlam cu thei tuk uh ci, tin,” ti hi.
Thiantiknak Pummei
17 Topa in,
18 “Mihing pa, Ezekiel, Israel mite hi ka ca in man tak haw ma. Thik-ek bang haw hi: pumsutu in pumsuknak mei sung a zamta mi ngun, daal, hak, thik le suan tei ek bang haw hi.
19 Mah hangin Cungnungbel Topa keimah in, nemcuamnak nei haw ma tih cu atu-in hilh ing. Jerusalem ah sam khawng tung a,
20 ngun, daal, thik, suan le hakte pummei sungah a khopkhawm haw bangin hulawm tung. Pummei sungah a tuitik haw bangin bawl tung. Ka thinuknak le kan thin pulhannak tuah zungtik khawng tung.
21 Hi zuh hi, Jerusalem ah khawm tung a, meilamin ka thinuknak tuah na nuailam uh pen huhto in zungtik khawng tung.
22 Pummei sungah ngun a zungtik haw bangin Jerusalem ah zungtik tung a, mahten Topa i thinuknak thuak ung hi tih cu thei haw tuk,” ti hi.
Hotu Tei Sualnak
23 Topa in, hi bangin hilhleh hi.
24 “Mihing pa, Ezekiel aw, Israel mite cu hilhin: a ngam haw thiangtho ma, mah hangin ka thinukin bawlsia tung.
25 A hotute cu a matsa haw ngamsa tei humah a thum limi kiosa bang haw hi. Mi thatin, a ngah theih haw zahin, sum le nate laksak haw a, mi a thah haw hangin numei tamzet cu meivong suaktik haw hi.
26 Thiampi ten ka daan palcatin, na thiangthote upat haw ma. A thiangmi le a nawngkaimi deidan thiam haw ma hi. A thiangmi le a nin, a dangdunnak zilh haw a, Sabbath vang imah simsial ngawlin Israel miten keimah upat haw ma hi.Ref 22:26 Thiam 10:10;
27 Acozah bawite cu a matsa haw ngamsa a botkek litu cingne hang bang haw hi. Nei nuamin, mi that haw hi.
28 Pang cu si ngo a noih haw bangin a sualnak haw cu profet ten noih sak haw a, profet ten muhnak man ngawlmi le hilhhamnak man ngawlmi tuah thuthan haw hi. Cungnungbel Topa i thu hilh ing ti haw naven Topa keimah in, a lak hawah thuhilh awng mang.
29 Mihau ten mizolin, mi thil lonsak haw hi. Ca-ngah cimkhamte siatsuahin, ngamdangmi tei humah metnak zei haw hi.
30 Kulhtian a tiang theitu tuk mihing mu mang; phialetnak munah a ding theitu le ka thinukin ngam buppi siatsuah tukin ka tum laihin ngampi a pan theitu tuk mihing zei li na vengin pa khat hei mu mang.
31 Mah hangin ka thinuknak cu a hum hawah buak tung a, a ngamtat dan haw hangin ka thinsonak mei tuah siatsuah tung,” ti hi. Cungnungbel Topa in hilh zo hi.