21
Topa i Ngalnam
1 Topa in,
2 “Mihing pa, Ezekiel aw,” Jerusalem hi siatson hetin! A pathian dang biaknak munte siatson li pohin hi. Israel ngam hi ngallinnak pia inna,
3 Topa keima otmi hi hilhin: Keimah hi na ngal uh ing. Ka ngalnam suahin mipha ngawl hihen, mi pha hihen that khawng tung.
4 Saklam pen hanglam tian mi hempoh humah ka ngalnam mang tung hi.
5 Keimah Topa in, ka ngalnam dawk zo ing, a kawng sungah thiatleh tukma toh ing tih cu akua na bangin thei haw tuk hi.
6 “Mihing pa, Ezekiel aw, thasia le lungmu kehzan khawng tuk bangin tau in hi. Mi hempoh tei muh theihnak tuk munah thasia zetin tau ua-uah li in hi.
7 Ita tauli cim tin, a dong haw tale thusia a heng tukmi hangin tau ing hi, ti in hi. Mah thusia a hen ngangai ten a lungmu haw cu launak tuah dimin, a khut haw khazet tuk a, ngalhannak a neihmi hempoh vang bo khawngin, a khuk haw hing tetek tuk hi. Mah hun cu heng zo,” ti hi. Cungnungbel Topa in hilh zo hi.
8 Topa in,
9 “Mihing pa, Ezekiel aw, profet na hih bangin phuang tulin inna, Keimah, Topa i otmi hi mipi lakah hilhin:
Ngalnam, ngalnam pa khat cu
hiamzet tatin, de zetin
nawt haw hi.
10 Mi thahnak tukin tah hiammi hi;
Khuaphelep bangin
de zawzok tukin nawtmi hi.
Kuamah in nop
ti haw tukma,
itahim titale ka mihing ten,
ngallinnak piakmi le
bawlsiatnak hempoh cu,
Imah simsial haw ma hi.
11 A Manlangin man theih tukin
ngalnam cu nawt haw hi.
Mi thattu khut sungah koih tukin
tat hiam sa hilhial haw hi.
12 Mihing pa, Ezekiel aw,
na thasia in tau li in,
hi ngalnam hi ka mihingte
thahnak tuk tihmi hi.
Israel hotute thahnak tuk ti haw hi.
Ka mihingte tuah thah cih
a hih haw tuk hangin
thasia ngunguihin,
na awm cumdunin hi.
13 Ka mihingte khingkhai ing a,
a sualnak haw a sik nuam
haw ma tale, hi thilte hi
a hum hawah heng tuk hi.
14 “Mihing pa, Ezekiel aw, profet na hih bangin atu-in phuang tulin hi. Na baibeng inna, ngalnam tuah nangmah cu sat li tuk hi. Mi thattu nam le lautiktu nam hi a, mi sattu nam hi.
15 Ka mihing tei a ngalphatnak haw botikin lumtik hi. Khuaphelep bangin a de zawzokmi ngalnam tuah mithat tuk mansa in, a khuapi haw cu zuan ing.
16 Maw ngalnam, taklam le veilamah sat pepel inna, na heknak tihkimah sat pepelin hi.
17 Kei vang ka baibeng tung a, ka thinuknak cu pai tuk hi. Keimah, Topa in hilh zo toh ing,” ti hi.
Babilon Kumpi i Ngalnam
18 Topa in,
19 “Mihing pa, Ezekiel aw, a ngalnam tuah Babilon kumpi i hun theihnak tuk lampi pa nih tuah tiamtehin hi. Mah lampi pa nih cu ngam pa khat pepan tuk hi. Lamkakah tiamtehnak khuam phutin hi.
20 Pa khatin Ammon khuapi Rabbah hawhnak lampi lakin, a dang pa khatin ngal kulhtian tuah upmi Judah khuapi Jerusalem lampi lak tuk hi.
21 Babilon kumpi cu lamkakah ding hi. Ilai lampi zui tuk hing ngim tih theihnak tukin thalcang hing li zo hi: milimte thu dong hi, a milimte thu vaisiampihin biakpiaknak sathin le nitkhate zo hi.
22 ‘Jerusalem’ tin, ngatmi a thalcang cu a taklam khut tuah len hi. Mah thalcangin kulhtiante vahkehnak tuk, ngaldo ten au tuk thu, kongkhahte phialetnak tuk, ngal kulhtian sangin sang saw in, lei tian tuk thute le taitan dawh tuk thute hilh khawng hi.
23 Lungkimnak laikhet a bawl zo haw toh hangin hi bangin thu piang tuk hi tih cu Jerusalem miten um haw ma hi. Mahnaven hi bangin cang ngangai tuk tih cu a sualdan haw theihtiknak le ngal tei matmi a hih haw tuk ngallin piak hamnak hi.
24 Hihi cu keimah Cungnungbel Topa i ka otmi hi. Na sualnak uhte lang khawng zo. Na mawhdan uh cu mipi theih hi zo hi. Lawlmi hi zo uh ci a, na ngal tei khutah pia tung hi.
25 “Nang mipha ngawl, mi nawngkai, Israel hotu, dantatnak nungdawlbel na thuaknak tukin heng li toh hi.
26 Cungnungbel Topa in keimah in hilh zo ing. Na kumpi lukhu le na lupawng cu vawkin hi. Tumasuan bang imah umleh tukma toh hi. Ca-ngah nautate cu thuneihnak dinmunah dangto in hi. Mi uktute nuailamah khesuk khawngin hi.
27 Siatlalnak, siatlalnak! Hi zuh hi, khuapi cu siatsuah khawng tung. Mahnaven hi khuapi bawlsia tukin ka tenmi uktu a hen laih ngawl sung cu hi thil piangtukte hi kim hih ngawlin, a kim ten a khutah pia tung.
Ngalnam le Ammon Mite
28 “Mihing pa, Ezekiel aw, profet na hih bangin phuang inna, Israel a zawnsaktu Ammon mitei lakah ka otmi hi thanin hi. A lak hawah:
“Ngalnam cu mithat tukin
dawh sa in um hi;
Khuaphelep bangin de zawzok tukin
mithahnak tukin
nawt ciangmi hi.Ref 21:28-32 Jer 49:1-6; Ezk 25:1-7; Amos 1:13-15; Zef 2:8-11;
29 Muhnak na neih uhmi cu zolthu hi; mailam thu na hilh ham uhmi cu a thawnthong hi. Mipha ngawl le mi sesuak ngangai hi uh ci, na thuaknak tuk uh ni nungdawlbel dantatnak na thuaknak uh ni cu heng li toh hi. Ngalnam tuah na ngawng uh sat tuk hi.
30 “Na ngalnam uh cu a kawng sungah thiatleh un. Na semsuahnak uh mun le ngam pen na thu uh khen tung.
31 Meiling bangin ka thinuknak na hum uhah ka leihsuk ten ka thinuknak thuak tuk uh ci. Mi siatsuah a thiambelte, hehpihnak a nei ngawlmi tei khutah pia tung.
32 Mei tuah siatsuah khawng hi tuk uh ci. Na thisan uh cu ngam sungah luangin, kuamah in noh cu theileh haw tukma toh tin Topa in hilhin,” ti hi.