20
Mihing Ten Pathian Deihnak El
1 Thawng ka taknak uh kum salih kum, ha nga ha, ni sawm ni-in, Israel hotu khenkhatte cu Pathian i deihnak thei nuamin le thu vaisiam tukin ka lakah hung haw a, ka mai ah khung haw hi.
2 Topa in ka lakah,
3 “Mihing pa, Ezekiel aw,” hi tei lakah Cungnungbel Topa i ka otmi hi na hilhin hi: ka deihnak dong tukin hung hi ma uh cim? A nungmi Pathian ka hihnak min salin hilh ing: ka lakah imah ngen thei tukma uh ci. Cungnungbel Topa in hilh zo ing.
4 “Mihing pa, Ezekiel aw, a hum hawah thukhennak soncat tukin mansa in um cim maw? Na mansa ahi tale bawl nawmin hi. A pa haw ten ningdelhhuai a bawl haw mi hi theitikin hi.
5 Ka hilhmi hi theitik inna: Israel ka ten laihin, a lak hawah thutiamnak bawl ing. Izipt ngam pen a lak hawah lang ing a, ‘Keimah hi na Topa uh ing hi,’ tin hilh ing.Ref 20:5-6 Suah 6:2-8;
6 Mahlai in Izipt ngam pen tulpih tung a, amu ca in ka ten sami khuinawi le khuaitui luannak ngam, ngam hempoh lak pen ngam phabelah hawhpih tung hi tin thutiam ing.
7 Keimah hi Topa a Pathian haw ka hih hangin a deihzet haw mi ningdelhhuai milimte cu vawk tukin le Izipt tei pathiante tuah amuh le muh mi nawngkai in bawldun tuk ngawlin hilh ing.
8 Mahnaven ka thu cu dodalin ngai nuam haw ma hi. Ningdelhhuai a milimte cu vawk ngawlin Izipt pathiante vang zamsan cuang haw ma hi. Ka thinuknak cu Izipt ngam pen nase zetin thuak tukin ngaisung zo ing.
9 Mahnaven thuak lehtik mang, itahim titale a umnak haw Izipt ngamsung mihing tei mai ah ka minsia sual kawn ti ing. Israel tei lakah Izipt ngam pen puitul tung hi tin than ing.
10 “Izipt ngam pen phillawn sungah pui ing.
11 A thu a zuitute a nunnak haw tukin ka thukhamte pia ing a, ka daante zilh ing.Ref 20:11, 13 Thiam 18:5;
12 Ka laklawh uh a, thutiam sialsiahnak tukin le keimah hi amuh thiangthotiktu a Topa haw ing tih theihtiknak tukin Sabbath ni cang tukin thupia ing.Ref 20:12 Suah 31:13-17;
13 Mahnaven phillawn ngam sungah vang keimah langpang leleng haw hi. A zuitu tei lakah nunnak a hengtiktu ka daante siatsuahin ka thupiakmite lawlin Sabbath ni palcat haw hi. Phillawn ngamah ka thinuknak nasezet a thuak hawnak tukin le amuhte siatsuah tukin ngaisung zo ing.
14 Mahnaven bawlsuak mang, itahim titale Izipt ngam pen Israel ka puitul a mutu miphun tei lakah ka minsia kha kawn ti ing.
15 Mah hangin khuinawi le khuaitui luannak ngam, ngam hempoh lak pen ngam phabel ka piakmi ngamah henpih tuk mang hi tih baanzakin thutiam ing.Ref 20:15 Mipum 14:26-35;
16 Ka thupiakmi lawlin ka daante siatsuah haw hi. Sabbath palcatin milim bia tuk a nuam saw haw hangin hi bangin thutiam ing.
17 “Mahnaven a hum hawah hehpihnak nei lehin, phillawn ngam pen that khawng ngawlin um ing.
18 Amu lak pen khangnote cu: Na pu le na pa tei a bawl haw mi daante zui pahsuh un, a nunphung haw vang cung pahsuh unna, a milimte tuah vangin nawngkai kawm kha pahsuh un tin, ngallinnak pia ing.
19 Keimah hi Topa na Pathian uh ing. Ka daan le ka thupiakte zui un.
20 Sabbath ni cu ni thiangtho in bawl unna, mahten thutepnak a bawl uhmi sialsiahnak hi tuk a, Keimah hi Topa na Pathian uh ka hihlam a theitiktu hi tuk hi, ti ing.
21 “Mahnaven mahlai khan a mihingte vangin keimah langpang leleng haw hi. A zuitute cu nung haw tuk ka tihmi ka daante le ka thupiakmite cu siatsuah haw hi. Sabbath vang palcat haw hi. Phillawnah ka thinuknak nasezet thuak tukin le that khawng tukin tum zo ing.
22 Mahnaven bawlsuak mang, itahim titale Izipt ngam pen Israel minamte ka puitulnak a mutu miphun tei lakah ka minsia sual kawn ka tih hang hi.
23 Mah hangin thutiamleh ing. Leihum buppi ah khen khek khawng tung tin tiam ing.Ref 20:23 Thiam 26:33;
24 Ita hi bangin bawl kam ing titale amuh ten ka thupiakmi lawlin, ka daan siatsuah haw, Sabbath palcatin, a pu le pa tei nadeh sakmi milimte bia leleng haw hi.
25 Mah i hum pen, amu ca in, a pha ngawlmi daan le nunnak a pia thei ngawltu thute pia ing.
26 A milim biaknak haw tuah nawngkai kawm haw in, a capa tawntil biakpiaknak a man haw vang kham mang. Amuh bawlsiatnakin le keimah hi Topa ing hi tih langtiknakin hi bangin bawl ing.
27 “Mahten mihing capa, Cungnungbel Topa keimah in, Israel tei lakah ka otmi hi hilhin: A pu le pate muantak ngawl a hihnak haw hangin keima minsiatik haw hi.
28 A lak hawah piak tukin ka tepsami ngamah pui ing. Mahnaven mualsang le thinghing amuh haw sial ten biakpiaknak bawl pepel haw hi. Biakpiaknak a haal haw mi le sabittui a piakmi haw ten ka thinuktik ngangai haw hi.
29 Na hawhnak uh a, na colh mun uhte hi i kaw? tin dong ing. Mah hangin mah munte cu ‘Bamah’note 20:29 Bamah tihmi cu a sangmi mun tihnak hi a, Na hawhnak uh tih tuah bangten hi Um ngawltute a pathian biaknak mun hi a, Israel miten kham haw hi. tin tutian sam haw hi.
30 Ka otmi hi Israel mite hilhin hi. Ita na pu le pa tei sualnak a bawl haw mi cu bawl bokin a milim haw lakah a taksa haw tian a piak haw bangin na piak nuam bok uh?
31 Tuni tian pia laih uh ci, mah milim lakah na cano uhte nangawn mei ah halin, biakpiaknakah mangin nawngkai copdun uh ci. Mah nungten noh Israel mite hungin, ka lakah na deihnak ikaw? tin ti laih uh ci. A nungmi Pathian ka hihnak min salin hilh ing: Imah dong thei tukma uh ci.
32 Miphun dangte bangin um nuamin, ngamdang a um thing le suang a biatute bangin um nuam uh ci; na lungmu sungah ciang zo hi. Mahnaven mahtih bangin um awng tukma hi.
Pathian Dantatnak le Ngaihdamnak
33 “A nungmi Pathian Cungnungbel Topa Keimah in, ngallinnak pia ing: Ka thinuk thahin, ka baantha ngilnak le ka huham hempoh tuah uk tung hi.
34 Ka khenkheknak miphunte le ngamte pen kiklehtik tung a, ka baantha ngilnak, ka huham le ka thinuknak tuah khawmleh tung hi.
35 ‘Miphun tei Phillawn,’ ah pui tung a, na mitmuh uhin, na thu uh khen tung hi.
36 Na pu le pa uhte Izipt ngam Sinai Phillawn a thu ka khen bangin nohte vang thukhen bok tung tin, Cungnungbel Topa in ti hi.
37 “Na nuam uh bangin phe thei tuk ngawlin uk tung a, ka thutiam zui hihim tukin bawl tung.
38 Nangmu lak pen langpang le mi dodalte cu lawl tung. Atu a umnak ngam haw pen tultik tung, mahnaven Israel ngamah kiktik tuk mang. Topa ka hihlam thei haw tuk hi.”
39 Cungnungbel Topa in, “Israel mite, tho unna, hawh un, na milim uhte cu na nuam uh bangin bia un! Mahnaven atu-in ngallinnak pia ham ing hi: hi bangin na bawl celh nung uhten ka thu na zui uh kul tuk hi; na milim uh lakah biakpiaknak bawlin ka min thiangtho cu siatik toh pahsuh un hi.
40 Mah ngamsung ka mual thiangtho, Israel ngam a mualsang humah Israel mi na venghawng uhin Keimah bia tuk uh ci. Na hum uhah ka lungdam tuk a, ka lakah na piak uhmi a phabel, na biakpiaknak uh le na laksawng thiangtho uhte pia tukin muang tung hi.
41 Nohte ka khenkheknak ngamsung pen suahin munkhatah ka khopkhawm ten, halkang biakpiaknakte cu sang tung a, miphun hempoh ten a thiangthomi ka hihlam cu mu haw tuk hi.
42 Na pu le pa tei lakah piak tukin ka tepsami Israel ngamah ka kik pihleh ten Topa ka hihlam cu thei tuk uh ci.
43 iti zahin ningdelhhuai nate bawlin nangmuh le nangmuh na nawngkai tikduncop lam uh cu theileh tuk uh ci. Thilpha ngawl tampi na bawl uh hangin nangmuh lala ningdelh duncop tuk uh ci.
44 Ka min hup tukmi thil ka bawl ten na phatngawlnak uhleh na sualnak uh zahin nohte cu siatsuah mang hi,” tin Cungnungbel Topa in ti hi.
Hanglam Mei-alh
45 Topa in ka lakah,
46 “Mihing pa, Ezekiel aw, hanglamah hek hemin! Hanglamah langpannak thu hilh inna, hanglam Negeb tupi humah na langpannak thu cu phuangin hi.
47 Cungnungbel Topa i otmi cu hanglam tupi lakah hilhin hi. Zo in! Keimah in meilam tung a, thingkung a ko hihen, a hing hihen na sung a um thingkung hempoh kang khawng tuk hi. Kuamah in cuhmit thei haw tukma hi. A bul pen huhto tuk a, mi hempoh ten thuak haw tuk hi.
48 Topa keima halmi tih cu mu haw in, kuamah in cuhmit thei haw tukma,” ti hi.
49 Mahnaven keimah in, “Cungnungbel Topa, mahti bang cu thuaktik zal pahsun. Mi hempohin amah cu tehkipnak bebek tuah awn hi tin, ka humah phu li haw,” tin ti ing.