12
1 Na khanno laihin, a semsuahtu phawkngil pahsun;
Kum le nite letin,
“Lungnopnak nei ma toh ing,”
tih laih ngawlin le;
haksatnak ten
a phat haw laih ngawlin.
2 Ni le hade le aksite a thim haw
laih ngawlin le,
meinimin, nguah ngeh a cawisuk
laih ngawlin.
3 Mah hun ten himnak pia thei mektu na baante can dedelin, a ngilmi na ke hei nawmtam haw tuk hi. Na an thainak tukin na hate demzet haw tuk toh a, na mit mangin, khua mu ciang thei tukma toh ci.
4 Na bengbulin, imah za tukma toh ci. Cangngawi nging le tum ngingte hei za cacang tuk ci; mahnaven vano ham hei in, na hihbuhnak pen khanglotik thei haw tuk hi.
5 Lamto ah ke tuah hawh cu na ca lauhuai tuk hi. Na puakpakin, khin zo cacang tuk ci a, hazawlnak na neih lihmi hempoh pai khawng haw tuk hi.
Kohte cu kumkhua ka umnak tuk uh munah hawh tuk ung a, khuasung lampi ah kahnak aw nging tuk hi.
6 Ngun taicin cu catin, sui mei-inn tu buabual tuk a, keh tuk hi. Tuicawinak khau hempoh catin, tui thunnak beel keh khawng tuk hi.
7 A pumpi uh cu lei ah kiklehin, a hawvang uh cu a piatu Pathian nelah kikleh tuk hi.
8 Imah ngawl, phukthong, ihempoh hi imah ngawl ngihngeh haw hi, tin Thuhilhtu in ti hi.
9 Thuhilhtu in, a cihnak tuah a theihmi cu mipi lak zilh pepel hi. Thupaucap a tuatuam a theihmi cu dongkanin, ciangtik pepel hi.
10 Mi i ngaihnop tukin thuhilhin, a ngatmi thu vang cu thuman hi.
11 Micip tei awnkam cu tuucing pa in, tuu cinnakah a manmi ngolh hiam bang hi. Thupaucap khawl khawmmi cu khim zetin, khetmi tawngkhen bangin kho leleng hi. A venghawng uh i tuucing ahi mi Pathian i piakmi hi.
12 Ka capa, ngalling kulmi umlaih hi: laingat lih hi celh tih umma, lai zoh leleng hei hi, tisa in thuak zo ma.
13 Hithu hempoh i humah hilh tuk pa khat bek um hi. Pathian kihca inna, a daan zui in hi. Pathian in mihing a bawlnak sullam cu ahi ca in hi.
14 Pathian in ihempoh a bawl uhmi humah thukhen tuk hi; a pha hihen, a sia hihen, a kuhno in, a bawl uhmi hum tianin thukhen tuk hi.