SOLOMON LA
(The Song of Solomon)
Thulamsial
Solomon La hi lawm lakam hulawpmi hi a, a tam saw cu tangval le khanglai tei phuahdun sannak lam ngeh hi. Solomon La tin a min piaknak cu Hebru awnin, a ngatnak hawah Solomon La tin a ngat haw hangin hi.
Hi la hi khanglai le tangval ihdunnak la khawl khawmmi hi. A tambelah pano in numei a don lehmi la le numei in pano a donkiknak la hi.
Hih la hi Judah miten Pathian le mihing a pehzom uh dan langtiktu lim hi tin um haw hi. Khristiante hei in Khrih le a pawlpi pehzomnak lim hi tin ti bok haw hi. Mahnaven “Pathian” tih awn kamcang um ngawlin “Khrih” ahimata “Khristian” tih awn kamcang hei umma hi. Hebru mi (Israel mi) le Judah mitei khanglai le tangval ngaihnak la hi, tin Bible lam thiamsang tam saw ten um haw hi.
1
1 La hempoh lak pen la lembel,
Solomon i la mawibelte:Ref 1:1 1Kum 4:32;
La Cing Khatnak
Numei
2 Keimah na thut ahin awi ing,
na itnak sabit sang hum.
3 Na noihmi zimuino nam,
na len min zimui bua bang,
Zozaam tei, ngaih cuangno ci.
4 Na khut momno tuah
len pah ni ci,
ngaihno taikawm pah nung.
Ka bawimang hi pah ni ci,
na zaunakah zuan pah nung.
Munkhatah nopzetno in,
sungdunnak tiam thahin,
itdunnak tuah
diatdun leng pah nung.
Zozaam tei, ngaihmawh
viang ngawl.
Na thuang cawmno cu maw!
5 Jerusalem zozaamte aw,
ka hang hei in,
ngaihbaangzet leng poh veng,
Kedar deubuk bangin
hang naveng; ka thim hei in,
Solomon inn
puanzak sangin,
mawi saw laih poh veng.
6 Ka hang hei in, iangleh kha
pahsuh unna,
kawlni zaangkang i haang:
Ka tuaite thinukin, a
sabit huanah na a dehtik tak cu;
ka pumpi bawlphat hun
nei mang.
7 Hilh inna, ka ngaihno aw,
na tuu tei tatnakno cu?
Sun ni zaangkang sungno in,
thullim nuai ilai munah?
Na val pih tuu tei elah,
ngaihno cuan li
8 Zozaam cam laklawh pen,
ngaihno mawibel ci?
Hawhnak na thei ma tale;
zui pah ni ci,
tuunote mu tuk poh ci,
na keel ca in,
tuucing buk elah hamdawn.
9 Teh li ing, ka ngaihno aw,
kumpi cipuhleng doktu
cipuh la bang kek si tin;
cipuh cang lungthotik
bangin, khausa lungthotik ci mei.
10 Mawi leita thong ka ngaihno,
na saisam phek ngaihbaang
lawlawm; na sui long-awh
manpha suang tuah
11 Ngun khu huh manpha sui
lawngawh cu
nata tuk lempah nung.
Numei
12 Ka bawimang zau laihno khi,
ka namtui zimui in zel.
13 Ka zalngaih murano nam,
ka ang sung a zau laihno
khin hi.
14 Lung ka tup belmi cu
Engedi sabit huan pomi
hampa lak a,
15 Cuan hih nang ka cuno thuang,
mawi leita lokhuno bang,
na mai mit silselno.
Numei
16 Ka lungkuaibel ngaihno,
soncim theih ngawl
valdang lak pen!
Lenlung kuaibel cei,
zaunak hingham mang nung.
17 Oh dong lam tuk cu maw,
inkaanah sidar thingin,
a siling cak thing.