11
Micip Tei Ngamtat Dan
1 Sum bawlnak tukin na sumte mangin,
Ni kha khat ten
a met ngah tuk ci.
2 Na neihmi cu khen salih
ahimata khen liatah khenin,
Leihumah iti bang thusia heng tuk hum
tih thei ham ma ci.
3 Meinimin, nguah a pua tale,
leihumah buaksuk tuk hi,
Thingkung cu hanglamah hihen
saklamah hihen a tuk ten,
A lupnak mun pohah tang hi.
4 Huih bek a zo ten anci cing haw ma,
Meinim bek a zo ten
an cawm awng tukma.
5 Numei i pum sung a paimi nauno,
Iti bangin nunnak bul pan tih
na theih thei ngawl bangin;
Ihempoh tithei Pathian i
nadehnak cu thei zo ma ci.
6 Zinglamah anci cing inna,
taklam tian cawl pahsun;
Iti bang po pha tuk tih thei ma ci;
A pa nih haw in,
khang haw tuk maw tih hei
thei ma ci.
7 Khuavak cu phazet hi,
Ni al muh hei hi nop hi.
8 Mi pa khat kum ngeipi a nung tale
Lungdam leleng hen.
Mahnaven a thih ten khuathim cu,
a ca in, sauzet tuk tih
cinglengin hi.
Mailam ca muansan tuk
umma hi.
Khangno Tei Ca Nunhilhnak
9 Khangnote aw, na khanno laih uhin
lungdamin um un;
Na khanno lai hun hi
komzetno in mang unna,
na lungmu deihnak le, na mitin,
a puinakah zui in hi.
Mahnaven hih thil hempoh hangin
Pathian in, na thukhen tuk,
10 Na lungkhamnakte vawk inna;
na tisa i haksatnakte vawkin;
Itahim titale na khanno hun cu
ngei tukma toh hi.