33
Moses In Israel Hinnamte Muicu Pia
1 Pathian i mihing Moses in, a thih laih ngawlin hi bangin Israel tei humah muicu pia hi:
2 Topa cu Sinai Mual pen
hung hi;
Ni bangin Edom hum pen tulin,
Paran Mual pen
a mihing tei humah lang hi.
A lakah vancungmi thawng sawm
um haw in,
a taklam khutah mei alh cawi hi.
3 Topa in, a mihingte cu it in,
ama sung a, a umte humhim hi.
Mah hangin a kebulah kunin,
a thupiakmi ngai ung hi.
4 Moses i piakmi Daan cu zui un hi.
A hinnam uh i sunloihbelmi cu pia hi.
5 Topa cu a mihing Jeshurun tei
kumpi suak hi.
Israel hinnam le hotu
6 Reuben hinnam cu
hi bangin muicu pia hi:
“Reuben hinnam cu
cimit zal pahsuh hen,
A mihing demzet haw naven,” ti hi.
7 Judah hinnam cu hi bangin
muicu pia hi:
“ Topa aw, bop a ngetnak
haw aw cu za inna,
Israel hindangte tuah khawmin hi.
Topa aw,
a khut khohtik inna,
a ngal haw do sakin hi,” ti hi.
8 Levi hinnam cu hi bangin
muicu pia hi:
Topa aw, Levi mi nelah
na Thummim pia inna,
thuman mitei humah
Urim cu pia in hi.
Muantak na mihingte haw hi.
Massah ah khingkhai zo ci,
Meribah tui ah zuam zo toh hi ci.Ref 33:8 Suah 17:7; 28:30; Mipum 20:13;
9 Nangmah saw belhnak mang haw,
a nu le pa tei lakah:
imah simsial ma ung ti haw hi.
A u le nau thupi sa haw ngawlin,
Amu cano hei thei nuam haw ma.
Mahnaven na thu cu zui haw in,
Na thutiam cu phazetno in
cingkhawi haw hi.
10 Na thupiak cu na mi Jakob lakah
zilh haw tuk a,
na daan cu Israel mi lakah
zilh haw tuk hi.
Na maiah namtui biakpiaknak
bawl haw tuk a,
na biaklandawhah halkang biakpiaknak
pia haw tuk hi.
11 Topa aw, a nadehnak
haw humah thupha pia inna,
a khut thiamnak haw humah
na lungdam zalin hi.
A ngal tei elnguh vat inna,
tholeh tuk ngawltohin,
amuh a ngaltu le a huatu,
a ngal haw cu ngawizanin, tin ti hi.
12 Benjamin hinnam cu
hi bangin muicu pia hi:
“Hi hinnam cu Topa i deihmi hi in,
lungmuangno in cawl hi.
Pathian amah in sun thaleng cingkhawi in,
a mi laizangah um hi.”
13 Josef hinnam cu hi bangin
muicu pia hi:
“ Topa in, a ngam haw cu
van daita tuah muicu pia zal tahen.
Leinuai a tuikhal hei in,
nawngtikin muicu pia tahen.
14 Ni i mintikmi thingngah le,
Ha sial a hunkim ten a ngahmi
thingngah phabel tuah dim hen.
15 Kumkhua a kho mi
a mualsang haw cu thingthei
ngah nuamnak tuah dim hen.
16 A ngam haw cu lei pen a suakmi
thilpha namkim tuah dim tahen.
Sawlcaam kang sung pen a awntu,
Topa i phatnakin diat zal hen.
Hi muicu cu Josef lu humah
heng hen.
Itahim titale a unau tei lak pen
puitu hi.
17 Josef ngilnak cu sunglawi in,
a zaangtha cu khuicang bang hi,
A ki cu Manasseh mi a thawng a thawng le
Efraim mi thawng sawm bang haw hi.
Mah a ki tuah hinnam tampi khi in,
Leipi mawktian nawkvawk hi,” ti hi.
18 Zebulun le Issakhar hinnam cu
hi bangin muicu pia hi:
“Zebulun cu tuipi humah sumbawlin,
a hawh le vahnak pen
lawhting zal hen;
Issakhar cu inn pen
a hauhnak pung tahen.
19 A mualhum hawah
hinnam dadang zawm haw in,
Mahlaiah a dikmi biakpiaknak
bawl haw hi.
Tuipi pen hauhnak ngah haw in,
Tuipi mawk tuan philnel lak pen
ngah haw,” ti hi.
20 Gad hinnam cu hi bangin
muicu pia hi:
Gad ngam zal zetin, a bawltu,
“Pathian cu thangphat un hi.
Gad cu kiosa bang hi,
ei tukin pang hi.
A baan haw le
a lu haw botkek tukin hi.
21 Amuta tukin ngam phabel
teng haw a,
Hotu i dehvo cu piak hi haw hi.
Topa i thukham le daan cu
zui haw,
Israel hotu a tawhdun
khawm haw ten,” ti hi.
22 Dan hinnam cu hi bangin
muicu pia hi:
“Dan cu pawpino hi,
Bashan pen a tulmi
kiosa bangin,” ti hi.
23 Naftali hinnam cu
hi bangin muicu pia hi:
“Naftali cu Topa i mitmaipha
co hi.
A ngam haw cu Galilee tuiting pen
hanglam tian heng hi,” ti hi.
24 Asher hinnam cu hi bangin
muicu pia hi:
“Asher in hinnam dang sangin
muicu tam saw deuh co hi,
A unau tei deihbelmi hi zal tahen.
A ngam cu olif kung tuah dim hen.
25 A khuapi tei kongkhah cu
thik le daal tuah ngeh hi henna,
A nun sung lungmuang zetin
khuasa thei mi
26 Maw Israel mite:
Na Pathian uh bang
pathian dang umma hi.
Vanah huham nei zetin um hi.
A sunloihnak meingo hum pen
nangmuh bawm nuamin hung hi.
27 Topa cu a kumkhua in,
na belhnak uh hi,
Kumkhua in, a baanzakmi cu
na ngai ngap uhmi baan hi.
Mailam na nawt pepel uhten
na ngal uhte cu hawlvawkin,
thah khawng tukin thupia hi.
28 Mah hangin Israel casuante cu
ngimta zetin um haw hi.
Jakob casuante cu lau tuk
imah nei haw ma.
An le sabit tamnak ngam hi.
Van pen leihumah daitatik hi.
29 Maw Israel mite:
Iti zahta in mi bawngpha
hi uh cim!
Nangmuh bang kuamah
um haw ma maw?
Topa i pat tulmi hi uh ci.
Topa amah cu na lumphaw uh le
na naam uh hi.
Noh a pantu le nehnak piatu tukin;
Na ngal uhte cu hehpihnak
ngen tukin hung haw tuk naven,
Na ke nuai uhah
sikpek tuk uh ci.