31
Joshua In Moses Thek
(Mipum 27:12-23)
1 Moses in, a thuhilh cu pehlehin, a lak hawah,
2 “Kei cu kum za le kum sawm nih hi zo ing hi, ka deih bangin bawlleh thei ma toh ing. Mah hum pen Topa in, Jordan Ngun cu kaltan tukma ci, ti bok zo hi.Ref 31:2 Mipum 20:12;
3 Ngam cu na luahtum theihnak tukin Topa na Pathian uh cu na mai uhah hawh tuk a, mahlai a um hinnam cu siatsuah khawng tuk hi. Topa i hilh zo bangin Joshua cu na hotu uh hi tuk hi.
4 Topa in Amor kumpi Sihon le Og nehin, a ngam haw siatsuah khawng tuk hi.Ref 31:4 Mipum 21:21-35;
5 Topa in, a hum haw a, nehnak cu na lak uhah pia in, ka hilh zo bangin a hum hawah bawl tuk uh ci.
6 Ngilzet le ngalpha zetin um un. Hi hinnam cu lau pahsuh un. Na Pathian Topa amah cu nangmuh tuah hawh tatak tuk hi. Nohte cu zamsan tukma, lawl vang lawl tukma,” ti hi.
7 Moses in Joshua cu samin, Israel mipi tei mai pen a lakah, “Ngilzet le ngalpha zetin umin hi. Topa in, na pu le pa tei lak a, thu a tep zo bangin mahlai ngam luahtum theihnak tukin hi mipi a puitu cu nangmah hi tuk ci.
8 Topa amah cu na lakah um tuk a, pui tuk hi. Taisanin zamthong tukma hi; mah hangin na thinnau pahsuh hen, a lau hei lau pahsun,” ti hi.Ref 31:8 Josh 1:5; Heb 13:5;
Kum Salih Ah Vei Khat Sial Tuk Daan
9 Mah hangin Moses in Pathian i daan hempoh cu ngah khawngin Topa i thukham kuang a cingkhawitu Levi mi thiampi le Israel hotu tei lakah pia hi.
10 A lak hawah, “Kum salihah vei khat, Leiba Phiahmai kum a hen sialin, hi Daan cu Puanbuk Puai ai-in nging zetin sial un hi.Ref 31:10 Daan 15:1; 16:13-15;
11 Israel mite biaknak munah Topa bia tukin a hun haw ten a mai haw pen sial un hi.
12 Akua a bangin zain Topa na Pathian uh kihcak a thiam theihnak tukin le a thu a ngaihnak tukin pano, numei, naupang le na lak uh a, um ngamdang mite a venghawng haw in, sam khawm un.
13 Topa na Pathian uh i Daan a thei awng ngawlmi na canau uhte vangin thei haw tuk hi. Jordan ngun ngal ngam luahtumin, a um sung hempoh haw in Topa kihcak thiam haw tuk hi,” tin thupia hi.
Moses Nelah Topa i Thucah Nungdawlbel
14 Topa in Moses lakah, “Ngei nungleh tukma toh ci. Joshua sam inna, Puanbukah hunpih inna, hilh a kulmi hilh tung hi,” ti hi. Moses le Joshua cu Puanbukah hawh haw in,
15 Topa cu a lak hawah meingo tomin, langin meingo tom cu Puanbuk kongka ah ding hi.
16 Topa in Moses lakah, “Nang cu thi pal tuk ci; na thih nungten hi Israel miten amuh tuah thutepnak ka bawlmi cu siatsuahin, numei pha ngawl uire phunin suak haw tuk hi. A luah haw tukmi ngam a, pathian dang bia in, kei cu zam haw tuk hi.
17 Mahti bang thu a hen ten a hum hawah ka thinuk tuk hi, nunghek tung a, siatsuah khawng hi haw tuk hi. Natsia a phunkim a hum hawah heng tuk a, a Pathian haw keimah a lak hawah ka um ngawl hangin hi bangin thuak haw hi, tih cu theileh haw tuk hi.
18 A pha ngawlmi bawlin pathian dadang a biak haw hangin amuh bawm tuk cu tum hihim tuk mang hi.
19 Mah hangin hih la hi nganin hi. A lam hawah tang mang tih sialsiahnakin Israel tei lakah zilhin hi.
20 A pu le pa tei lak a, ka thutepnak bangin hi ngampha le ngamnop, khuinawi le khuaitui luannak ngamah henpih tung hi. Mahlai pen a deihzah haw in, an eih tuk nei haw tuk a, nop zetin um haw tuk hi. Mahnaven nunghekin pathian dang bia haw tuk hi. Kei cu zamin ka thutepte siatsuah haw tuk a,
21 natsia a phunkim a hum hawah heng tuk hi. Hi la cu amuh ka panpih ngawlnak langtiktu in suak tuk hi; itahim titale a casuante vangin a sak leleng haw tukmi la hi. Tu hei in ka tepsa mi ngam a hen haw laih ngawl hei in, a lungmu haw cu ilai lam hek him tih cu thei zo ing.”
22 Mah ni mamah in, Moses in mah la cu ngan a, Israel mite zilh hi.
23 Topa in Nun capa Joshua lakah, “Ngilzet le ngalpha zetin umin hi. Ka tepsami ngamah Israel mite hawhpih tuk ci a, na lakah um tung hi,” ti hi.Ref 31:23 Daan 27:23; Josh 1:6;
24 Moses in Pathian Daan cu lai sungah ngan hi. Pa khatno hei a zamkhak sual umma hi.
25 A ngat ceng ten To pa i Thutiam Kuang cingkhawitu Levi mi thiampi tei lakah,
26 “Pathian i Daan laibu hi la unna, Israel tei hum a, Pathian panpih ngawlnak langtiktu in, Topa na Pathian uh i Thutiam Kuang elah koih un hi.
27 Iti zahin mi lunglian le mi langpang thei hinnam hi haw him tih cu thei zo ing. Ka nun sung hei in, Topa cu hitihzah tianin langpang haw zo hi.
28 Na hinnam uh sung a, hotu upa hempoh cu ka maiah sam khawm unna, hi thu cu hilh khawng tung hi; a lak hawah ka panpih ngawlnak theihpihtu tukin van le lei sam tung hi.
29 Nohte hi ka thih nungten mipha ngawl zetin suak tuk uh ci, ka zilhmi hempoh siatsuah khawng tuk uh ci, tih cu mu leng ing. Topa i kham mite bawlin a thinuktik na hih uh hangin mailam ten haksatnak na hum uhah heng tuk hi,” ti hi.
Moses i La
30 Moses in, a nuailam a la cu sa in, Israel miten kom zetin ngai leng haw hi.