30
Tundin Lehnak le Muicu
1 “Na ten tuk uh thu pa nih: muicu le tamsiatnak pia ing. Hite hi na hum uhah a hen ten Topa na Pathian uhin, a khen kheknak ngamah na um uhten hi ka hilhmi hi theileh tuk uh ci.
2 Nangmuh le na canau uhte cu Topa i lakah kikin, na lungmu uh le na nunnak uh a venghawngin tuni ka piakmi Topa i thukhamte cu zui tuk uh ci.
3 Mahbek ten Topa in, na hum uhah hehpihnak nei tuk hi. A khenkheknak ngam pen kiklehtik tuk a, neinung zetin umleh tuk uh ci.
4 Leihum mawk tianin khenkhekmi na hi uh vangin Topa na Pathian uhin, khawmkhawmleh tuk a,
5 na pu le pa tei umnak ngamah umleh tuk uh ci. Na pu le pa uhte sangin hau sawdeuhin tam vang tam deuh tuk uh ci.
6 Na lungmu uh venghawng le na nunnak uh venghawng tuah na ih theihnak tuk uhin le na nun theihnak tuk uhin Topa na Pathian uhin, nangmuh le na ca tei lakah ama thungai nuamnak lungmu pia tuk hi.
7 Hi tamsiatnak cu nangmuh a huatu le a bawlsiatu na ngal tei humah Topa in hengtik khawng tuk a,
8 tuni ka piakmi a daan le a thupiakmi cu ngai in zuileh tuk uh ci.
9 Nadehnak hempoh pen Topa in lawhtinnak pia tuk a, canau le ngan tampi nei in, na lo sung uh pen an tampi suak tuk hi. Na pu le pa uhte nei nung zetin, a bawl ten a lung a dam haw bangin nangmuh vang neinungzet bawlin, a lungdamzet tuk hi.
10 Mahnaven a thu zilhmite ngatnak hi laibu sung a, um a daan hempoh cu zui in, a thu na ngaih uh kul hi. Na lungmu uh le na nunnak uh cu a venghawngin ama lakah pia un hi.
11 “Tuni ka piakmi daan hi a haksami hi ma hi, na zui theih tuk ngawlmi vang hi ma hi.
12 Sang leita in van khong hi tih hei hi ma hi. ‘A beng uh pen zain, a zui theihnak tukin, akua kaito in eimu ca in kiamsuk tuk kaw?’ na tih tuk uh umma hi.Ref 30:12-14 Rom 10:6-8;
13 Tuipi thuanthum ngalkhat lam, a ummi hei hi ma hi. ‘A beng uh pen zain, a zui theihnak tuk uhin, akua kaw tuipi thuanthum ngalkhat lamah hawhin, a laksak tuk?’ na tih tuk uh umma hi.
14 Naino, na mit uh le na naal el uhah ummi hi a, na lungmu uhin, na theih uhmi vang hi. Na zui tuk uh bek hi.
15 “Tuni in, phatnak le siatnak, ahimata nunnak le thihnak na ten tuk uhin na lak uhah pia ing hi.
16 Topa na Pathian uh i thukham, tuni ka piakmi hi zui in, amah it in le a thu ngai in, a daan na zui uh tale, a khangto mi hinnam ngeng zetin suak tuk uh ci. Topa na Pathian uhin, na luahtum tuk uhmi ngamah muicu pia tuk hi.
17 Mahnaven a thu ngai ngawlin, na lungmu uh lamdang hekin, pathian dadang na bia uh tale,
18 tuni in ciang zetin hilh ing hi, cimit khawng tuk uh ci. Na luahtum tuk uhmi ngam Jordan Ngun ngalah hun sau nung tukma uh ci.
19 Atu-in, na ten tuk uh nunnak le thihnak, ahimata Pathian muicu le tamsiatnak pia ing hi, na ten uhmi theihpihtu tukin lei le van sam ing. Nunnak teng un.
20 Na pu le pa uh Abraham, Isaak le Jakob lakah a tepsami ngamah kum ngeipi nangmuh le na canau uhte a khan haw sau in, na um theihnak tukin, Topa na Pathian uh cu it unna, a thu ngai in, muantak zetin nung un,” ti hi.Ref 30:20 Pian 12:7; 26:3; 28:13;