29
Moab Ngam Pen Topa i Thutiam
1 Moab ngam a um haw laihin Topa in Moses lakah a nuailam a thutiam cu Israel tei lakah hilh tukin pia hi. Hi thutiam cu Topa in Sinai Mualhum pen Moses nelah a piak zo hum pen a piak betmi hi.
2 Moses in Israel mipi cu samkhawmin, a lak hawah, “ Topa in Izipt kumpi humah le a khutnuai le a ngampi humah a bawlmi cu na mit uh tuah mu cikcek zo uh ci.
3 Zamhahzet natsia a phunkim, Topa i bawlmi thasiahhuai na lamdang a phunkim mu zo uh ci.
4 Mahnaven hi na tawh zo uhmi tei a sullam na theih theihnak tuk uhin Topa in zuam li naven thei zo ma uh ci.
5 Topa in kum sawm li sung pikpek phillawn sungah pui in, na puansilh uh le na kedam uhte pa khat hei sia ma hi.
6 Eih tukin cangho, sabittui le beer nei ma uh ci, mahnaven Topa in amah cu na Pathian uh a hihnak na theih theihnak tuk uhin, na kul uhmi hempoh pia hi.
7 hi ngam a, hen uhten Heshbon kumpi Sihon le Bashan kumpi Og in do haw naven neh hung a,Ref 29:7 Mipum 21:21-35;
8 a ngam haw cu la in Reuben hinnam, Gad hinnam le Manasseh hinnam a lang tei lakah pia hung hi.Ref 29:8 Mipum 32:33;
9 Mah hangin na nadehnak tihkim uhah na lawhtin theihnak tukin, hi thutiam cu komzetno in, na zui un hi.
10 “Tuni in, na venghawng uhin, na hotute le na upa uhte, pano,
11 numei le naupang, na lak uhah a ummi na thingtuah uh a com saktu le tui a cawi saktu ngamdang mite tuah Topa na Pathian uh i mai ah ding uh ci.
12-13 Na pu le pa uh Abraham, Isaak le Jakob lakah a tep bangin le nangmu nelah a tep bangin noh cu Topa in ama mihingin, a bawlnak tukin le amah cu nangmu Topa a hihnak tukin tuni in, Topa na Pathian uh i thutepnak sungah tum unna, a tepmi cu pom un hi.
14 Hi thutepmi le deh tuk dehvo cu Topa in nangmu lak bekah bawl hi ma hi.
15 Topa i mai ah tuni in, a dingmi a venghawng uh nelah le a piang laihngawl a canau tei lak heiah hi thutepnak cu bawl hi.
16 “Izipt ngamsung a, nundan le miphun dang tei ngamsung a, khualzin cu iti bang him tih thei khawng zo uh ci.
17 Sui le ngun, suang le thing tuah bawlmi ningdelhhuai a milim haw mu khawng zo uh ci.
18 Hilai a, a dingmi pano, numei, innkua le hinnam akua abang hei Topa a Pathian uh nunghekin minam dadang tei pathian dangte bia tuk ngawlin cingcai zetin nung un. Mahti bangin Topa cu nunghekin, miphun dang tei pathian a biatu cu a kha mi le mihing thihnak thing zung bang hi tuk uh ci.Ref 29:18 Heb 12:15;
19 Tuni in hiti bang tamsiat thutepnak thei in, mah i lungtupnak hangin ‘Ka deih bangin hawh tung a, ka lampi cu tuang tuk poh,’ tin, a ngaisungtu na um ngawlnak tuk uhin komno in ngaisung un. Mahtibang mihing na um uh tale hi mipi mipha le mipha ngawl tuah a siatsuahtu hi tuk uh ci.
20 Mahtibang mihing cu Topa in ngaidam hihim tukma hi. Topa i thinuknak cu a humah mei bangin alh tuk a, leihum pen a bolal laklawh hi laibu sung a, ngatmi bawngsiatnak le tamsiatnak cu pa khat nung pa khat a humah heng tuk hi.
21 Israel mipi ngallin piaknakin, Topa in amah cu mang tuk a, Topa i thutepnak sung a, ngatmi tamsiatnak hempoh cu a humah heng tuk hi.”
22 Mailam khang tampi sungah na canau uhte le lam khawlapi a, um ngamdangmi ten na khua le na ngam hum a, Topa i bawlmi haksatnak le lungapnak cu mu haw tuk hi.
23 Na ngam uh cu kolh khawng tuk a, kaat le ci tuah dim tuk hi; imah cin theih ngawlin kiak hei po thei tukma hi. Na ngam uh cu Topa a thinukin, a siatsuahmi Sodom le Gomorrah, Admah le Zeboiim khua bang tuk hi.Ref 29:23 Pian 19:24-25;
24 leihum hinnam hempoh ten, ‘Ita Topa a thinuk kaw?’ tin thu dong haw tuk hi.
25 A donlehnak cu, ‘A pu le pa tei Pathian in Izipt ngam pen a puitul laihin, Topa tuah a thutep haw mi a palcat haw hang hi.
26 Topa in, pathian dang bia pahsuh un tih hilh leng napi in, a biak awng haw ngawlmi pathian dangte bia in, a na dek haw hi.
27 Mah hangin Topa cu a mihing tei humah a thinuk zetin, a ngam hawah hilai sung a, ngatmi tamsiatnak hengtik hi.
28 Topa cu a thinukzet hangin a mihingte cu a ngam haw pen lawntulin, ngamdangah vawk hi, tuni tian mahlaiah umta haw hi.’
29 “ Topa a Pathian uhin, a phuan ngawlmi thukuh tampi um. Mahnaven a Daan cu phuang zo in, eimuh le a canau uhten a kumkhua in, a zui tuk uhmi hi.”