23
Topa i Miphun Ah Telh Tuk Ngawl
1 “Kuamah in tilngehmi le a pano na kim ngawlmi cu Topa i mihing lakah sialcih hi tukma hi.”
2 “Casawn cu, a casuan khang sawm tian Topa i mihing lakah sialcih hi tukma hi.”
3 “Ammon mi, ahimata Moab mite cu a casuan khang sawm tian Topa i mihingin sialcih hi haw tukma hi.Ref 23:3-5 Neh 13:1-2;
4 Izipt ngam pen tulin, na hawhnak uh lampi ah tui le an pia nuam haw ma hi. Amuh ten Mesopotamia ngam Pethor khua a Beor i capa Balaam cu nangmuh tamsia tukin zawmin thaman pia haw hi.Ref 23:4 Mipum 22:1-6;
5 Mahnaven Topa na Pathian uhin, Balaam i thu cu ngai nuam ma hi, nangmuhte a ih hangin Balaam i tamsiatnak cu muicu in suaksawta hi.Ref 23:5 Mipum 23:7-24:9;
6 Minam pa khat na hih sung uh cu hih miphunte bawm tukin imah bawl nuam pahsuh un, a khantohnak tuk vang ngaihsutsak nuam pahsuh un.
7 “Edom mite cu zawnsak pahsuh un; na sangngam haw hi: Izipt mite vang zawnsak pahsuh un; na um awngnak uh ngamte hi.
8 Akhang thumnak a, a neih haw mi, a casuante cu Topa i mihing lakah tel thei haw tuk hi.”
Ngiahbuk Thiangtik Tuk
9 “Ngaldo in, na ngiahbuk uhah na um uhten mithiang ngawlin, a bawltu tuk hempoh cu na pial un hi.
10 Mi pa khat cu zanmang a matmi hangin a tui tulin, mithiang ngawlin, a can ten ngiahbuk pualeu lamah tul tuk a, mahlaiah um tuk hi.
11 Taklam ten tuibual tuk a, nitum ten ngiahbukah tumleh tuk hi.”
12 “Na ngiahbuk uh pen a pualeu lamah awnghawhnak mun bawlin, awng na hawh nuam uhten mahlaiah hawh un hi.
13 Thing kawpia keng unna, lei co in, na celh uhten lei vukleh un hi.
14 Na ngiahbuk uh cu thiangno in koih un, itahim titale nangmuh hup tukin le na ngal tei humah nehnak pia tukin Topa na Pathian uh cu na lak uhah, na ngiahbuk uhah um hi. Topa i nohte a nunghek ngawlnak tukin zoh mawi ngawlmi na imah bawl pahsuh un hi.”
Daan Dadang
15 “Sal pa khat cu a bawipa i lak pen tai in, na lakah a bu tale, a bawipa i lakah kikleh pahsun.
16 A nuamnak khua pa kha khat, nangmu lakah um hen na zawnsak pahsuh un.
17 “Israel mi cu numei hihen, pano hihen biakinn ah tisa zuakdun hihim haw ma hen.Ref 23:17 Thiam 19:29;
18 Mahtibang numei pha ngawl pen a ngahmi sumpai cu thutep kimtiknak tukin, Topa na Pathian uh i biakinn ah hunpih pahsuh un. Mahtibang cu Topa i mai ah ningdelhhuai hi.”
19 “Sumpai, an le thil dadang, na unaupih uh Israel tei lakah na coih uhten a khang la pahsuh un.Ref 23:19-20 Suah 22:25; Thiam 25:36-37; Daan 15:7-11;
20 Ngamdangmi lakah a khang na la vangin na unaupih Israel mi lakah la pahsun. Hi daan hi zui unna, na luah tuk uhmi ngamah in nadehnak le na zeinak uh hempoh ah Topa na Pathian uhin muicu pia tuk hi.
21 “ Topa na Pathian uh lakah thutepnak na bawl uh tale mah na thutep uh cu pelh ngawlin kimtik hihim un hi. Na thutep cu Topa in kimtik tuk a deih hangin na kimtik ngawl ten sual hi.Ref 23:21 Mipum 13:1-16; Mt 5:33;
22 Topa i lak a, thutiam bawl ngawl cu sual hi kha ma hi,
23 hi naven nangma thinthawhin thutepnak na bawl ahi tale, kimtik hihimin hi.
24 “Na unaupih Israel mi i sabit huan sung lampi ah na hawh ten sabit ngah cu na duhzahin ei in hi; mahnaven na bawm sungah pua pahsun.
25 Lo sung lampi ah na hawh ten cangngui cu na hawhthahin dok thah thei ci, mahnaven namkawi tuah pa khatno hei at pahsun hi.