22
1 “Israel na unau pa kha khat i khui ahimata tuu a tai na mu tale, bawm ngawlin zamsan thong pahsuh un, la in, pia lehin hi.Ref 22:1-4 Suah 23:4-5;
2 A neitu pa i umnak cu khawla leita, ahimata a neitu na thei ma ahi tale na innah koih hihin hi. A neitu pa in, a zei ten pia in hi.
3 Na unau Israel mi pa kha khat i cipuh, puan ahimata thil dadang a paih ten mahtibang lelengin, na bawlin hi.
4 “Na unau Israel mi pa kha khat i laak ahimata khui lampi ah a lum ahi tale taisan ngawlin phong bawmin hi.”
5 “Numei in pano van silhsak pahsuh un, pano hei in numei van silhsak tih mang pahsuh un. Topa na Pathian uhin mahtibang a bawltu cu huazet hi.”
6 “Thing humah hihen, leihumah hihen, vano bu mu in, a pi in, a tui op, ahimata a note a um haw ahi tale, a pi cu man pahsun.
7 Na deih ngangai ahi tale, ano cu la inna, a pi cu hahin hi, na nunnop tuk a, na nun khua sau tuk hi.”
8 “Na inn hum pen mi pa kha khat cakkha in, mitei thihnak hangin na inn sungah siatnak a hen ngawlnak tukin, Innthak na sak ten na dihakhai mawk pen umin hi.”
9 “Na sabit huan sungah sabit le anci dang cing kawm pahsun; na cing kawm tale sabit hihen, na cinmi anci dang hihen co ngah tukma ci.”Ref 22:9-11 Thiam 19:19;
10 “Leilehnakin khuicang le laak mang kop pahsun.”
11 “Tuumul le nim ngai cawhhelin tahmi puan silh pahsun.”
12 “Na silhmi puan mawkah puancep bawlin hi.”Ref 22:12 Mipum 15:37-41;
Numei le Pano Tei Zui Tukmi Daan
13 Mi pa khatin, khanglai pa khat huai in, a zi in, a bawl nungten a deihleh ngawl toh tale,
14 sual a phunkim nawnin, ka huai tung laihin, khanglai him kha ma, tin ti hi.
15 “Mahtibang ahi tale numei i nu le pa ten khanglai him a hihnak langtiknakin, a huaidun zan a, a zauphah khuh cu khuasung upa thukhentu tei maiah hunpih haw tuk hi.
16 numei i pa in, ‘ka canu cu hi pa i lakah pia ing hi, mahnaven atu-in, a zi tukin deih lehma toh hi.
17 Ka canu cu sual nawnin, a huaidun haw laihin khanglai him kha ma hi, ti hi. Mahnaven ka canu cu pasal a neih laih ngawlin khanglai him hi, tih theihnak nei ing hi; khanglai him tatak hi tih theihnakin, a huaidun zan a, a zauphah khuh haw hi zo un; tituk hi.
18 khuasung upa ten mah a pasal cu manin vat haw tuk hi.
19 Mah i hum pen tangka za khat cawh haw tuk a, mah tangka cu numei nu i pa pia haw tuk hi, itahim titale Israel numei pa khat humah zahcaknak hengtik hi. Mah nu cu a zi leleng hi tuk a, a nunsung hempoh maakthei tukma hi.
20 Mahnaven a pasal i sual notmi cu manin, a zi cu khanglai him ngangai hi tih ciantik theihnak a um ahimata,
21 amah cu tulpihin, a pa i inn kongka mai pen a khuasung haw a, pano ten suang tuah sep hum haw tuk hi.
A pa i innah a umlaih, pasal a neih laih ngawlin nupa sualnak a bawl hangin a miphun hum uhah zahcaknak hengtik hi. Hiti bang daan pha ngawl cu botik tuk uh ci.
22 “Pano pa khat cu pasal a nei laihmi numei tuah a sual laih haw na mu uh tale, a pa nih haw in thah hi tuk hi. Hiti bang daan nawngkai mi cu botik un hi.”
23 “Pano pa khat cu midang tei hamsa mi numei pa khat tuah khuasung pen a sual haw laih na mu uh tale,
24 khuahialah tulpih unna, a pa nih haw in suang tuah sep hum un hi. Midang tei theih theihnak khuasung a hih hangin, midang ten bawm tukin au thei tuk naven, a au ngawl hangin numei nu cu a thih kul hi. Pano pa vang cu a unau Israel mi pa khat i hamsa mi a sualpih hangin a thih kul hi. Hiti bang thil nawngkai botik un hi.”
25 “Pano pa khatin hampa lakah midang tei hamsa mi numei pa khat tawkin, a man tale, pano pa bek cu thah hi tuk hi.
26 Numei nu i humah imah bawl tuk kha ma hi; thah takin sualnak imah bawl ma hi. Hi thu ah pano pa khatin, a dang pa khat dawkin, a thah tuah bangve hi.
27 Pano pa in hampa lakah numei cu manin bawm un tin, a au vangin kuamah bawmtu a um haw ngawl hang hi.”
28 “Pano pa khatin kuamah i ham laih ngawlmi khanglai pa khat a man tale,Ref 22:28-29 Suah 22:16-17;
29 tangka sawm nga cu manin, a pa i lakah pia tuk hi, mahten a zazalin, a sualpih hangin a zi in suak tuk a, a nun sung hempoh maakthei tukma hi.”
30 “A kuamah in, a pa i zi pa kha khat sualpihin, a pa i humah zahcaknak hengtik pahsuh hen.”Ref 22:30 Thiam 18:8; 20:11; Daan 27:20;