24
Maaknak le Huailehnak
1 “Mi pa kha khatin zi huai in, a hun ngei deuh nungten, a zi tuah lemcang ngawlnak a um hangin zi tukin deih ma toh hi. Maaknak lai nganin, a piak ceng ten a inn pen hawlvawk hi.Ref 24:1 Mt 5:31; 19:7; Mk 10:4;
2 Mahnung ten pano dang pa khat pasalleh hi.
3 Hi a pasal vangin deih lehleu ngawlin maaknak lai nganin, a piak nungten, a inn pen hawlvawk lehleu bok hi. Tehkipnakin, a nungdawl saw, a pasal cu a thi ahin,
4 iti bangin thu a um hei in, amasa pasalin huaileh hihim tukma hi; ama ca in numei nu cu nawngkai zo hi. A huai leleng ahi tale Topa i mai ah ningdelhhuai hi. Hiti bang sualnak hangin Topa na Pathian uh i a piak tukmi ngamah mawhnak henpih pahsuh un hi.”
Daan Dadang
5 “Zi huaisemte cu ngalkapah hawhtik tuk kha ma hi, a dang nadehnakah hei hawhtik tuk kha ma hi. Innah umin, a zi lungnoptik tukin kum khat cu awlh hi tuk hi.”
6 “Mi pa kha khatin, cangngawinak suang cu tepdunnakin laksak pahsuh un, itahim titale a pumcawmnak hi.”
7 “Akua hei in, a unau pih Israel mi cu ngu in, salin mang, ahimata salin, a zuak tale amah cu thah tuk hi. Mahti bangin hih daan pha ngawl cu paitik tuk uh ci.”Ref 24:7 Suah 21:16;
8 “Nangmu lakah phaaknat a um sual tale Levi mi thiampi i hilh bangin bawl un hi. Daan pia khawng zo toh bangin zui un hi.Ref 24:8 Thiam 13:1-14:54;
9 Izipt ngam pen na tul uh laihin, Topa na Pathian uhin, Miriam humah iti bangin bawl him tih ngaisung un hi.”Ref 24:9 Mipum 12:10;
10 “Mi pa khat lakah thil pa kha khat coihin, thutepnakin, a puan piak a tummi cu a inn sungah tumin la pahsun.Ref 24:10-13 Suah 22:26-27;
11 A inn pualeu ah um inna, amah in pia hen hi.
12 Mi cimkham ahi tale taklam tian na lakah koih pahsun.
13 Zan a zau ten a silh tukin nitum bek ten pia kiklehin hi. Mahtin na bawl ahi tale na humah a lungdam tuk a, Topa na Pathian vang na humah lungdam tuk hi.”
14 “Na unaupih Israel mi hihen, ngamdangmi hihen, na khuasung a, um thaman na piakmi mi cimkham le mitingsam tei thaman cu namnuai in met tuk tum pahsun hi.Ref 24:14-15 Thiam 19:13;
15 Nisialin, a ni khat thaman cu nitum laih ngawlin pia in hi. Mah sumpai cu a nunnak tukin a kulmi a hih hangin mahmi bek cu muang hi. Na pia ma tale Topa i lakah au in ngen tuk hi, mahten nangma mawh hi tuk hi.”
16 “A canau tei sual hangin a nu le pa thah tuk hi kha ma hi, a nu le pa i sual hang hei in, a casuante thah tuk hi kha ma hi. Mi pa khat cu ama bawlmi sualnak hang bekin thah tuk hi.”Ref 24:16 2Kum 14:6; 2Khang 25:4; Ezk 18:20;
17 “Ngamdangmi le nu le pa nei ngawl ca-ngah tei a covo haw tuk cu komno in ngaihsut sak un hi, thu tepdunnakin meivongnu i puan cu laksak pahsuh un.”Ref 24:17-18 Suah 23:9; Thiam 19:33-34; Daan 27:19;
18 Sal na tannak uh Izipt ngam pen Topa na Pathian uhin, a suahtul khi ngaisung leleng un. Mah hangin hi daan pia ing.
19 “An na lak uhten na ah sa uh sung pen na cop khelh uh a um tale kiklehin la pahsuh un. Topa na Pathian uh i muicu cu nadehnak, na zei le phetnak hempoh uhah a um theihnak tukin, mah an cu ngamdangmi nu le pa nei ngawl ca-ngah le meivong teita tukin na zam un hi.”Ref 24:19-21; Thiam 19:9-10: 23:22;
20 Olif vang vei khat na lak nung uhten a sang zeileh toh pahsuh un, ngamdangmi nu le pa nei ngawl ca-ngah le meivong tei ca tukin hihen.
21 Sabit na thawih ten vei khat na thoih nungten zeileh toh pahsun, a tanglaihmi sabit cu ngamdangmi, nu le pa nei ngawl ca-ngah le meivong tei ca tukin khawih un hi.
22 Nangmuh vang Izipt ngam a, sal na tan uh khi phawkngil hihim pahsuh un. Mah hangin hi daan ka piaknak hi.