18
Thiampi Tei Covo
1 “Israel ngam sungah thiampi phun Levi hinnam ten leingam covo nei haw tukma hi. Topa i lak a piakmi biakpiaknak le a dadang a piakmi tuah cawmdun haw tuk hi.
2 Hinnam dangte bangin leingam co mi nei haw tukma hi. Topa i a tep bangin a covo haw cu thiampi nadeh hi.”Ref 18:2 Mipum 18:20;
3 “Kua hei in khuicang, ahimata tuu biakpiaknakah a piak ten a daak, a kha le a hapum cu thiampi lakah pia tuk hi.
4 Thiampi ten na anthak, sabit olif situi le tuumul co haw tuk hi.
5 Na hinnam hempoh lak pen Levi hinnam cu Pathian in kumkhua a nadek tukin teng hi.
6 “Levi miten a nuam haw tale Israel ngam ilai khuai hei pen Pathian biaknak munah hung tuk a,
7 mahlai mun a, Levi mite bangin Topa Pathian i thiampi na cu dek tuk hi.
8 Thiampi dang tei ngahzahin an cu ngah tuk a, innkuapih tei kuatmi cu amahno in koih tuk hi.
Lawki Daan Ngallin Tuk
9 “ Topa na Pathian i a piak tukmi ngam na hen uhten, a umsa miphun tei nadeh ningdelhhuai cu zui pahsuh un.
10 Biaklandawh humah na casuante cu biakpiaknakah pia bok pahsuh un; na mihing tei lak pen dawihsutin, kungkhai thiam hihen, pol hihen,Ref 18:10 Thiam 19:26; Suah 22:18;
11 mizial thiam hihen, dawih sutthiam hihen, mithi sam thiam hihen, mahti bang a bawltu kua mah um haw pahsuh hen.Ref 18:11 Thiam 19:31;
12 Mahti bang ningdelhhuai na a bawltu cu Topa na Pathian i huatbelmi hi; hitih bang ningdelhhuai nungcang hangin na masuan uh a miphun a hawlvawknak cu!
13 Topa na Pathian uh i muantak zetmi hi tukin um un.”Ref 18:13 Mt 5:48;
Pathian In Profet Pa Khat Hah Tuk Tiam
14 Na luah tuk uhmi ngam a, mihing ten kungkhai thiam tei thu ngai haw hi; Topa na Pathian in mahtibang a bawltu cu zo thong tukma.
15 Topa na Pathian in nangmu unau sung pen keimah bang profet piangtik tuk a, mah i thu cu ngai saw un hi.Ref 18:15 Nung 3:22; 7:37;
16 Sinai Mualhum a, na tawhdun khawm laihin Topa i awn cu na beng uh tuah zaleh tuk ngawltohin ngen uh ci; nangmu lak a, a langnak mei al hei zo ngam ma uh ci, itahim titale thi khawng tuk ung ti uh ci.
17 Mah hangin Topa in ka nelah, ‘Na nget uhmi hi dik hi.
18 Amuh lak pen nangmah bang profet cu a ot haw tukmi hilh tung a, ka thupiakmi hempoh mipi lakah hilh khawng haw tuk hi.
19 Profet pa kha khatin keima minin thu a hilh ten a thu a ngai ngawltu cu keimah in bawlsia tung hi.Ref 18:19 Nung 3:23;
20 Mahnaven ka hilhtik ngawlmi thu ka minin, a hilh tale amah cu thi tuk a, pathian dang tei minin, a hilh haw hei in thi leleng haw tuk hi,’ ti hi.
21 “Profet thu hilhmi cu Topa i lak pen a hungmi hi maw, hi ma tin na apthong hun uh um tuk hi.
22 Profet pa khat cu Topa i min tuah thu hilhin, a thuhilhmi bangin a piang suak ngangai ahimata Pathian lak pen a hungmi thu hi tukma hi. Mah profet cu ama thinthawhin thu a hilh hangin kihca pahsuh un.”