19
Buknak Khuapite
(Mipum 35:9-34; Josh 20:1-9)
1 Topa na Pathian uh i a piak tukmi ngam a, a um miphun Topa in, a siatsuah khawng nung, a khuapi haw la khawngin mah ngam a, na um uhten,
2 mah khuapi tei lak pen khuapi pa thum cu ngelhnakin bawl un.
3 Topa i a piak tukmi ngam cu khen thumin khen unna, mithattu buknak tukin le a himnak tukin khenkhatah buknak khuapi pa khat ten um tuk hi.
4 Mi pa khatin, a ngal hi ngawlmi pa khat, bawlhipnak um ngawlin a that kha tale hi khuapi pa kha khatah tai tuk a, himnak ngah tuk hi.
5 Tehkipnakin, mi pa nih cu thingphuk tukin tupi sungah hawh haw hi; thing a phuh haw laihin, pa khat pa i heipi cang cu hongin, a ngualcam pa sep ngahin, a thi tale, mah a khialtu pa cu tai tuk a, hi khua pa kha khatah bu in, him tuk hi.
6 Khuapi pa thum hi ngawlin pa khat bek a um tale, mi thattu khenkhat tei ca in khawla leita tuk a, phulak a nuam pa in pha in, a thin a sat laihtakin mah a mawh ngawlpa cu that tuk hi. Thungai titale, a ngal ahi ngawlmi pa cu tih himnak um ngawlin that kha sual hi.
7 Hi bang cu hangin buknak khuapi pa thum koih tukin thu ka piaknak hi.
8 Topa na Pathian uhin, na pi le pu tei lak a, thu a tep bangin na ngam uh cu zal pepeltikin, ngam a venghawngin, na luah uhten,
9 khuapi dang pa thum teng leleu un hi. Ka thupiakmi bangin ihempoh bawlin, Topa na Pathian uh cu it in, a thuzilhmi bangin na nung uh ahi tale hi ngam cu pia khawng tuk hi.
10 Mah hangin ka hilh bangin bawl unna, Topa i a piak tukmi ngam sungah a sual ngawlmi i thisan luang ngawlin, na hum uhah a heng tukmi bawlsiatnak pen suakca tuk uh ci.
11 “Tehkipnakin, mi pa nihte cu ngaldunin, pa khatin, a ngal cu that himin, hi khuapi pa kha khatah a tai tibang ahin,
12 mahti bangin thil a um tale ama khua a hotu ten mahpa cu phula nuam pa i lakah ap haw tuk a, mahpa in that tuk hi.
13 Laithat tei humah hehpihnak nei pahsuh un hi. Israel ngamsung pen laithat cu bo khawng tahen; mahten na lam uh tuang tuk hi.”
14 “ Topa na Pathian uhin, a piak tukmi ngam sungah tanglaih cawngin, a phut sa haw mi suang phut, na innnel pa i ngamngi suangphut cu khinsak pahsun hi.Ref 19:14 Daan 27:17;
Theihpihtu Ca In Daan
15 “Mi pa khat sualnot theihnak tukin, theihpihtu pa khat bek tawk ma hi; a dembel pa nih a um haw kul hi.Ref 19:15 Mipum 35:30; Daan 17:6; Mt 18:16; Jn 8:17; 2Kor 13:1; 1Tim 5:19; Heb 10:28;
16 Mi pa khatin adang pa khat cu siatsuah nuamin sual a not him ten,
17 a pa nih haw in, Pathian biaknak munah thiampi le mah laih a, nadek thukhentu tei maiah ding haw tuk a, a thu haw cu son sak hi tuk hi.
18 Thukhentu ten a thu haw cu komzetno in le cangkimno in dong cangcian haw tuk hi; a dik ngawlin sual notmi hi tih, a thei ciang haw tale,
19 sual a nawntupa in, a lungkim zahin thuak tuk hi. Sualnot himnak daan pha ngawl cu paitik tuk uh ci.
20 Mi hempohin mah thu cu a zak haw ten ngallinnakin mang haw tuk a, mahtibang daan pha ngawl cu kuamah in bawl haw tukma toh hi.
21 Kuamah hehpih pahsuh un; nunnak ai-in nunnak, mit ai-in mit, ha ai-in ha, khut ai-in khut, ke ai-in ke hi bok tuk hi.”Ref 19:21 Suah 21:23-25; Thiam 24:19-20; Mt 5:38;