17
1 “ Topa na Pathian uh lakah sonbang mi khuicang ahimata tuu cu biakpiaknak tukin pia hihim pahsuh un hi; itahim titale Topa na Pathian uh i huatbelmi hi.
2 “Tehkipnakin, na khuasung uhah numei hihen, pano hihen, Topa i thupiakmi zui ngawlin,
3 pathian dang, ahimata ni maw, ha maw, aksi maw bia in, a nadek hi. Topa i humah sualin, a thutepnak siatsuah hi,Ref 17:3 Suah 22:20;
4 tih na thei uh tale cangkimno komzet kan un hi. Mahti bang thupha ngawl cu Israel tei lakah bawl ahi ngangai tale,
5 a bawltu cu khuahialah suah unna, suang tuah sep hum un hi.
6 Theihpihtu pa nih ahimata pa thum a um haw tale amah cu thah hi tuk hi; mahnaven theihpih tu pa khat bek a um ahi tale thah hi tukma hi.Ref 17:6 Mipum 35:30; Daan 19:15; Mt 18:16; 2Kor 13:1; 1Tim 5:19; Heb 10:28;
7 A thu theihpihtu ten suang tuah sep masabel haw tuk a, mah nungten a dang ten sep bok haw tuk hi, mahti bangin hi thil nawngkai cu botik un hi.Ref 17:7 1Kor 5:13;
8 “Thahdunnak thu in maw, leingam cuhdun thu ah maw, taksa liamsuah dunnak thu ah maw, vei kha khat cu thukhentu tei soncat theih ngawlmi thu um kha tuk hi. Mahti bang hun ten Pathian biaknak munah hawh unna,
9 mah thu cu Levi mi thiampi le mahlai a, a koih haw mi thukhentu tei lakah pia un hi, amuh ten son haw hen hi.
10 Amuh ten soncat haw tuk a, a soncat haw mi bang cikcekin bawl un hi.
11 A thusoncat haw mi cu pom unna, a thu hilh haw mi bang cikcekin zui un hi.
12 Mah thu soncattu thiampi hihen, ahimata thukhentu hihen, a thu na ngai uh ahimata a ngai ngawltu cu thah hi tuk hi, mahten Israel mi sung a, thilpha ngawlte cu botik un hi.
13 Mah thu cu mipi in, a theih haw ten ngallinnak nei haw tuk a, mahtibang cu bawl ngam haw tukma toh hi.”
Kumpi Zui Tuk
14 “ Topa na Pathian uhin, a piak tukmi ngam luahin, panmun na suum nung uhten na elkim uh a, mi hinnam bangin kumpi nei nuamleh bok tuk uh ci.Ref 17:14 1Sam 8:5;
15 Mahti bangin na deih ngangai uh hun ten Topa i tenmi cu na ten theihnak tukin ngalling un. Kumpi cu nangmu hinnam sung pen hi tuk a, ngamdangmi cu kumpi dektik pahsuh un.
16 Kumpi in, a ngalkap tei man tukin cipuh tampi nei pahsuh hen, cipuh lei tukin Izipt ngamah mi hah pahsuh hen, itahim titale Topa in ama mihingte cu Izipt ngamah hengleh tuk ngawltohin thupia zo hi.Ref 17:16 1Kum 10:28; 2 Khang 1:16; 9:28;
17 Kumpi cu zi tampi nei pahsuh hen, itahim titale Topa i lampi pen pialtik tuk hi. Sui le ngun khawlin, mihau hi nuam pahsuh hen.Ref 17:17 1Kum 10:14-22, 27; 11:1-8; 2Khang 1:15; 9:27;
18 Kumpi a hih ten Levi mi thiampi ten komzetno in, a ngat haw mi, Pathian thukham le daan khumnak laibu pa khat nei hen hi.
19 Mah laibu sung a, ummi daan cu komzetno in, a zuinak tukin le Topa kihcak a thiamnak tukin laibu cu a elah koihin, a nun sung hempoh sial leleng hen.
20 Mahti bangin, a bawl tale, a unau dang Israel mite sangin pha saw deuh ing tin, ngaisung duncop ngawlin, Topa i thupiakmi pen lampial tukma hi. Amah le a casuan ten Israel ngam cu khang tampi tian uk haw tuk hi.