4
Nebuchadnezzar Mang Vei Nihnak
1 Kumpi Nebuchadnezzar in miphun, hinnam le awn hempoh tei lakah a nuailam a thu hi na cah hi.
Na hum uhah lemdaihnak um tahen!
2 Cungnungbel Pathian in ka lakah langtikmi thasiahhuai nalamdangte hi ngaisung ten un hi.
3 “Pathian i lakmi thasiahhuaite hi
iti zahin thawmngeng hum!
Nalamdang a bawlmi hi
iti zahin kaw huham a neih!
Pathian cu kumkhua in
kumpi hi tuk a;
uk leleng tuk hi.
4 “Ka innah nunnopzet le neinung zetin um mek ing.
5 Mahnaven vei khat cu ka hihbuh laihin, a lauhuai zetmi mangmanin, mulcang suak hah pa khat mu ing.
6 Mah ka mang i a sullam a hilh ciangtu tukin Babilon peng sung a, kumpipa i thudotmi micipte samkhawm tukin thupia ing.
7 Khutlam zothiamte, mipolte, mitzial thiamte le aksi zothiamte hung haw in, ka mang cu hilh naveng kuamah in, a sullam son thei haw ma hi.
8 Daniel hung hi. (Daniel cu ka pathian min suangin Belteshazzar tih hei in sam hi.) Pathian hawvang thiangtho cu a sungah umin, a lakah ka mang cu hilh ing.
9 Belteshazzar, khutlam zothiamte hotu, na sungah Pathian hawvang thiangtho a um hangin nalamdang le thuthukte thei ci, tih thei ing. Ka mang cu hi bangin hi, a sullam hilhin hi!
10 “Ka hihbuh laihin, muhnak nei ing, leihum buppi i laizangah thingkung ngengpi pa khat mu ing.
11 Mah thingkung cu khang dedeuhin, sang dedeuh hi, a leekin, van khongto in, leihummi hempoh ten mu thei haw hi.
12 A cehte cu mawi ngangai in, a ngah vang tamzet hi, lei buppi i eihkhop tuk tianin tam hi. Ngamsate a nilimah kual haw a, vano ten a kakah busa in, a nungmi hempohin, a ngah cu ei haw hi.
13 “Mah thu ka ngaihsut laih takin van pen celzet le ngalling zetin khua a zotu vancungmi pa khat tolh hi.
14 Aw ngingzet tuah thuthanin, ‘Thingkung hi phuk unna, a kakte talh khawng un. A cehte heuh khawng unna, a ngahte khenkhek khawng un. A lak pen ngamsate le a kak pen vanote hawlvawk khawng un.
15 Mahnaven a bul tawng le a zung cu thik le daal taicin tuah khih unna, lei ah zam un. Mahlai a, hampa lakah zam un hi.
“Tu pepan hi pa i humah daita henna, ngamsa, thingkung le hampa lakah um hen.
16 Kum salih sung mihing lungmu pua ngawlin ngamsa lungmu saw pua tuk hi.
17 Hi cu a ngallingzettu vancungmi i soncatmi hi. Mah a hih hangin leihum khua hempoh ten thei haw hen: Cungnungbel Pathian in mihing i ngam uknak humah thunei in, mah ngam uknak cu a deihmi lakah pia hi, leihummi nautabel lak hei ah pia thei,” ti hi.
18 “Hitih cu hi ka mang. Atu-in, Belteshazzar, ka mang i sullam hilhin hi. Ka thudotmite pa khat hei in, a sullam hilh thei haw ma hi; mahnaven nangin hilh thei tuk ci; itahim titale Pathian hawvang thiangtho cu na sungah um,” ti hi.
19 Mahmi a zak ten Belteshazzar tihvangin sammi Daniel cu a thinsu in imah awn thei ma hi. Kumpi pa in, a lakah, “Belteshazzar, ka mang le a tihnuam mi in, na thinsutik pahsuh hen,” ti hi.
Belteshazzar in, “Kumpipa, na mang le a sullam hi nangma ca hi ngawlin na ngalkap tei ca hi ahin, deih na veng.
20 Thingkung sang zetin, a lek vankhong cu leihummi hempoh ten mu thei haw hi.
21 A cehte cu mawizet haw in, a ngah cu leihum buppi eihkhop tukin tam hi. A nuai ah ngamsate kualin, a kakah vano ten bu sa haw hi.
22 “Maw kumpipa, a sang zetmi le a kho zetmi thingkung cu nangmah hi ci. Nasezet ci a, vankhong ci; na ngilnak huham cu leihum hempoh ah hengkim khawng hi.
23 Kumpipa, na zoh laih takin, van pen vancungmi tolhsukin, ‘Thingkung cu phuk unna, cek keh khawng un; mahnaven a zung cu lei ah zam un. Thik le daal taicin tuah khih unna, hampate tuah zamcih khawng un: a humah daita henna, kum salih sung ngamsate tuah um langkhat haw hen,’ ti hi.
24 “Maw kumpipa, na mang i sullam cu hi bangin hi, Cungnungbel Pathian in, na humah a heng tukmi cu phuang zo hi.
25 Mihing umnak khua le ngam pen hawlvawk hi tuk ci a, ngamsa tei lakah um tuk ci. Kum salih sung khuicang bangin hampa ei in hampa lakah zau in, na humah daita tuk hi. Mihing uknak humah Cungnungbel Pathian in thunei hi tih le mah ngam uknak cu a piak nuammi lakah pia hi tih thei tuk ci.
26 Thingbul cu leihumah zamta tukin vancungmi in thupia hi. A tihnuam mi cu Pathian in leihum buppi uk hi, tih na theih ngah ten, kumpi hileh tuk ci, tihnak hi.
27 Mah hangin kumpipa, thu ka hilhmi hi ngai inna, sualnak bawl ngawltohin, a dikmi bek bawl inna, mi ca-ngahte hehpihin hi. Khangto dedeuh tuk ci,” ti hi.
28 A tih bangin Nebuchadnezzar humah kim khawng hi.
29 Ha sawm le ha nih nungten, Babilon khua a, kumpi inn humah a vah lih laihtakin,
30 “Zo un, Babilon a thawmngeng dan hi! Ka khuapi ah bawlin ka huham le ka ngilnak, ka sunloihnak le ka thawm ngengnak langtik tukin bawl ing,” ti hi.
31 A ot khawng laih ngawlin van pen aw ngingin, “Kumpi Nebuchadnezzar, ka hilhmi hi ngai in! Na kumpi huham cu na lak pen laksak hi zo hi.
32 Mihing umnak khua le ngam pen hawlvawk hi tuk ci; hampa lak ngamsa tei lakah umin, kum salih sung khuicang bangin hampa ei tuk ci. Cungnungbel Pathian in mihing ngam uknak humah thunei in, mah ngam uknak cu ama nuammi lakah pia thei tih cu thei tuk ci,” ti hi.
33 A tihnak bangin kim ngangai hi. Nebuchadnezzar cu mihing umnak khua le ngam pen hawlvawkin, khuicang bangin hampa ei ngangai hi. A taksa humah daita in, a sam cu muvanlai ha mul bangin sau hi, a tinte cu vano tin bangin hiam hi.
Nebuchadnezzar In Pathian Thangphat
34 “Kum salih a kim ten van khi zo ing a, ka lungmu cangkimleh hi. Cungnungbel Pathian cu thangphat ing, kumkhua a nungmi lakah upatnak le sunloihnak pia ing,” tin kumpi in ti hi.
“Kumkhua in uk tuk hi.
A uknak cu kumkhua in
kho tuk hi.
35 Leihum mihingte cu
imah ngawlin zo hi.
Van a, vancungmi le leihum a,
mihingte cu amah in,
uk khawng hi.
Kuamah in, a deihnak
el thei haw ma.
A bawlmi vang
dongkan thei haw ma hi.
36 “Ka lungmu a cangkimleh ten, ka minthannak, ka thawm ngengnak, ka sunloihnak le ka ngam uknakte cu ka lakah piak hileh khawng hi. Ka khutnuai a, bawite, ka mi upa uhten cosang lehin, ka kumpi thuneihnakte cu masalam sangin nase saw in ka lakah pialeh hi.”
37 “Atu-in, keimah Nebuchadnezzar in vancung kumpi upat, pahcawi in, sunloih ing. A bawlmi hempoh cu a manmi le a dikmi hi, pualthauzet nadektu cu khiaksuk hi,” tin kumpi in ti hi.