5
Belshazzar Puai Bawlnak
1 Tak khat cu kumpi Belshazzar in an eih puai ngengpi bawlin, a khutnuai bawi le upa thawng khatte tuah munkhatah zu cu inkawm haw hi.
2 Mahti bangin zu a in haw laih takin Belshazzar in, Jerusalem Biakinn pen a pa Nebuchadnezzar in sui khuat, ngun khuat le kuangte a puakmi latik hi. Amah le a bawi upate, a zite le a zineu tei zu a innak tukin a cahmi hi.
3 A cah bangin man lang zetin sui khuat le kuangte cu hunpih haw a, zu innakah mang haw hi.
4 sui le ngun, daal le thik, thing le suangte tuah bawlmi khuazingte cu thangphat tawtok haw hi.
5 Thakhat thu in, mihing khut pa khat langin, mei-inn vaknak khuam zawn pang humah lai ngan hi. Lai a ngan litu khut cu kumpi pa in mu hi.
6 Mahbek ten a mitmai sia khawng a, lau zetin, a khuk hing tawtok hi.
7 Mitzial thiamte, aisan thiamte le aksi zothiamte sam tukin au het hi. A sam mite cu heng haw in, kumpi in, “Hi laingatmi a sial theitu le a sullam a hilh theitu cu kumpipa in puansan silhtik tuk hi, a ngawngah minphatnak suikhi hual ok tuk a, ka uknak sungah thuneihnak lamah pa thumnak hi tuk,” ti hi.
8 Kumpi ngaihsutnak piatute cu mailamah tulin laingatmi cu zo haw naven kuamah in sial thei haw ma, a sullam vang kumpi hilh theitu kuamah um haw ma hi.
9 Kumpi Belshazzar cu amthongin, a maidal dihdehin, a bawi upate vangin bawl tuk thei bok haw ma hi.
10 Kumpi le a bawi upate cu lungbingin, a um haw thawmvang cu kumpinu in, a zak ten an eihnak khansungah tumin, “Kumpipa, na nunkhua sau zal hen! Hiti bangin lungmu haksa le mitmai sia in um zal pahsun.
11 Na ngam sungah pathian thiangtho tei hawvang a neitu mi pa khat um hi. Na pa kumpi a hih laihin, mahpa in ngaihsutnak dik le theihnak a neihdante langtik zo in, a cihnakte cu pathian cihnak bang hi. Mah hangin na pa, kumpi Nebuchadnezzar in khutlam zothiamte, mitzial thiamte, kungkhai thiamte le aksi zothiam tei hotu in bawl hi.
12 Thil tihtheihnak a cuangin nei hi; cip vang cip zetin mang i sullam vang hilh thei in, nalamdang bawl theihnak le thuthuk hilh theihnak lamah thiam ngangai hi. Mah hangin mahpa, kumpi in Belteshazzar tin min a sakmi, Daniel cu sam inna, amah in, a sullam hilh thei khawng tuk,” ti hi.
Daniel In Laingatmi Sullam Hilh
13 Manlang zetin Daniel cu kumpi mai ah hawhpih haw a, kumpipa in, a lakah, “Daniel hi cim maw? Judah sal matmi, ka pa kumpi i Judah ngam pen a pui mi Daniel hi a cim maw?
14 Pathian hawvang thiangtho cu na sungah umin, thiamnak, theihnak le cihnak nei ci tih za ing.
15 Ngaihsutnak piatute le mitzial thiamte hi laingatmi sialtu tukin le a sullam hilh tukin pui haw naven a sullam thei zo hihim haw ma hi.
16 Thukuhte vang hilh thei in, kuamah i theih zawh ngawl thuthukzette hilh thei hi tih za zo ing. Hi laingatmi hi sialin, a tihnuam mi na hilh thei ngangai tale kumpi puansan silhin, min phatnak suikhi na ngawngah ot tuk ci a, hi ngamsung thuneihnak lamah pa thumnak hi tuk ci,” ti hi.
17 Daniel in, “Na laksawng cu nangmata tukin koih pohin hi, ahimata midang pia in hi. Kumpipa in nangma ca in, hi laingatmi cu sialsak tung a, a sullam vang hilh tung hi.
18 “Cungnungbel Pathian in, na pa Nebuchadnezzar cu kumpi thawmngeng le huham neizet tukin bawlin mi thupi ah suaktik hi.
19 Nase zetin miphunte, hinnam le awn hempoh a mang miten lau in can haw hi. Mi pa kha khat that a nuam tale that thong, nungtik a nuam tale nungtik hi. A nuanuamin mite cu minphatnak pia in, mualphonak vang umtik hi.
20 Mahnaven mahtih bangin pualthau in, lungmu ngoltolin le hehpihnak nei ngawlin a um hangin a kumpi khunnak cu lonsak hi a, upatnak dinmun co ngah ma hi.
21 Mihing umnak khua le ngam pen hawlvawkin, a lungmu cu ngamsa lungmu bangin um hi. Hampalak laak tei lakah umin, khuicang bangin hampa ei in, humtu le pantu kuamah nei ngawlin lenkolhah zau in, a humah daita hi. Nungdawlbel ten Cungnungbel Pathian in mihing ngam uknak humah thunei in, mah ngam uknak cu a deihmi lakah pia thei hi tih cu thei ngah hi.
22 “Mahnaven mah thute cu nang a capa in thei khawng navecin na lungmu nem cuang ma hi.
23 Vancung Topa dodalin, na bawlmi Biakinn pen na puakmi khuat le kuangte cu hilai ah keng khawng ci. Nangmah le na laitate, na zi le na zineu ten mah khuat tuah zu in haw a, sui le ngun, daal le thik, thing le suang tuah bawlmi khuazingte thangphatnak pia uh ci. Khua mu thei ngawl, imah thu thei zo ngawl le theihnak a nei ngawlmi pathian dangte cu pahcawi tawtok uh ci. Na nunnak uh le thihnak humah thuneitu, na bawlmi hempoh humah thuneitu Pathian saw cu upatnak pia ma uh ci.
24 Mah hangin hi thute a ngantu tukin khut a hahnak hi.
25 “A ngatmi cu, \tl ‘Mene, mene, tekel u-pharsin,’\tl* tihmi hi.
26 A sullam cu a nuailam bangin hi: \tl ‘Mene,’\tl* tih cu ‘sial’ tihnak hi a, na ngam uknak hi Pathian in, a nisial zo hi, mah hangin a ngei ngawlin botik tuk tihnak hi.
27 \tl ‘Tekel,’\tl* tihmi cu ‘cuai khai’ tihnak hi a, cuai khai na hih ten cuai kim ma ci tihnak hi.
28 \tl “U-pharsin,\tl* tihmi cu ‘khenkhek’ tihnak hi a, na ngam uknak cu khenkhek khawng hi tuk a, Media mi le Persia mitei lakah piak hi tuk hi, tihnak,” ti hi.
29 Thakhatin, Belshazzar in Daniel cu kumpi puansan silh tukin le a ngawngah suikhi ok tukin a nadektute thupia hi. Mahten a uknak sung a, thuneitubel a pa thumnakin bawl hi.Ref 5:29 Pian 41:42;
30 Mah zan loli ah Babilon kumpi Belshazzar cu thatin,
31 kum sawm luk le kum nih a kimmi Media mi Darias in Babilon ngam cu la hi.