3
Sui Milim Bia Tukin Thupiaknak
1 Kumpi Nebuchadnezzar in, a tunglam pi sawm kuah le a vang pi kuah milim ngengpi cu sui tuah bawlin Babilon peng Dura munlawnah koih hi.
2 kumpi in, a khutnuai a bawi upa hempoh, a ngamkhen uktu bawite, ngamuktu bawite, ngamuktu bawi bawmtute, sumpai lam lentute, thukhentute le bawi dangte cu munkhatah hung khawm tukin thupia hi. Kumpi Nebuchadnezzar in sui milim a bawlmi apnakah hung khawng tukin sam hi.
3 Bawi hempoh cu mahlai munah hung haw in, sui milim ap tukin a mai ah a din haw ten,
4 thuthantu pa khatin aw ngingzet tuah “Miphun, hinnam le awn tihkim a mangtu hempoh ngai un hi!
5 Pengkul tum na zak uh bek ten mun khatin pheveu, lemlawi, baiza, tingtang le a nging thei mi hempoh a tumtute zo tuk uh ci. Mah ti bangin awn mawi a tum haw ten, na lu uh kunin, kumpi Nebuchadnezzar i bawlmi sui milim cu bia un hi.
6 Lu kungawltu le a bia ngawltu cu manlang zetin mei alh sungah khiak hi haw tuk,” ti hi.
7 Mah hangin tummi aw a zak haw bek ten mi phun le nam, awn tihkim a mangtu hempoh ten a lu haw kunin, kumpi Nebuchadnezzar i sui milim cu bia duaduam haw hi.
Daniel i Ngualcamte Siat Haw
8 Mah hunin, Babilon miten Judah mite a sonsia haw tuk hun lemcangzet hi.
9 Amuh ten kumpi Nebuchadnezzar lakah, “Maw kumpipa, na nunkhua sau zal tahen.
10 Bawipa nangma thupiak bangin awn mawi a tum bek haw ten akua hei hihen lu kunin sui milim bia haw tuk hi.
11 Lu kun ngawltu le sui milim a bia ngawltu cu mei alh sungah khiak hi haw tuk ti ci.
12 Babilon peng uktu le hotu tukin dehvo na piakmi Judah mi Shadrak, Meshak le Abednego ten kumpipa na thupiakmi el haw hi. Na pathian bia ngawlin, na milim bawlmi mai ah kun haw ma tin hilh haw hi.”
13 Mah thu hangin, kumpipa a thinukzet a hih ten mah pa thumte cu a mai ah hunpih tukin thupia hi.
14 A hun haw ten, “Shadrak, Meshak le Abednego; ka pathian bia nuam ngawlin le ka sui milim bawlmi mai ah kun nuam haw ma hi tin, a tih haw hi thungai a maw?
15 Atu-in pengkul, pheveu, lemlawi, tingtang le a nging theimi hempoh tum haw tuk a, mah na theihbek uhten na lu uh kunin milim hi bia tuk uh ci. Na bia nuam uh ma tale manlang zetin mei alh sungah vawk hi tuk uh ci. Nangmuh a hum theitu tuk pathian um hi tin um uh cim?” tin ti hi.
16 Shadrak, Meshak le Abednego ten, “Maw kumpipa, hi thu ah keimuh le keimuh patdun kul tukin ngaisung ma ung.
17 Mei-alh sung pen a hup theitu Pathian a um ahi tale ka biak uhmi le a na ka deh uhmi ka Pathian bekin na ngilnak huham sung hei pen hup tuk hi.
18 A hup lelei ngawl vangin, kumpipa, na pathiante cu bia tukma ung, na sui milim bawlmi mai hei ah kun tukma ung, tih cu thei hamsa hi,” tin ti haw hi.
Daniel i Ngualcam Pa Thumte Thah Tuk
19 Mahtin a ot haw mi cu Nebuchadnezzar in, a theih ten a thin sup thei ngawlin, Shadrak, Meshak le Abednego tei humah a thinuk leita in, a maisan khawng hi. A mihingte cu thupia in, mei a tuah mek haw sangin let salih sa tukin tuahtik hi.
20 a ngalkap sung pen mi ngilbelte tengin, mah Judah mi pa thum tei khut le ke cu kenin, mei alh sungah khe tukin thupia hi.
21 Mahpa thum tei angki, bawngbi le a lukhuh le a silh laih haw mi vante kimno tuah kenin, meipi sungah khe haw hi.
22 Kumpi in meipi cu sa cuang tukin thu kho zetin, a piak bangin meipi a tuah haw mi cu sa ngangai in, mi pa thum meipi sungah a khiatu ngalkap ngilzette hei mei in kang hum hi.
23 Shadrak, Meshak le Abednego cu a khut le ke henmi tuah meipi sungah vawk haw hi.
24 Thakhat thu in, Nebuchadnezzar cu dingvut hi! A khutnuai bawite cu, “Mi pa thumte cu a khut le ke kenin, meipi sungah khia hi ma hung maw?” tin dong hi.
Amuh ten, “Mahzuh hi, bawipa, na tih bangin hi, ti haw hi.”
25 Kumpipa in, “Itin kaw mei alh sungah mi pa li a vahlih haw ka muh hi!” tin dong hi. “A khut le ke haw vang kenmi kha haw ma si, a nat a thuaknak haw langsih ma; mahten a pa linak ngen cu pathian tei capa bangnote 3:25 pathian tei capa bang a tihmi hi, pathian tei ca ahimata Pathian i Capa tih nuamnak hi. tin ti hi!”
Suakca In Nadeh Kaitik
26 Nebuchadnezzar cu meipual sehnak lam a, um kongka lamah hawhin, “Shadrak! Meshak! Abednego! Ihempoh tithei Pathian i silate, tul un!” tin sam het hi. Manlang zetin tulvut haw hi.
27 Ngamuk bawite, ngamkhen uktute, ngamkhen uk bawmtute le kumpi khutnuai a bawi hempoh hungin meipi i kangtik ngawlmi mi pa thumte cu zo susuih haw hi. A samzang khat hei kang haw ma hi, a puan haw vang kang ma, mei ngim hei nam ma hi. Mahmi cu mu khawng haw hi.
28 Kumpi in, “Shadrak, Meshak le Abednego i Pathian cu thangphat hi tahen! A nadektu le a muangtute pan tukin a vancungmi hah hi. A biakmi a Pathian haw sialngawl pathian dang bia in le a mai ah kun sangin ka thupiakmi elin, a nunnak haw tian pia ngam saw haw hi.
29 “Mah hangin atu-in thupia ing hi: Akua bang miphun le nam ahi haw hei in, iti bang awn mangtu ahi haw hei in, Shadrak, Meshak le Abednego tei Pathian upat ngawlin a awntu a um haw tale amuh cu a khut le a ke haw bawhkek khawngin le a inn haw cu buak vawknakin cang tuk hi. Hiti bangin mi humhim theitu pathian dang ilai hei ah umma,” ti hi.
30 Kumpi in Shadrak, Meshak le Abednego tei pa thum cu Babilon peng sungah a nadeh haw kaitik hi.