2
Nebuchadnezzar i Mang
1 Nebuchadnezzar cu kumpi a deh kum nihnak ten mang pa khat man hi. Mah a mangin, a lungkhamtik leita a hih ten hihbu thei ma hi.
2 A khutlam zothiamte, mitzial thiamte, mitzial thiamte le aksi zothiamte cu a mang lettu tukin sam hi. A lakah hungin, a mai ah ding haw hi.Ref 2:2 Pian 41:8;
3 Kumpipa in, “Ka mang matmi in ka lungmu haksatik leita hi. A sullam thei nuam ing,” ti hi.
4 Kumpi lakah Aramik awn tuah “Maw kumpi pa, na nunkhua sau zal tahen. Na mang cu hilh inna, a sullam hilh tuk ung,” tin ti haw hi.
5 Kumpipa in, a lak hawah, “Ka mang le a tihnuammi na hilh tuk uh ka tupmi le ka khencat zomi hi. Na hilh thei uh ma tale na khut le ke uh botbal khawng tung a, na inn uhte vang buak khukin cangtik khawng tung hi.
6 Mahnaven ka mang i sullam na hilh thei uh tale laksawng le minphatnak pia tung. Mah hangin atu-in, ka mang i sullam cu hilh un,” ti hi.
7 Kumpipa i lakah, “Kumpi bawipa, na mang cu son poh inna, a sullam hilh thei tuk poh ung tin donleh haw hi.”
8 Mahten kumpipa in awn li zetin, “Ka ngaihsut bang ngangai uh ci! A hun ngei deuh hen tih na tup uhmi hi, itahim titale ka mang na hilh thei uh ma tale,
9 na venghawng uhin bawlsiatnak bangten pia tung, tin ka ngaihsutsa mi na theih uh hangin hi. Hun a ngei deuh tale thu cu thekdunleh tuk poh tin, muansannak na neih uh hangin nangmu lakah theihdunnak nei in zolthu bebek hilh li thong uh ci. Ka mang cu i hum tih hilh un. Ka mang i sullam vang hilh thei uh ci tih thei tung,” ti hi.
10 Kumpipa i thudotmi ten, “Hi leihumah Kumpipa na theih nuammi hi a hilh theitu kuamah um haw tukma. Na thudotmi bang hi iti bang kumpi ngengbel le huham neibel hei in, a khutlam zothiamte, mitzial thiamte le a mitzial thiam tei lakah dong awng haw ma hi.
11 Kumpipa na thudotmi hi hak leita a hih hangin pathiante tih ngawl mihingin, na ca in, a let theitu kuamah um haw tukma hi. Mihing le pathiante lakah um sih haw ma,” tin donleh haw hi.
12 Mah bek ten, kumpipa cu a thinukin, Babilon ngamsung a, kumpi ngaihsutnak piatute hempoh that khawng tukin thupia hi.
13 ngaihsutnak piatu hempoh Daniel le a ngualcamte tianin thah tukin thupia khawng hi.
Pathian In Mang i Sullam Daniel Hilh
14 Daniel cu mi thattu tukin dehvo piakmi kumpi cingtu ngalkap le hotu ngalbawi Ariok lakah hawh hi. Ngalling zetin awnin,
15 Ariok cu, “Itakaw kumpipa in hiti bang thupiak nasezet a suah?” tin dong hi. Ariok in Daniel cu thil um daan hempoh hilh khawng hi.
16 Thakhat thu in, Daniel cu kumpipa i lakah hawhin, a mang i sullam a hilh theihnak tukin hun ngen hi.
17 Daniel cu pinin, a ngualcam Hananiah, Mishael le Azariah tei lakah mah thu le late hilh khawng hi.
18 Babilon ngamsung kumpi ngaihsutnak piatute tuah thahcih a hih ngawlnak haw tukin le mah nalamdang cu a lak hawah ciangtikin, Pathian lakah hehpihnak ngen tukin hilh hi.
19 Mah zan loli ah Daniel in muhnak nei in, thuthukzette cu a lakah ciangtik hi. Daniel in vancung Pathian cu thangphat hi.
20 “Pathian cu cipin huham nei hi!
Kumkhua in amah cu
thangphat un!
21 Amah in hun le cante cu bawl hi;
kumpite tungdingin,
khiasukleh hi.
Amah cu cihnak le
theihtupnak piatu hi.
22 Thuthuk le thukuhte vang,
amah in langtik khawng hi.
Khuathim lak a, selmi vang
thei khawng hi.
Amah cu vaknakin kil hi.
23 Ka pu le pa tei Pathian,
nangmah cu thangphatin
upat ing.
Cihnak le ngilnak pia ci;
ka thungetnak ngai in,
kumpi lak a hilh tukmi vang
hilh zo ci,” ti hi.
Daniel In Kumpi i Mang Hilhciang
24 Daniel cu kumpi ngaihsutnak piatute that tukin dehvo a piakmi Ariok lakah hawhin, “That pahsun, kumpipa i lakah hawhpih inna, a mang cu let tung,” ti hi.
25 Thakhatin Ariok in, Daniel cu kumpi Nebuchadnezzar lakah hawhpih a, “Kumpipa, Judah saltangmi lak pen na manglet theitu tuk pa khat mu zo ing,” ti hi.
26 Kumpi in, Belteshazzar tih vangin a sam haw mi Daniel lakah, “Iti bang mangman ing hum tih le a sullam hilh thei ni cim maw?” tin dong hi.
27 Daniel in, “Kumpipa aw, na mang le a sullam a hilh theitu kuamah um haw ma hi; micipte hihen, mitzial thiamte hihen, khutlam zothiam le aksi zothiam hihen, kuamah um haw ma hi.
28 Mahnaven vancungah, nalamdang a hilhciang theitu Pathian um hi. Amah in kumpipa, na lakah mailam a piang tukmi thute hilh ham hi. Na hihbuh laih a, na matmi na mang cu hilh tung hi.
29 “Kumpipa, na hihbuh laihin mailam thuman ci. Thasiahhuai a langciangtiktu Pathian in mailam a heng tukmi nate lak hi.
30 Hi thu cu ka lakah a hilhciangmi hi. Kei hi midang sangin ka cihbel hang hi kha ma, mahnaven, kumpipa nangmah in, na mang i sullam cu na theih theihnak tukin le na lak a hengmi, ngaihsutnakte hi na theihnak tukin hi bangin a hilhciannak hi.
31 “Kumpipa aw, na mangin, a ngengzet le a maksanmi, a ngo zetmi le a de zetmi zoh ten a lauhuaimi milim na mai a din cu mu ci.
32 A lu cu sui ngek tuah bawlmi, a awm le a khut cu ngun tuah bawlmi le a tai le a kawng cu daal tuah bawlmi hi.
33 A kete cu thik tuah bawlmi le a ke phalh cu a lang thik, a lang taklei tuah bawlmi hi.
34 Mah milim cu na zoh lih laih takin kuamah i zen ngawlmi suangpi pa khat cu amahno in lum cawm a, thik le taklei tuah bawlmi a ke cu khiakin, keh let khawng hi.
35 Thakhatin thik, taklei, daal, ngun le suite cu keh noi khawngin, a khal hun ten cangngawinak mun a, leivul bangin suak khawng haw hi. Mah leivulte cu huihin, a them hei umngawl tianin mutvawk khawng hi. Mah suangpi cu khang pepelin mual ngengpi suak a, lei buppi khuh khawng hi.
36 “Na mang cu mahte hi. Maw kumpi pa, na mang i sullam cu atu-in hilh tung.
37 Kumpi bawipa, nang hi kumpi hempoh lak pen a ngengbel le thawmngengbel ci. Vancung Pathian in kumpi hempoh lak pen a ngengbelah bawlin, huham, ngilnak le minthannak pia hi.
38 Mihing umnak leihum hempoh uktu tuk bawlin, ngamsa le vano tei hum hei ah uktu in bawl hi. Nangmah cu a lu sui hi ci.
39 Na nungten ngam uknak um tuk laih naven, nangma uknak zahin nase tukma. Mah nungten ngam uknak pa thumnak um tuk a, lei buppi uk tuk hi. Mahmi cu daal ngam uknak hi tuk hi.
40 Mahnung ten ngam uknak pa linak um tuk a, thik bangin a khohmi hi tuk hi. Mahti bangin a khoh hangin ihempoh sepkeh khawng tuk a, ektuah khawng tuk hi. Thikin ihempoh a sepkeh bangin a laihngawl a uknak hempoh cu sepkeh tuk a, ngawizan khawng tuk hi.
41 na mang a, na muh bangin a lu, a ke le a khut kakte cu a lang thik, a lang taklei hi. A sullam cu mah uknakin, a khen khekmi uknak hi tuk tihnak hi. Thik bangin ngilnak nei bok tuk hi, itahim titale thik le taklei a cawhhel hang hi.
42 A kezungte cu a lang thik, a lang taklei hi, a sullam cu mah uknak a lang cu cak tukin, a lang cu nawmtam tuk tihnak hi.
43 Na muh bangin thik cu taklei tuah cokhelmi hi. A sullam cu mah ngamuktu bawi ten hinnam khat le hinnam khat kopdunnak tukin hinnam dadang huaidunnak bawl haw tuk tihnak hi. Mahnaven, bawlsuak thei haw tukma, itahim titale thik le taklei cu cokheldun thei ma hi.
44 Mah ngamuktu bawi ten ngam a uk haw ten vancung a Pathian in, a bo awng ngawlmi uknak umtik tuk hi. Kuamah in mah uknak cu neh haw tukma hi; mahnaven uknak dang hempoh cu siatsuah khawng tuk a, kumkhua in kho tatuk hi.
45 Na mangin kuamah i zen ngawlin mual a, suangpi cu lum cawmin thik, daal, taklei, ngun le sui tuah bawlmi milim a seh cu mu ci. A thawmngeng Pathian in mailam a heng tuk mite kumpipa nangmah hilh hi. Na mang matmi cikcek hilh zo ing; mahten a sullam vang dik zetin hilh ciang zo ing,” ti hi.
Kumpi In Daniel Laksawng Pia
46 Mahten kumpi Nebuchadnezzar cu lei ah bokin, Daniel lakah biakpiaknak le adang piaknakte bawl tukin thupia hi.
47 Kumpi in, “Na Pathian hi pathian dang hempoh lak pen thawmngengbel hi; kumpi tei humah Topa hi a, thasiahhuai nate hilhciangtu Pathian hi. Hi cu thei ing, itahim titale thasiahhuai nate nangmah in hilhciang zo ci,” ti hi.
48 Daniel cu nadeh ngengzet pia in, laksawng mantamzet a piak nungten Babilon peng hotubelah bawl hi. Kumpi thudotmi tei lak pen hotubelin bawlbok hi.
49 Daniel i ngetsaknak hangin Shadrak, Meshak le Abednego cu Babilon peng sung thu vaihawmtu in bawl hi. Daniel cu kumpi innah nadektu in umcih nom hi.