11
1 Vancungmi Mikhael cu keimah bawmtu le humhimtu tukin dehvo neitu hi.
2 tu ka hilh tukmi hi thudik,” ti hi.
Izipt le Siria Uknak
Vancungmi in, “Persia ngam cu kumpi pa thumin uk hih haw tuk hi. A pa linak kumpi cu a dangte sangin hau saw tuk hi. A huham neih lai le a hauhbel hun laih takin Grik ngam zuam ngam tuk hi.
3 “Mahten ngalphazet kumpi pa khat tul tuk hi. A zal zetmi ngam uk tuk a, ama nuam bangin bawl ngaw ngoh tuk hi.
4 Mahnaven a huham neih hun laihtakin, a ukmi ngam cu lengkekin, khen li suak tuk hi. Ama casuan ahi ngawlmi ten kumpi dek haw tuk naven amah zahin kuamah in huham nei haw tukma hi.
Izipt le Siria Ngamte
5 Izipt kumpi cu ngilzet tuk naven a ngalbawi ngengbel pa khat cu, amah sangin ngil saw in, a ukmi ngam vang zal saw tuk hi.
6 Kum tampi nungten Izipt kumpi cu Siria kumpi tuah tang langkhatnak tuk laikhet bawlin, a canute vang a zi tukin pia tuk hi. Mahnaven mah laikhet cu ngeiphat tukma hi. Izipt kumpipa i canu, a pasal, a cate le amah zuitu umlawhte thah khawng hi haw tuk hi.
7 A ngei ngawlin Izipt kumpi canu i unaupih cu kumpi dek tuk hi. Siria kumpi ngalkapte do tuk hi, a kulhtian sung tian nawk tumin neh tuk hi.
8 A pathian milimte le a pathian dang haw lak a piakmi sui le ngun tuah bawlmi nate cu Siria pen Izipt ngamah pua kikleh tuk hi. Kum ngeipi sung lemdaihnak a um nungten,
9 Siria kumpi in Izipt ngam do tuk naven a nungkikleh kul tuk hi.
10 “Siria kumpi capa ten ngal do tukin tuangtim haw tuk a, ngalkap tamzet khawm haw tuk hi. Kumpi capa lak pen pa khatin, ngal tei sihsan khualnak cu tuilun bangin do tuk hi.
11 a thinukin Izipt kumpi in Siria kumpi cu do tuk a, ngalkap tamzet man tuk hi.
12 Mahti bangin a ngual zawhnak le Siria ngalkap tampi a thah hangin tuangkhawngzet tuk naven, ngual zo leleng tukma hi.
13 “Siria kumpi vang kikleh tuk a, masa sangin ngalkap tam saw deuh khawm tuk hi. A hun lemcang ten hiamnam phazet cawitu a ngalkap sialcelh ngawl tuah Izipt do tukin zuan tuk hi.
14 Izipt mi tampi cu a kumpi haw langpang in lehdo haw tuk hi. Daniel, na miphun sung pen mi suaksual khenkhat cu, muhnak a neih haw hangin langpang bok haw tuk naven sung haw tuk hi.
15 Mah hangin Siria kumpi in kulhtian khuapi cu kilin la tuk hi. Izipt ngalkap ten do thei haw tukma toh hi; a ngalkap sung pen a ngilbelte hei in do tukin tha nei haw tukma toh hi.
16 Ngalnehtu Siria cu dotu kuamah nei ngawlin ama nuam bangin bawl pepel tuk hi. Ngam Tiamah dingin mah ngam cu a khut sungah sum tuk hi.
17 “Siria kumpi in ngaldo tukin ngaisung tuk hi; a ngalkap hempoh mantum tuk hi. A ngal ngam siatsuah khawng tukin a ngalte tuah tankawmnak laikhet bawlin, a canute cu a zi tukin pia tuk hi. Mahnaven a tumtahmi cu bawlsuak tukma hi.
18 Mah nungten tuipi mawk ngamte do tuk a, ngam tampi neh tuk hi. Mahnaven ngamdang pa khat uktu in, amah cu neh tuk a, pualthaunak cu botik tuk hi, a pualthaunak cu amah Siria kumpipa i hum lala ah hengtik tuk hi.
19 Kumpi cu ama ngam ngal sihsan khualnak kulhtianah kikin, panmun la tuk naven, sung leleng tuk hi, mahten amah vang bo cih tuk hi.
20 “Ama nungten kumpi dang pa khat tul tuk hi. Mah kumpi in, a ngamsung sum khangtik nuamin, a khutnuai bawi pa khat hahin le a ngammi tei lak pen siah tampi khon tuk hi. A ngei ngawlin mah kumpi cu that haw tuk hi, mahnaven mipi muh le ngaldonak mun hei ah hi tukma,” ti hi.
Mi Ngilo Siria Kumpi
21 Vancungmi in hilhciang pepelin, “Mah kumpi domtu Siria kumpi cu mipha ngawl, mi sehuaizet tuk hi, kumpi hih theihnak lampi hei nei tukma naven upmawh khak ngawlin mizolin, kumpi thuneihnak cu sut tuk hi.
22 Amah dodaltu cu Pathian i Thiampi Sang ahi hei in, vawktul le lawltul hi tuk hi.
23 Laikhet bawlin ngam tampi zol tuk a, ngam neuno uktu hi naven ni khat nung ni khat ngil dedeuh tuk hi.
24 Amah in, a pu le pa tei bawl awng ngawlmi ngamhau, ngam lemdun sate nangawn do tuk hi. Ngaldonak pen a laksakmi le a lonmi nate cu amah a zuitute sem tuk hi. Ngal kulhtian tampi do tukin tum tuk naven a ngei ngawlin a hun bo tuk hi.
25 Izipt ngam do tukin ngalkap hangsan tampi la tuk a, Izipt kumpi vang amah do tukin ngalkap tamzet le ngilzet tuah mansa in um tuk hi. Mahnaven Izipt kumpi cu suamnak tawk tuk a, lawhting tukma hi.
26 A thudotmi ten siatsuah haw tuk, a ngalkap tampi thah hi haw tuk a, khenkhek khawng haw tuk hi.
27 kumpi pa nih cu cabuai pa khatah an kuang kilkawm haw tuk naven a lungmu haw cu pha ngawl kawm haw tuk a, pa khat le pa khat zoldun li thong haw tuk hi. A tuptah haw mi cu bawlsuak haw tukma, itahim titale a hun kim ma laih hi.
28 Siria kumpi cu a lonmi na hempoh tuah pinkik tuk a, Pathian mihing tei biakinn siatsuah khawng tukin pinleh tuk hi. Ama nuam bangin bawl ngaw ngoh in, a ngamah kik tuk hi.
29 A nungten Izipt ngam doleh tuk hi, mahnaven a masalam bangin hi thei tukma hi.
30 Rom miphun ten amah do tukin timbaw tuah hung haw tuk a, thinsu tuk hi.
Mahten a thinukin kikleh tuk a, Pathian mihing tei biaknak siatsuah tumtah lo tuk hi. Mai biaknak a taisantu tei ngaihsutnak piakmi cu zui tuk hi.
31 A ngalkap khenkhat ten biakinn nawngkaitik haw tuk hi. Nisial biakpiaknak cu botikin, ningdelhhuai le mullinghah koih haw tuk hi.Ref 11:31 Dan 9:27; 12:11; Mt 24:15; Mk 13:14;
32 Mah kumpi in awklawl zetin nadek tuk a, biakpiaknak nunghektu ten bawm haw tuk naven Pathian a zuitu ten do haw tuk hi.
33 Mipi lak a, hotu ten a cihnak haw cu mi tampi tei lakah kawm bok haw tuk hi. Mahnaven a ngei ngawlin mahmi khenkhatte cu ngaldonakah thi haw tuk a, khenkhatte cu mei tuah halkang haw tuk hi. Mi khenkhat cu a van haw lonsak hi haw tuk a, thawngah khiak hi haw tuk hi.
34 Mahti bangin thahnak a thuak lih laihtak haw in Pathian mite cu bopnak demno ngah haw tuk hi. Amuh pantu mi tampi cu mah i ngaihsut saknak hangin pantu hi haw tuk hi.
35 Mah dotu micip khenkhatte cu thahnak tawk haw tuk hi. Hiti bang thuaknak hangin mipite cu thiangtho deuh haw tuk hi. Pathian i tekmi hun tawpnak a hen laklawh cu hi bangin cang pepel tuk laih hi.
36 “Siria kumpi in, ama nuam bangin bawl tuk hi. Iti bang pathian sangin ngeng saw ing, tin tuangkhawng li tuk a, Cungnungbel Pathian sang hei in, nase saw ing tin, tuangkhawng tuk hi. Pathian bawlsiatnak a tawk laihngawl sung cu mahti bangin ti pepel tuk laih hi. Mahnaven Pathian in, a tumtah bangkekin bawlsuak tuk hi.Ref 11:36 2Thes 2:3-4; Mang 13:5-6;
37 Kumpi in, a pu le pa ten na a dehsak haw mi le numei tei a deihzet haw mi pathian dang vang imah simsial tukma hi. Iti bang pathian hei cu imah simsial ngawlin kinmawh kha tukma hi. Itahim titale pathian sangin ngeng saw ing tin amah le mah ngaisung tuk hi.
38 Mahti bangin ngal kulhtian a huptu pathian cu upat haw tuk hi. A pu le pa tei biak awng ngawlmi pathian lak saw ah sui le ngun, suang manpha le laksawng sunglawi dadang pia haw tuk hi.
39 A ngal kulh tiang tukin ngamdang pathian biatute mang tuk hi. Amah cu kohte uktu bawi hi ci tin, a sangtute cu upatnak, minphatnak, nadeh ngengpi le laksawngin leingam pia tuk hi.
40 “Siria kumpi i hun a bo tutuh toh ten Izipt kumpi in amah cu do tuk a, Izipt kumpi cu a ngilnak venghawng, a cipuh, a cipuh lengte le timbaw tampi tuah do bok tuk a, tuilun bangin ngam tampi do tuk hi.
41 Ngam Tiam tian do in, a thawng athawngin, that tuk naven Edom ngam, Moab ngam le Ammon ngam a tanglaih mite cu luat haw tuk hi.
42 Hi ngamte a do ten Izipt ngam hei luat tukma hi.
43 Izipt ngam tei a sel haw mi na manpha sui, ngun le a dang na manphate la khawng tuk hi. Libia ngam le Ethiopia ngam vang neh tuk hi.
44 nisuahnak lam le saklam pen a hengmi thuthangin, a thinsutik haw tuk naven do sesem tuk hi. Khua le ngam tampi siatsuah tuk a, mi tamzet that haw tuk hi.
45 A kumpi puanbukte hei cu tuipi le Biakinn dinnak mual laklawhah sa tuk hi. Mahnaven mahlai ah kuamah bawmtu nei ngawlin thi tuk,” ti hi.