3
1 Noh cu Khrih tuah nunnakah thawhtik zo na hih uh hangin na lungmu uh cu vancungah bulh un hi; Pathian taklamah a ummi Khrih i khunnak vancung khi ngaisung un hi.Ref 3:1 Saam 110:1;
2 Leihum a thilte ngaisung ngawlin, vancung a thilte ngaisung saw un.
3 Itahim titale le nohte cu thi zo in, na nunnak tatak uh cu Khrih tuah Pathian i sungah selin um hi.
4 Mahmi na nunnak tatak uh cu Khrih hi a, amah a langleh ten nohte vang amah tuah langkhatin, a sunloihnak co kawm bok tuk uh ci.
Nun Lun le Nun Thak
5 Nangmu sung a nadektu leihum pumpi deihnak, nupa sualnak le zohmawi ngawlmi ngamtatnak, tisa nopnak le hampumnakte cu nungtik toh pahsuh un hi. Hampumnak cu milim biaknak pa khat hi.
6 Hitih bangin thil sual a bawl haw hangin Pathian i thinuknak cu a thu a zui ngawltu tei humah heng tuk hi.
7 Ni dang laihin nangmuh hihim hi mahtih bang tisa deihnak i ukmi le a nungmi hi uh ci.
8 Mahnaven atu-in mahtih bang tisa deihnak cu na vawk khawng uh kul hi: thinuknak, thin pulhangnak le mi mitkemnak cu zam toh un. Mi zotsaknak awnkam le awnkam sia hihim na kam sung uh pen tultik pahsuh un hi.
9 Na nunlun uh cu duk zo na hih uh hangin pa khat le pa khat zoldun toh pahsuh unna,Ref 3:9 Efe 4:22;
10 nunnak thak cu a bawltu Pathian in ama mel bang tawto tukin catngawlin thaktik leleng hi. Mahti bangin a thaktiknak cu Amah cangkim zetin, na theih sesem theihnak tukin hi.Ref 3:10 Efe 4:24; Pian 1:26;
11 Mahti bang a hih hangin Gentail mi le Judah mi tih deidat dunnak umleh ma toh hi, vunceptan le tan ngawlin deidatnak umma toh hi, misil phun le ngamsa phun, sila le miluat tih deidat dunnak imah umleh ma toh hi; Khrih cu ihempoh hi in, ihempoh sungah um hi.
12 Noh cu Pathian i mihingte hi uh ci. Nangmuh it zetin, ama ca in, a tenmite hi uh ci. Mah hangin hehpihnak, niamkhiatnak, thinnemnak le thinsaunakte cu puan bangin silh un.Ref 3:12-13 Efe 4:2;
13 Pa khat le pa khat laklawhah lungmu muhdun ngawlnak le phuciaknak a um tale pa khat le pa khat ngaihthiam dunnak le zahdunnak nei un hi. Topa in, a ngaihdam bangin nohte vang pa khat le pa khat ngaidamdun un hi.Ref 3:13 Efe 4:32;
14 Mahten hi bang ziaza pha na neih uhmi i humah itnak bet hih un; itahim titale itnak cu ihempoh cangkim zetin, a khawmtuahtu le a lemtiktu hi.
15 Khrih i piakmi khenkhuai theihnak cu thu na son uhten na soncatnak hempoh uhah a hotu in bawl un, itahim titale hi lemdaihnak sungah um tukin Pathian in taksa pumpi pa khat sungah a sam mite hi uh ci. Mah hangin lungdamin um un.
16 Khrih i thu cu na lungmu sung uhah cangkimno in cam leleng hen. Cihnak namkim tuah pa khat le pa khat zilhdunin thapiadun un. Saam labu sung a la, apdunnak la le la thiangte sa un. Na lungdamnak uh cu la tuah Pathian thangphat un.Ref 3:16-17 Efe 5:19-20;
17 A Pa uh Pathian cu Khrih i hangin thang na phat uh tak, ihempoh na bawl uhten le na hilh uhten Topa Jesuh i minin bawl unna, hilh un hi.
Nunnak Thak Sungah Zomdunnak
18 Zite, na pasal tei thu ngai un; itahim titale Khrih zuitu na hih uh bangin, mahmi cu na bawl tuk uhmi hi.Ref 3:18 Efe 5:22; 1Pet 3:1;
19 Pasalte, na zi uh it unna, a hum hawah thunei leita pahsuh un hi.Ref 3:19 Efe 5:25; 1Pet 3:7;
20 Naupangte, Khrih zuitute na hih uh hangin ihempoh ah na nu le na pa uh i thu ngai un hi. Mahmi cu Pathian lungdamtiktu hi.Ref 3:20 Efe 6:1;
21 Nu le pate, na cate uh liat leita pahsuh un. A thin haw ngalnawm vawkin tha nau nom kha tuk hi.Ref 3:21 Efe 6:4;
22 Silate, ihempoh ah na Topa tei thu ngai un hi. A mitmuhnak haw bekah a lung haw kim hen tin, a thu haw ngai ngawlin; Pathian na launak uh saw ah, na lungmu ngangai uhin, a thu haw ngai un hi.Ref 3:22-25 Efe 6:5-8;
23 Ihempoh nadehnak uh ah mihing ca hi ngawlin Topa i ca in dek ung hi tih lungmu nei in, na lungmu tatak tuah dek un hi.
24 Mahten Topa in, a mihing tei ca in, a koihsami dehman cu pia tuk hi, tih khi cing leleng un hi. A na nadeh uh ngangai mi Topa cu Khrih khi hi.
25 Mahten kuakua hei hihen thil sual a bawltu cu thil sual a bawlman ngah bok tuk hi; itahim titale Pathian in thu a khen ten deidatnak nei ma hi.Ref 3:25 Daan 10:17; Efe 6:9;