2
1 Nangmuh penpan Laodisia khua mitei ca le bulpakin keimah thei ngawltu midang tei ca tianin, itih zahta in nadek kam ing tih khi na theih tukin deih ing.
2 Hitih bangin ka dehnak cu kua hei hihen ngalphatnak tuah dimin le itnak tuah pa khat le pa khat komdunin, na co ngah uhmi muannak cu cangkim zetin, a co theihnak haw tukin ka deihmi hi. Mahti bangin Pathian i thu-ipmi Khrih amah cu thei ngah haw tuk hi.
3 Khrih cu Pathian cihnak le a thu-ip hempoh theih theihnak tawhcang hi.
4 Mah hangin itihzah takin thupha bang ahi hei in, kuamah in nohte zol kha pahsuh hen.
5 Itahim titale ka pumpi cu mundangah um naven ka hawvang cu nangmu lakah um hi; mahten Khrih sung a, muannak na neih uhmi cu munkhatno ah khoh zetin, na din langkhatnak uh ka muh ten lungdamzet ing.
Khrih Sungah Nunnak Cangkim
6 Khrih Jesuh cu a Topa uh hi tih a pom ngah ciang zo uh hangin, amah tuah pehzomin nung un hi.
7 Ama sungah na zung uh thuk zetin mut unna, na nunnak uh cu ama humah inn bangin sa un; hilhsami na hih uh bangin upnak lamah cak sesem unna, lungdamnak tuah dim un.
8 Ngalling un! Mihing cihnak nemcuamnak a nei ngawl, pa khat le pa khat zoldunnak le cihnakte mangin kuamah in sila in bawl haw pahsuh hen. Mahti bang cihnak cu Khrih lak pen a hungmi kha haw ma hi; mihing le van le lei laklawh uktu hawvangsia tei thu le la zilnak pen a hungmi hi.
9 Itahim titale Pathian hihnak cu Khrih i mihing hihnak sungah cangkim zetin umin,
10 Amah tuah na pehzopnak uh i hangin nunnak cangkim noh tei lakah piak hi zo hi. Khrih Jesuh cu hawvang hempoh uktu le thuneitu hempoh tei humah Cungnungbel Topa hi.
11 Khrih tuah na pehzomdun uhnak hangin vunceptalhmi hi uh ci; mah vunceptalhnak cu mihing tei bawlmi kha ma hi. Khrih i hangin bawlmi hi a, sual nuamnak le tisa nopnak sung pen luat khi hi.
12 Itahim titale tuiphumnak na ngahnak uhin, Khrih tuah vui langkhatmi hi uh ci, mahten tuiphumnak na ngah uhten thihnak pen Khrih a tholehtiktu Pathian huham cahnak mual na neihnak uh i hangin Khrih tuah thawhtikmi hi bok uh ci.Ref 2:12 Rom 6:4;
13 Ni dang laihin, na sualnak uh hangin le Daan pawlam a ummi Gentail mi na hih uh hangin hawvang lampialin mithi hi uh ci. Mahnaven atu-in Khrih tuah munkhatah Pathian in nungtik zo hi. Pathian in, a sualnak uh hempoh ngaidam khawng zo.Ref 2:13 Efe 2:1-5;
14 A sualnak leiba sialsiahnak cazin sung a ummi, mi a ken lotu daan neunote tuah thinglamteh humah khencihin phiat mai khawng zo hi.Ref 2:14 Efe 2:15;
15 Mahten hawvang uktu tei huham cu thinglamteh pen siatsuah khawng a, ngalmatmi sal bangin pui khawng hi.
16 Mahti bang a hih hangin kuamah in, na in, na eih tuk thu ah hihen, can tuk ni thiangtho thu ah le ha thak puai thu, sabbath thu ah hihen; daan bawlsak haw pahsuh hen.Ref 2:16 Rom 14:1-6;
17 Mahti bang zui tuk le zui tuk ngawl tihmi cu, a hengleh tuk laihmi lak hamnak bek hi haw hi. A ngangai mi cu Khrih hi toh hi.
18 Muhnak a cuangin nei ing tin midang sangin dangsa cuangin, a ngaisung duntu tei muhnak bekah niamkhiat cuang ing, a tiduntute le vancungmi a biatu ten hihen, kuamah in sual nawn haw pahsuh hen, Mahti bang mite cu sullam imah nei ngawlin mihing ngaihsutnak thongah tuangkhawng haw hi.
19 Mahten taksa pumpi bang a himi pawlpi i lu Khrih cubel saw ngawlin zamsan haw hi. Lu a himi Khrih lak pen pumpi cu nunnak ngahin, nguhmang pehdunnak le thazung ten len khawm haw hi. Mahten pumpi cu Pathian i deihnak bangin khangto hi.Ref 2:19 Efe 4:16;
Khrih Tuah Thi Langkhat, Nung Langkhat Tuk
20 Khrih a thih ten nohte vang cu thi bok uh ci; mah hangin van le leihum uktu hawvang i khut sung pen nohte luat zo uh ci. Mahti bang hi na pi in, itakaw leihummi bangin na nun uh laih? Daan noinang ten,
21 “Zen pahsun,” “Tep pahsun,” “Tawngkha pahsun,” a tihmite cu ita zui nuam laih uh cim?
22 Hi daan noinangte hi cu, vei khat man ngah ten a nemcuamleh ngawl tohmi, mihing tei bawlcopmi dan le zilhnak bek hi.
23 Vancung mite bia un hi, tih a sodunlo hawnak le mitei muhnak bekah niamkhiatnak nei cuang bangin a umnak hawah le amu pumpi lala a bawlsiatnak haw humah hi daan neunote hi cu micip daan bangin za tuk uh hi. Mahnaven tisa nuamnak nehnak tatak tukin nemcuamnak imah nei haw ma hi.