4
1 Tote aw, na sila uhte na zoh uhten a man le lamcamno in zo un hi. Nangmuh vang vancungah To nei bok uh ci tih khi phawkngil pahsuh un hi.
Hilhhawlnak
2 Zuam zetin thungen un; thu na nget uhten, Pathian nelah lungdam thu hilh thahin, lungmu tak tuah ngen un hi.
3 Mahtin na nget uhten Khrih i thu-ip phuan theihnak hunpha cu Pathian lak pen a ngah theihnak tuk uhin keimu ca vangin thunget sak bok un hi. Atu thawnginn sung ka umnak hei hi, mah thu ka phuannak hangin hi.
4 Mah hangin, Khrih i Thuthang ka phuan ten celzet le a hihnak bangkekin ka phuan theihnak tuk thungetsakin hi.
5 Umngawltu tei lakah na um uhten cihnak tuah um unna, hunpha na neih uhmi hempoh cu ngeikheizetno in mang un hi.
6 Na awnkam uh cu zaknopmi le a mawimi hihen na, mi hempoh tei thudotmi cu cangkim zetin hilh thei tukin zuam un hi.
Thukhupnak le Nuksatnak
7 A ihzet uhmi a unaupih uh Taikhikas in, ka thu le la hempoh cu hilh khawng tuk hi. Amah cu Topa i nadehnakah ka nadehpih uh hi a, muantak zetmi hi.
8 Mah hangin nangmuh thapiatu tukin le iti bangin kaw a umdan uh tih a hilhtu tukin nangmu lakah hawhtik ing.
9 Amah tuah munkhatah Onesimas vang hung bok hi. Onesimas cu ka ihzet uhmi le ka muanzet uhmi a unau uh, nangmu lak a sungtel hi. Hilai a thil a piangmi hempoh cu amuh ten hilhleh haw tuk hi.
10 Keimah tuah thawngta boktu Aristarkas le Barnabas i tupa Marka ten nuksat bok haw hi. (Marka nangmu lakah a heng tale phano in, na sang un hi; tih cu thuthatnak ngah zo uh ci.)
11 Justas tih hei in sammi Joshua in nuksat bok hi. Himi pa thumte hi Judah mi sung pen thinthekmi hi haw in, Pathian ngam ca in keimah tuah nadektute le a bawm litute haw hi.
12 Epafras in nuksat bok hi, amah cu nangmu pawlah sungtel hi a, Khrih Jesuh i nadektu hi. A lungmu tatak tuah nangmu ca thungen lelengin, kho zetin, na din theihnak tukin, Khristian lamah piting na hih theihnak tukin le na upnak uh thu na theihciang theihnak tukin Pathian nelah ngen mek hi.
13 Haksa zetin nangmu ca hihen, Laodisia le Heirapolis khua mitei ca vangin na a dehnak cu bulpak loli in, a theihpihtu ing.
14 A ihzet uhmi sibawi Luka le Demas hei in nuksat bok haw hi.Ref 4:14 2Tim 4:10-11; File 24;
15 Laodisia ah a ummi a u naupih uhte le Nimfa le a inn a khawmmi pawlpi mite vang nuksat ung; na hilhsakleh un.
16 Hi laikuat na sial ceng uhten Laodisia Pawlpite vangin, sial bok loli tukin ngaihsutpih un hi. Mahten Laodisia a um a unau uhten, ka laikuat uhmi kuat pepel haw tuk a, noh ten mahmi cu sial bok un hi.
17 Mahten Arkhippas khi, “ Topa i nadeh a thiah haw mi cu dek suak loli tukin umin,” tin hilhsak un hi.Ref 4:17 File 2
18 Paul in nuksat ing hi tih hi keima khut loli tuah ka ngatmi hi. A khihnak haw thik taicin khi phawkngil pahsuh un!
Pathian hehpihnak na hum uhah um tahen. Amen.