KOLOSE
Khua Khristian Tei Lakah Paul i Laikuat
(Paul’s Letter to the Colossians)
Thulamsial
Kolose khua Khristian tei lakah Paul i laikuat hi, Asia minor ngamsung a khuapi pa khat Efesa khua pen nisuahnak lam a ummi Kolose pawlpi tei humah a kuatmi hi. Hi pawlpi hi Paul i dinsuahmi kha ma naven a nadehnak ngam sungah a um hangin Paul in deh tuk dehvo nei ing hi tin ngaisung hi. Asia ngam, Rom acozah tei ukmi ngamsung a khuapi Efesa khua pen mahlai khua ah Pathian nadektu hah hi. Paul in Kolose ah zilhdunnak man ngawl zilh litu um haw hi tih thu za hi. Mahmi ten mi pa khatin Pathian a theih theihnak tukin le nunpatnak cangkim a co theihnak tukin, “Thuneitu le hawvang lam uktute,” (2:8-20) tihmi a biak uh kul hi, tin ti haw hi. Mah i humah hi zilhtu ten umtute vuncep a tan haw kul, eih le in dante vang a zui haw kul hi, tin bet haw lalaih hi.
Paul in hi zilhnak cu Khristian tei thuthang thuman tuah a ngaldunmi hi tin ngan hi. A lai sungah a hilhnuammi cu; Jesuh Khrih in nunpatnak cangkim pia thei in, a dang upnak le bawldan ten Jesuh lak pen mite pial vawktik theitu saw hi tin ti hi. Khrih i sung pen Pathian in lei le van bawl a, mah Khrih sung lelengah pia in, ama lakah pui kikleh tuk hi. Khrih tuah pehzop dunnak bekin leihum cu nunpatnak ngah tuk hi tin muansannak um hi. Mahten Paul in, hi Thuthangpha hi umtu tei ca in nisial a nunnak uhah iti bangin sullam nei him tih langtik hi.
Hi laikuat cu Kolose khua ah Taikhikas in pua a, Taikhikas cu Onesimas in zui hi. Onesimas cu sal hi in, Paul in ama ai-awhin Filemon lakah laikuat a ngatsakmi khi hi.
1
1 Kolose khua a ummi Pathian i mihing, Khrih tuah na pehzopnak uh i hangin muantakmi Khristian unaupihte aw, nangmu lakah,
2 Pathian i lungkimnakin Khrih Jesuh i palai keimah Paul le Khrih sungah a unau uh Timote in laikuat ung hi.
A Pa uh Pathian in, a thupha le lemdaihnak thupha pia zal tahen.
Lungdamsat Thungetnak
3 Nangmu ca thu ka nget sial uhten a Topa uh Jesuh Khrih Pa le a Pathian uh i lakah lungdamnak thu hilh leleng ung hi.
4 Ita lungdamnak thu hilh kam ung titale Khrih Jesuh na upnak uh le Pathian i mihing hempoh tei lakah itnak na neih uh khi ka zak uh hangin hi.
5 A manmi Thuthangpha na nel uhah a hen tungin, iti bang muansannak pia him tih cu nangmuh ten thei uh ci. Mah hangin upnak le itnak na neih uhmi cu vancungah nangmu ca in cangkim zetin koihsami muansannak humah bulphuh haw hi.
6 Pathian i hehpihnak na theih masakbel ni uh pepan atu tian, Thuthangpha in muicu cu nohtei lakah henpihin leihum khua hempoh ah zaitik hi.
7 Pathian i hehpihnak cu Epafras i lak pen na theih uhmi hi. Amah cu ka ih zetmi ka nadehpih uh, keimu ai-awhin muantak zetin Khrih i nadektu hi.Ref 1:7 Gal 4:12; File 23;
8 Amah in Hawvang i piakmi itnak na neih uhmi thute hilh hi.
9 Hitih bangin na thu le la uh ka theihbek uhten nangmu ca thungen leleng ung. Pathian in ama deihnak theih theihnak tukin Hawvang i piakmi cihnak le theihtupnak tuah a dimtiknak tukin Pathian nelah ngen ung hi.
10 Mahten Topa i deihnak bangin nung thei tuk uh ci, amah lungdamtik leleng thei tuk uh ci. Mahten na nunnak uhin ngah pha a phunkim ngah tuk a, Pathian na theihnak uhah khangto pepel tuk uh ci.
11 Ihempoh na tawh uhten thinsaunak le thuak theihnak nei tukin Pathian sunloihnak pen a tulmi thazaangin ngilnak pia zal tahen.
12 Vaknak ngam sungah Pathian in, a mitei ca tukin a koihmi cu a cotu hi bok tukin a semsuahtu Pathian cu lungdamin thangphat un.
13 Amah in khuathimnak huham sung pen ohte pan suakin, a Capa i uknak sungah ohte tumpih zo hi;
14 A Capa i thisan hangin sualzahnak ngah hung a, miluat hi zo hung hi.Ref 1:14 Efe 1:7;
Khrih i Mihing A Hihnak le A Nadeh
15 Khrih cu muh theih ngawlmi Pathian i mel langnak hi. Amah cu ca upabel hi a, bawlmi thil hempoh sangin humtabel hi.
16 Itahim titale Pathian in Khrih i sung pen ihempoh vancung le leihumah hihen, muh theihmi le muh theih ngawlmi hihen, hawvang lam cahnak huham neitute, bawite, uktute le thuneitu hei hihen bawl hi. Pathian in van le leihum hempoh Khrih sung pen, bawlin, Khrih ca in hulawmdun khawng tukin bawl hi.
17 Khrih cu ihempoh tei umlaih ngawlin um zo in, amah tuah a pehzomnak haw hangin ihempoh cu amu umnak tuk tek nei haw hi.
18 Pawlpi cu Khrih i taksa pumpi hi a, Khrih cu a lu hi. A pumpi i nunnak bulpi cu Khrih amah hi. Amah cu capa tawntil hi a, ihempoh i humah pa khatnak a hih lelengnak tukin thihnak pen thawhlehtik hi zo hi.Ref 1:18 Efe 1:22-23;
19 Capa in ama sungah Pathian hihnak cangkimin, a neihnak cu amah Pathian i leitek sa hi.
20 Mahten a Capa i sung pen lei le van cu Pathian i lakah kiklehtik nuam hi. Pathian in, a Capa thinglamteh hum a, thisan i hangin van le lei a thil hempoh tuah lemnak bawlin mahten ama lakah pui kikleh hi.Ref 1:20 Efe 2:16;
21 Ni dangin thilpha ngawl na bawlnak uh hangin le na ngaihsut uh hangin, Pathian tuah khawladunin, a ngal hi uh ci.
22 Mahnaven atu-in, a Capa i taksa pum loli in thihnak a thuaknak i hangin, Pathian in, a ngualcamin bawl hi. Mahtin a bawlnak cu a mai ah mi thiangtho, sualnak nei ngawlin le sonbang ngawlin hentik a nuamnak hangin hi.
23 Mahti bang a hih hangin na bulpatnak uh a kho zetmi humah kho zetin upnak tuah ding leleng un hi; Thuthangpha na zaknak uh pen na co ngah uhmi muansannak tuah kuamah in khen haw pahsuh hen. Hi Thuthangpha i ca in, keimah Paul hi, nadektu hi ing a, leihummi hempoh tei lakah a hilh haw mi Thuthangpha hi.
Paul i Pawlpi Ca Nadehnak
24 Nangmu ca haksatnak ka thuakmite hangin lungdamnak nei ing hi; itahim titale ka pumpi in ka tawhmi thuaknak i hangin, Khrih in ama pumpi pawlpi ca in haksatnak a tawhmi khi kimtik bok ing.
25 Kei cu pawlpi nadektu in bawl zo hi. Hi nadeh a piakmi cu nangmu nemcuamnak tukin hi. Mahmi cu Pathian i Thuthangpha cangkim zetin phuanmi khi hi.
26 Mah Thuthangpha cu khang tampi sung a koi hinnam lakah hei hihen, phuang ngawlin ipcihmi hi a, tu bek hah a mihing tei lakah phuanmi Thuthangpha hi.
27 Pathian i tuptahmi cu mi hempoh tei ca in ngaihsutsa mi a sunglawi le nalamdang thu-ip cu atu-in, a mihing tei lakah langtik tukmi khi hi. Mah a thu-ip cu nangmu sungah a ummi Khrih a tihnuammi a hih hangin Pathian i sunloihnak khi kawm bok tuk uh ci tihnak hi.
28 Mah hangin a kuakua i lakah hei in Khrih cu phuang ung hi. Mi hempoh tei humah cihnak ka neih uhmi hempoh mangin ngallinnak thu hilhin zilh ung hi. Mahti bangin ka tihnak cu akua abang hei hihen Khrih tuah a pehzopnak haw i hangin, Khristian piting hi in, Pathian mai ah henpih ka nuam uh hangin hi.
29 Ahi cu deksuak tukin amah Khrih i piakmi cahnak, ka sung a, nadektu mangin nase zetin thuaklo in, nadek li ing.