4
Thu Zilhnak
1 Ka ihmi u le naute aw, nangmuhte ngaizet ing. Nohte hi keimah nemtu hi uh ci, ka ultunnak sui lukhuh hi uh ci. Ka ihmi u le naute aw, hi bangin Topa i sungah na nunnak uh cu khoh zetin ding lelengta un.
2 Euodia le Syntykhe, nangmu lakah hehpihnak ngen ing hi. Topa i deihnak zui in, na lungmu uh munkhat tukin zuam un.
3 Mahten nang, muantak, ka nadehpih, hi numei pa nihte hi keimah tuah nadek langkhat mite haw a hih hangin na bop tuk vang deih bok ing. Clement le Pathian i nunnak laibu sung a min khummi ka nadeh pih hempoh tuah Thuthangpha zaitik tuk keimah tuah nase zetin nadektu hi haw hi.
4 Topa tuah na pehzopnak uhah lungdam leleng un; notleh hih tung lungdam leleng un!
5 Mi hempoh tei humah lungnem un. Topa cu hungpal tuk hi.
6 I thu ah hei hihen lungmu tamin, um pahsuh un; thu na nget uh sial ten na kul uhmi cu Pathian nelah ngen unna, lungdam thatuino in ngen poh un hi.
7 Mahten mihing tei ngaihsut bat ngawlmi, Pathian i lemdaihnakin, na lungmu uh le na ngaihsutnak uh cu Khrih Jesuh tuah na pehzomnak uh sungah himdamno in koih tuk hi.
8 Thukhupnakah, u le naute aw, na lungmu uh cu a phami le pahcoih tak hihnak tuah dimtik un. Thumanmi, nun paalloptak, a dikmi, a thiangthomi, a deih awhmi le minphatnak a nei mite cu na lungmu sung uhah umtik un hi.
9 Keima lak pen na ngah uhmi le na zilnak uh bangin zui tum un hi. Ka awnkam le ka dehnak tuah ka lakmi cu zui un hi. Mahten lemdaihnak a piatu Pathian cu nangmu lakah um tuk hi.
Laksawngte Hangin Lungdamnak
10 Keima ca na ngaihsutnak uh cu hun ngeipi nungten lang lehtik uh ci a, a Topa uh tuah a pehzomdunnak uh i hangin ka lungdamzet ing. Hitih bangin ka tih ten keima ca imah ngaisungleh ma uh ci, ka tihnak kha ma hi; a langtiknak tuk hun na ngah uh ngawl hangin hi saw hi.
11 Nunghek zo haw toh bang um si le, tin ka ngaihsutnak hang hei in ka sonmi kha ma hi. Thu ngangai in titale keima neihnak zahno tuah lungkim zetin um tuk khi thiam zo ing.
12 A tingsam liamluamin um cu iti bang him tihvang thei zo ing, mahten a valin neihmi vang iti bang him tihvang thei ngah zo ing. Mahti bangin umdan a kuhno cu ka cun ngah zo hangin ilai banglai ah hihen, itih bang hunah hei hihen, ka vonvahah hei hihen, ka ngilkialin hei hihen, demno ka neih ten hei hihen, tampi ka neih ten hei hihen, lungmu nop zetin um thiam zo ing.
13 Khrih i piakmi huham tuah ihempoh nawkzawh theihnak ngilnak nei zo ing.
14 Mahnaven haksatnak ka tawh hun ten kei na bop theih uh cu miphazet uh ci.
15 Nangmu Filipi khua miten na theih khawng sa uh hi. Thuthangpha phuangin nadeh ka pattung laih hawng khin Macedonia ngamsung pen ka tul ten keimah bawmtu pawlpi cu nangmuh bek uh ci. Ka sunnak le ka metnakah nohte hi a theihpihtubel hi uh ci.Ref 4:15-16 2Kor 11:9;
16 Thesalon pen bopnak ka kul ten bopnak vei khat bek hei hi ngawlin kuat uh ci.Ref 4:16 Nung 17:1;
17 Ka deihmi cu na laksawng uh ngah tuk bek hi kha ma hi; nangmu cazin sungah a met um bok hen tih hi lak nuam ing.
18 Atu na piak uhmi hempoh cu ngah ing hi tin ngan ing. Na piak uhmi cu a kulmi sangin a val tianin pia uh ci. Na laksawng uh hempoh cu Epafroditas in puakin, atu-in ka kincak hempoh cu ting khawng hi. Hi na laksawng uhte cu Pathian i lungdammi le a cosanmi biakpiaknak, a namtui mi pak namtui bang haw hi.Ref 4:18 Suah 29:18;
19 Mahten ihempoh cangkimin Khrih Jesuh i sung pen ka Pathian in, na kul uhmi hempoh cu pia tuk hi.
20 A Pathian uh le a pa uh i lakah thangphat sunloihnak cu kumkhua in um leleng tahen! Amen.
Thukhupnak le Nuksatnak
21 Pathian i mihingte, Khrih Jesuh ta ahi mi hempoh nuksat khawng ing. Keimah tuah a um langkhatmi Khristian unau pih dangte vangin nuksat bok haw hi.
22 Hi munah a ummi Pathian i mihingte a venghawngin le kumpipa i innah a umte hei in, a dangno in nuksat haw hi.
23 Topa Jesuh Khrih i hehpihnak thupha cu na venghawng uh i humah um leng zal tahen.