9
Khristian Tei Bopdunnak
1 Judah ngam a, Pathian umtu tei lakah bopnak na kuat uhmi thu ah nangmu lakah laikuat kul tukin ngaisung lawlawm mang hi.
2 Mi bawm nuam uh ci tih cu thei zo ing, Macedonia ngam a ummi tei lak pen nangmu thu cu tuangkhawn pih li zo ing. “Akhaia ngam a ummi a unaupih uhte cu mi bawm tukin nung kum pepan ngalling zo haw toh hi,” tin ti ing. Nangmuh tei lungthonak hangin mi tampi lawpzet bok haw hi.
3 Atu-in, a unaupih uhte ka huntik sannakbel cu nangmuh tei thu hangin ka uangkho lihnak uh hi sullam nei ngawl, uangkhonak awnkam thongin cang ma hen, tih ka deihnak hangin hi. Mahnaven ka hilhsa bangin bopnak piak tukin na tuptah uhmi tuah tuangtim sa in, na um un.
4 Mah kei ka hun ten Macedonia ngam a, ka ngualcam ten, a zui kha thawthong haw bang ahin, ngalling ham ngawlin na tawk kha uh tale, nangmuh tei zahcak tuk sial ngawl, keimuh hihim itih zahin zakca tuk kam ung?
5 Mah hangin keimah ka hen laih ngawlin hi a unau uhte hi hah ung hi; mahten piak tukin na tih sa uh laksawng tuangtim hamsa khawngin um tukin vaihawmnak nei ing. Mahten ka hen ten sonsa khawngin um tuk a, piak a kul hangin pia hi ngawlin piak na nuam uh hangin pia, tih khi lang tuk hi.
6 Anci demno a pawi ten an demno cawm haw tuk a; tampi a pawi ten tampi cawm bok haw tuk, tih hi cing leleng un hi.
7 A kuakua in hihen a lungmu in, a khencat ceng ten pia hen, ihcilnak tuah pia pahsuh hen, ka deh phu hi tih hei in pia haw ma hen. Lungdam thatuino in, a piate bek Pathian in deih hi.
8 Mahten Pathian in, na kul uhmi sangin tam saw pia theitu a hih hangin nangmu ca a kulmi pawpoh khamthamin nei tuk uh ci a, thilpha na bawl uhmi i humah a valin ngah tuk uh ci.
9 Lai Thiangtho in;
“Phal zetin mi ca-ngahte pia hi;
a hehpihnak cu kumkhua in kho hi,” ti hi.Ref 9:9 Saam 112:9;
10 Mahten pawi tuk anci a piatu le eih tuk an a piatu Pathian in, na kul uhmi anci hempoh pia tuk hi. Mahten phal zetin, na piak uh hangin na ankungte uh vang khangtikin, an tampi ngah tuk uh ci.Ref 9:10 Isa 55:10;
11 Pathian in phal zetin piatu hi leleng tukin an khamin, nungcatik tuk hi; mahten laksawng na piak uhmi cu keimu lak pen a ngah haw ten mi tampi ten Pathian thangphat haw tuk hi.
12 Itahim titale hi na nadeh uhmi in Pathian umtu tei tingsapnak tampi bop bek sial ngawlin, mihing thin sung pen Pathian pahcoihnak tampi piangtik hi.
13 Hi na nadehnak uhin, a langciangtik hangin Khrih i Thuthang na pom uhte khohkhah zetin, na din theihnak uh hangin hihen, na bop uhmi le midangte tuah phal zetin, na neih uhmi na piak kawmnak uh hangin hihen mi tampi ten Pathian nelah lungdam thu hilh haw tuk hi.
14 Pathian hehpihnak thupha tam cuangin, na hum uhah a hen hangin nangmuh deihsak zetin nangmu ca in thungen haw tuk hi.
15 Son zawh ngawlin a sunglawimi Pathian i laksawng ca in lungdam thu a lakah hilh ten nung hi.