8
Khristian Ahlu
1 U le naute aw, Macedonia ngam a pawlpi tei lakah Pathian in, a hehpihnak hangin thil a bawl suakmite hi thei bok tukin deihsakzet bok ung hi.Ref 8:1-4 Rom 15:26;
2 Haksatnak namkim tawkin, khingkhainakte nase zetin thuak haw, mahnaven lungdamnak a neih haw, a nasezet hangin amuhte cu zawng em haw naven phal zetin sumpi pia haw hi.
3 A piak theih tawk tianin pia haw tih hi nangmu lakah ka hilh nuammi hi; a piak theih haw tukmi i hum tianah pia haw laih hi.
4 Judah ngamsung a Pathian i mite bopnak tuk nadeh sak bok tukin hi bangin amu nuamnak lungmu tuah ngen haw hi.
5 Himi hi lungmu neuno hei in ka ngaihsut khak ngawl uhmi hi. A masabelin Pathian nelah a nunnak pia haw hi. Mahten Pathian i lungdamnakin keimu lakah vangin pia haw hi.
6 Mah hangin nangmu lakah nadeh a pantu Titas hi, a nadeh dek zom tukin le midang tei nemcuamnak tuk nadeh dek suaktu tukin a bawm tukin ka hanthawn ung hi.
7 Nohte cu upnak, thu hilh theihnak, midang bop nuamnak le keimuh na itnak uhah ngengzet uh ci. Mah hangin itnak nadehnakah hei in, midang sangin zalen zetin, na um tuk uh deihsakzet ung hi.
8 Zui tuk dan ka bawlmite imah umma hi. Mi na itnak uh iti bang ngai hum tih thei nuamin, midang ten mi a bop nuam haw dan ka laknak hi.
9 A pa uh Jesuh Khrih i mi a hehpih daan cu thei uh ci. Amah cu hauzet naven nangmu hangin mi ca-ngah zetin cang hi; Mahti bangin a zawnnak cu mihau na hihnak tuk uh a deih hangin hi.
10 Nung kumin, na pat awng toh uhmi dehvo khi atu-in, ceng le uh ci pha tin ngaisung ing. Hi nadehnakah a dek bek hei hi ngawl deh nuamnakah vangin a masabel uh ci.
11 Na nadeh uh cu cawl ngawlin, a ceng tian dek un hi. A pattungin, na ngahhelhzet uh bangin a celh tuk lamah vang lungtho zetin dek ceng tukin ngaisung unna, na neih pawpoh uh pia un hi.
12 Phalnak lungmu na nei uh tale na piak uhmi Pathian in cosang tuk hi; Pathian in, a neih ngawl uhmi ngen ma hi.
13-14 Midangte bopnak piak nuam hangin noh tei humah vanngit suan toh tum mang hi. Mahnaven tu laihtakin, neinung zetin, na um uh hangin a zawngte na bop tuk uh cu mawi ma maw? Mahten nangmuhte zawngin amuhte a hau haw tale amuh ten huhleh haw tuk hi. Mahten bangtenin cosanmi hi tuk uh ci.
15 Lai Thiangtho sungah vangin, “Tampi a cawmtu ten tamzet nei sap haw ma hi, dawmno a cawmtu vangin dawm leita in nei cuang haw ma hi,” tin um hi.Ref 8:15 Suah 16:18;
Titas le A Ngualcamte
16 Nangmuh bawm tuk ka nuam uh bangin Titas vang nangmuh bawm tukin a thathozet bok hangin Pathian nelah lungdam mahtak ung hi.
17 Ka hah uhmi a lungkim bek tham ngawlin nangmuh a bop tuk cu nuam leita in ama thuno in nangmu lakah a heng tukin khencat zo hi.
18 Amah tuah unau pih pa khat munkhatah hawhtik ung. Amah cu Thuthangpha phuangin Pathian nadektu hi tin pawlpi hempoh tei upatmi hi.
19 Mahbek tham ngawlin, amah cu Topa i sunloihnak tukin, mi ca ngaisungin, na ka dehnak uhahin le bop tuk na nuamnak uh langtiknakin keimuh tuah khualzin langkhat tukin amah cu Khristian tei a ten haw mi le nadeh a thiah haw mi hi.
20 Hitih bangin phal zetin piakmi laksawng thu ka sonnak uhah sonsiatnak um kha tuk ngawlin ngallingzet ung hi.
21 Ka tuptah uhmi cu Topa i mitmuhnak bekah hi ngawlin mihing tei muhnakah vangin thildik bawl tuk khi hi.Ref 8:21 Thup 3:4;
22 Mahten amuh tuah a unaupih uh a dang pa khat vang hah vanglak ung hi. Amah cu vei tamzet khingkhai zo ung a, mi bawm nuamzet tih mu ung hi. Atu vang cu nangmu humah muansannak nei in, nangmuhte bop tuk cu a lungtho sesem hi.
23 Titas cu ka nadeh pih uh hi a, nangmuhte bawm tukin dek langkhat leleng ung hi; amah tuah ka cial langkhat uhmi a unaupih uhte vang pawlpi ai-awhtu hi haw in, Khrih lakah sunloihnak hengtik tute haw hi.
24 A hum hawah na itnak uh cu langtik un; mahten pawlpi ten mah thu cu thei ciang ten haw tuk a, nangmu ca ka ngalpihnak uh vang cu thuman hi, tin thei haw tuk hi.