10
Paul In A Nadeh A Dinpihnak
1 Munkhatah a umlangkhat ten uh laihin, a nun pha zetin, a awnkam nem tin ti uh ci a, khendun nungten ti belbul na tih uh mipa keimah Paul in Khrih i hehpihnak le nunnemnak lungmu tuah ngen ing.
2 Nangmu lakah ka hen ten ti bengbungin ka um kul tuk ngawlin na um zal un hi. Itahim titale a nadehnak haw hi leihum hampumnak lungmu tuah nadek haw poh ma maw, a titu tei lakah hangsan zetin ti thei bok ing.
3 Leihumah a ummi hung tih cu el tuk imah umma hi; mah hei in leihum deihnak lungmu tuah ngal do ma hung hi.
4 Ngaldonakin, a man uhmi cu leihum ngal hiamnam hi haw ma hi; a ngil zetmi Pathian i hiamnam hi saw a, ngalkhamnak kulhtian khohkhahzette siatsuahnakin, a man uhmi hiamnamte hi haw hi. Aman ngawlmi thu eldunnak cu siatsuah khawng hung hi.
5 Pathian theih theihnak tuk cihnak a khamtu pualthaunak cu phialet khawng hung hi. Mihing tei ngaihsutnakte cu sila bangin man a, Khrih thu ngaitu in cangtik hung hi.
6 Khrih thu ngaitu na cannak uh cu cangkim zetin, na langtik nung uhten thungai ngawlte cu dantat thei tuk hung hi.
7 Nohte cu thilte hi a pualam a mel bek zo uh ci. Kuamah in mahlai pen kei cu Khrih ta ing hi tin, a phuangtu um haw a maw? Mahti bang a um haw tale, a mahno ngaisung hih tahen, itahim titale Khrih ta a hih bang bokin oh vang hi bok hung hi.
8 Topa i piakmi thuneihnak cu a valdeuhin tuangkhawnnakah ka mang vangin zakca mang hi, mah thuneihnak cu nangmuh siatsuahnak tukin hi ma hi, nangmuh tundinnak tukin hi saw hi.
9 Hitih bangin lai ka kuatmi in nangmuhte lauthawng hemhumtik li tukin awi mang hi.
10 Mi khenkhat ten, “Paul i laikuatte hi khohkhahin mualneizet, naven amah ngangai eimu lakah a um ten imah nge ma, a otmi vang mual nei ma,” tin ti uh ci.
11 Mahti bang mihing ten ngalkhat lam pen ngatmi lai le nangmuh tuah um langkhat ten ka deh tuk uhmi dangdun cuangnak imah umma tih cu a theihtup haw tuk kul hi.
12 Mahti bangin sang zetin, a umcop li mite tuah tehkimdun vang ngam tukma hung. Thungai in titale a sil haw si! Amuh le amuh tehdunnakin, amuhno ngolhkang bawlcawm haw, mahmi tehnak ngolh tuah amuh le muh tehdun cop haw hi.
13 Mahnaven kohten ka ultung uh hei in, valthong tukma hi, Pathian i nadeh tuk piakmi ngamngi sung zong bekah um tuk a, mahmi ka nadehnak uh ciangtanmi sungah nangmu lakah, na ka deh uhmi vang tel hi.
14 Mahten nohte cu mahmi ngituah sungah a um na hih uh hangin Khrih Thuthangpha phuangin, nangmu lak ka hen uhten ngituah pualeu lam a hawhmi hi ma ung hi.
15 Pathian in ka deh tukin a koihmi i sunglam a, na a dektu tei nadehnakah ultung tuk imah nei ma ung hi. Mah sangin Pathian in nadeh tuk a piakmi ngituah sung bekah dekin mahten nangmu sungah a ngeng le a zal saw in, nadek thei tuk ung a, mahten na upnak uh khang sesem thei tukin tihmi saw hi ka muansan uhmi hi.
16 Mahten midang tei lo sung a nadehnakah tuangkhawng ngawlin nangmu ngam pualam, ngamdang saw ah Thuthangpha phuang thei saw tuk ung hi.
17 Mahnaven Lai Thiangtho i tihsa bangin, “Akua hei in tuangkhawng a nuam tale Topa i bawlsa mi thu ah tuangkhawng hen.”Ref 10:17 Jer 9:24;
18 Itahim titale mi pa kha khat cu amah le mah tawkzet ing, tin, a ngaihsut ten Pathian in sang ma hi; Pathian in pha tin, a ngaihsut bek ten cosang hi laih hi.