9
Tiikmi i Covo le Dehvo
1 Miluat hi ma ing maw? Tiikmi hi ma ing maw? A Topa uh Jesuh mu zo ma ing maw? Nohte cu Topa ca tukin ka nadehmi i a ngah hi uh ci,
2 Midang ten kei hi tiikmi in, a ngaisung haw ngawl vangin noh ten ngaisung uh ci. Itahim titale Topa tuah na pehdunnak uh hangin tiikmi ka hihnak cu khim khotiktu hi uh ci.
3 Midang tei sonsiat ten hi bangin pan mek ing.
4 Ka nadehmi hangin tui le an lawh zo bokma ing maw?
5 Tiikmi dangte, Topa i unaute cu Peter i bawlmi zui in, a khualzinnakah a zite a pui pepel haw bangin kei hei in Khristian zi pui theihnak thunei bokma ing maw?
6 Ahimata Barnabas le keimah bek maw pumcawmnak tuk nadek tuk?
7 Akua kaw mai tangka mangin ngalkap a dek awng? Lobungtu pa in, a lo sung pen a suakmi sabit cu ei ngawlin um awng maw? Tuucingpa in, a tuu nawitui in ngawlin um awng maw?
8 Nisial a nunnak uhah a tawh uhmi bek pen tehkipnak lak theih hi ti pahsuh un. Daan vangin hiti bang lelengin hilh hi.
9 Moses Daan sungah, “Cangciltu khuicang cu a muk ken pahsuh un,” tih um hi. Hiti bangin a um ten Pathian in khuicang i ca ngaisung hi a maw? Ahimata eimu ca ngaisungin, a tihmi maw?Ref 9:9 Daan 25:4; 1Tim 5:18;
10 Hilai i sullam cu eimuhte hi. Lei lettu hihen, cang attu hihen, cang covo nei bok tung tin ngaisungin dek tek haw hi.
11 Nohtei lakah hawvang anci vawh ung. Comi ka neih bok uhten tam leita hi; tin ngaisung uh cim?Ref 9:11 Rom 15:27;
12 Midang ten nohtei lak pen hiti bang ngah tuk a muang haw tale kohten tam deuhin muansan tukma ung maw?
Mahnaven mahtin ti ma ung hi. Mah hum pen Khrih i Thuthangpha hi khamtu nei sual kha kawn tih ka lau uh hangin ihempoh cu a thuakin thuak saw ung hi.
13 Nohten Biakinn a nadektu ten Biakinn pen an ngah haw a, biaklandawh a piatute vangin covo nei haw tih cu thei khawng leng uh ci.Ref 9:13 Daan 18:1;
14 Mahti bang bokin thuthang a phuangtute vangin a thuthang phuannak haw pen pumcawmnak ngah hen tih cu Topa i thupiakmi hi.Ref 9:14 Mt 10:10; Lk 10:7;
15 Mahnaven tutian cu hiti bang ka co theih mite hi la nuam hih sapma laih ing. Hi bangin lai ka ngatnak hei hi ka co tukmi ka co nuam hangin hi ma hi. Mahti bangin ka bawl tuk sangin thi nuam saw ing. A manmi ka uangthuannak hi imah ngawlin a suahtik haw tuk deih mang hi.
16 Thuthangpha ka phuannak hangin ultung theihnak nei mang hi. Hi bangin ka phuannak cu thupiakmi ka hih hangin hi. Thuthangpha phuang ngawlin ka um tale ka matan bing thong hi.
17 Ka nadehmi hi keima deihnakin ka tenmi ahi ahin dehman ngah tukin ngaisung kha tung hi. Mahnaven tu cu ka dehvo in koihmi hi. Itahim titale Pathian in ka lakah a apmi nadeh hi.
18 I kaw dehman comi le ngahmi ka neih? Dehman ka comi cu a man la ngawlin Thuthangpha ka phuan theihnak le lawhman la ngawlin Thuthangpha ca tukin ka dehmi saw hi.
19 Kei cu mi suakca ing. Kua ma sal hei hi mang hi. Mahnaven mi a tam theibelin pui thei tukin mi hempoh i sila in um ing.
20 Judah mitei lak a, na ka deh ten Judah mite leem ngah tukin Judah mi bangin um ing. Kei cu Moses Daan nuai ah umma toh na vengin Daan nuai a ummite leem tukin Daan nuai a nungmi bangin um ing.
21 Mahti bang bok lelengin Gentail mitei lakah na ka deh ten, Gentail mite leem ngah tukin Judah daan zui ngawlin Gentail mite bangin um ing. Hiti bangin ka um ten Pathian daan zui mang tihnak hi ma hi. Khrih i daan nuai ah um ing.
22 Upnak a dawm tei lakah upnak a dawmte leem tukin amuh bangin nung ing. Mahten iti bang lam ahi vangin amuhte ka pui ngah theihnak tukin mi hempoh tei lakah a nundan haw bangin nung pepel ing.
23 Hi thu hempoh hi Thuthangpha hangin ka bawlmi hi. A muicu vang midang tei co bok tukin ka deihmi hi.
24 Tai zuamnakah mi tampi tel mek haw naven pa khat bekin tai zuam man ngah hi tih cu na theih khawng uhmi hi. Mah hangin zuamman ngah tukin tai un.
25 Zuamdunnakah a teltu hempoh ten a cun haw laihin, a taksa haw cu nase zetin thuaknak nei haw hi. Mahti bangin a zuam lih haw cu a thim thei mi paakkual lukhu ngah tukin hi. Mahnaven ohtei taksa in, a thuaknak uh cu a thim thei ngawlmi pak lukhu a ngah nuam uh hangin hi.
26 Mah hangin ka tai ten a tawpnak mun heng suak loli tukin tai ing. Sawhdunnakah a teltu pa in imah ngawlpi a sawh thong ngawl bangin kei hei hi bok ing.
27 Zuamnak munah tel ten un tin, midang ka zop nungten keimah saw vawkmi hi kha tung tih ka lau hangin ka taksa cu thuaknak tuah phano in cingkhawi ing.