8
Milim Biaknak An Thu
1 Milim piakmi tui le an cungcang lai ka kuatmi sungah, kuakua hei in, “Theih tupnak nei hung hi,” tin, a tihmek haw bangin thei ten ngai hung hi. Mahnaven mahtibang theihnakin mihingte pualthautikin itdunnakin mi bawl phaleh hi.
2 Thei bok ing a titu hempoh ten a theih tuk zah uhin thei ma hi.
3 Mahnaven Pathian a deihtu cu Pathian in thei hi.
4 Milim biaknak an eih le eih ngawl thu ah hitin ngaisung ing, milim cu nunnak ngangai nei ma hi, na pa khat ai-in koihmi hi a; Pathian pa khat bek um tih thei hung hi.
5 Van le lei ah hihen, pathian ing tin a tiduntu a um haw hei in, “pathian” tampi le “bawi” tampi a um leng haw hei in,
6 ohtei ca in Pathian pa khat a Pa uh, ihempoh Bawltu umin Amata tukin a nungtute hung hi; mahten Topa pa khat, Jesuh Khrih bek um hi. Ama sung pen ihempoh piang hi. Ama sungah a nungtute hung hi.
7 Mahnaven hi thutak hi mi hempoh ten thei haw ma hi. Mi khenkhat cu milim tuah a diahcihdun leita haw bangin tuni tian milim biaknak an a eih haw ten a eih haw mi cu milimta hi tin um haw laih hi. A ngaihsutnak haw tingsamzet laih a hih hangin mah cik le an ten nintik hi tin ngaisung haw hi.
8 Tui le an ten Pathian tuah a pehdunnak uh phatik cuang tukma hi. A ei uh ngawl vangin a sunnak uh um cuang ma hi. A ei uh vangin a metnak um cuang ma hi.
9 Mahnaven ngalling un: mi suakca na hihnak uh cu upnak lamah a zawngkhalte khi sualnak sungah a bahnak haw tukin suaktik pahsuh un.
10 Tehkipnakin, “Thei leng ing,” a titu noh ten milim biaknak munah an na eih laih uhin, ngaihsutnak tingsapzet ten amu haw tale mahpa cu milim biaknak an eih poi ma tin, a sosuahtu in suak tukma maw?
11 Mahten, “Thei leng ing,” na tih hangin Khrih i nunnak a piak sanmi upnak lamah thanem mi na unau cu lalthongtik tuk hi.
12 Mahten ngaihsutnak tingsamte na siattik uh hangin le Khristian unau tei humah na sual uh hangin Khrih humah sualnak bawl uh ci.
13 Mah a hih hangin, cik le an ka eihmi in ka unaute a sualtik tale ituk mahten ei tukma toh ing, ka u le naute sualnak sungah a cak haw tuk cu phal mang hi.