10
Milim Ngallin Kul Hi
1 U le naute aw, Moses a zuitu a pi le pu tei humah i heng kaw tih cu cing leleng un tih deih ing. Amuhte cu meingo in hupin, a venghawng haw in Tuipi san tan vawk haw hi.Ref 10:1 Suah 13:21-22; 14:22-29;
2 Moses zuitu a hih haw bangin meingo sung le tuipi sungah tuiphum haw hi.
3 A venghawng haw in hawvang an phun khat ei haw.Ref 10:3 Suah 16:35;
4 A venghawng haw in hawvang tui phun khatin haw hi. A lak hawah a tel lelengmi hawvang suangpi pen tui in haw a, mah suangpi cu Khrih hi.
5 Mahtibang hi naven mi tam saw ten Pathian lungdamtik haw ngawl hangin a luang haw cu phillawn ngamkhingah khenkhek khawngin um haw hi.Ref 10:5 Mipum 14:29-30;
6 Hi thu hempoh hi ohtei zohteh tuk mite hi. Amuh bang bokin thilpha ngawlte deihin, a um bok tuk ngawlin ngallinnak piatu hi.Ref 10:6 Mipum 11:4;
7 Mi khenkhat ten milim a biak haw bangin bia bok tuk ngawlin ngallinnak a piatu hi. Lai Thiangtho in, “Mah mihingte cu an eih puai ah an ei tukin a khun haw ten zu le sa tuah lamin, nopsazet haw hi,” ti hi. Ref 10:7 Suah 32:6;
8 Mi khenkhat ten nupa sualnak a bawl haw bangin bawlbok tukma hung hi; mahti bang a bawl haw hangin, ni khat sungah mi thawng sawm nih le thawng thum a thih haw cu! Ref 10:8 Mipum 25:1-18;
9 Mi khenkhat ten Topa thiatha a zoh haw bangin oh ten zoh tukmi kha ma ung, mahti bangin a bawl haw hangin ngul in cikhum khawng hi.Ref 10:9 Mipum 21:5-6;
10 Mi khenkhatte a phuk lih haw bangin ohte cu phu tukma hung hi; mah bangin a phuk haw hangin Thihnak Vancungmi in siatsuah khawng hi.Ref 10:10 Mipum 16:41-49;
11 Hi bangin a hum haw a, na a heng mite hi midang tei zohteh tuk le ngallinnak tukin ngatmi hi. Itahim titale hun tawpnak a hen kuan hun sungah um zo hung hi.
12 Mi pa khatin, kho zetin ding ing hi tin, a ngaisung tale, a lup ngawlnak tukin ngalling cawm hen.
13 Sualloihnak na tawh uhte hi midang tei lakah a heng mekmi sualloihnak hi. Mahnaven Pathian in, a thutiam kimtikin na thuakzawh tuk ngawl uh tianin sualloihnak hengtik tukma hi. Sualloihnak na tawh uhten na thuakzawh theihnak tuk uhin tha ngilnak pia tuk a, na suahcaknak tuk uhin lampi selh sak tuk hi.
14 Mah hangin ka ihmi ka ngualcamte aw, milim biak cu pial un hi.
15 Thu ngaisung thiam na hih uh hangin na lak uhah hi bangin hilh ing. Ka hilhmi hi nangmuhno a deidan na thiam un.
16 Topa i Takeih eihnakin, a man uhmi khuathai ca in Pathian nelah thungenin lungdamnak hilhin, a in uhten hi khuathai cu Khrih i thisan kawmdun hi ma hung maw? Mahten Cangho a eih uhten Khrih i pumpi kawmdun hi ma hung maw?Ref 10:16 Mt 26:26-28; Mk 14:22-24; Lk 22:19-20;
17 Cangho lom khat hangin ohte a venghawng uhin, mi tampi hi nave hungin pumkhat suak hung hi. Itahim titale cangho lom khat kawmdunte hung hi.
18 Israel tei thu khi ngaisung hem un: biakpiaknak a piak haw mi cik a eitu hempoh cu Pathian nel a, biaklandawh a piatu lakah tel bok hi.Ref 10:18 Thiam 7:6;
19 Hi bangin ka tih ten milim hihen, milim an hihen a tih nuammi nei bok tuk tihnak hi maw?
20 Mah kha ma! Ka hilh nuammi cu: umngawltu tei biaklandawh hum a piakmi khi Pathian lakah pia haw ma hi, khawhuai lakah a piak haw mi hi. Mah bangin khawhuai tuah ngualcam na hih tuk uh cu deih mang.Ref 10:20 Daan 32:17;
21 Topa i khuathai le khawhuai khuathai in kop pahsuh un. Topa i cabuai le khawhuai cabuai vang mangkawm pahsuh un.
22 Topa in iksik hen tih deih hung maw? Amah sangin tha nei saw hung tin, ngaisung cop hung maw?Ref 10:22 Daan 32:21;
23 Miten, “Ihempoh bawl thei leng ung,” ti haw hi. Hi zuh hi, bawl thei leng haw; mahnaven ihempoh hi pha khawng ma hi. “Ihempoh bawl thei leng hung,” ti haw hi. Mahnaven ihempoh hi eimu ca bawmtu hi khawng haw ma hi.Ref 10:23 1Kor 6:12;
24 Kuamah in mai nemcuamnak bek ngaihsut tukmi kha ma hi; midang tei nemcuamnak ngaihsut tuk saw hi.
25 Cik zuaknak munah a zuak haw cu i abang eih tuk hi; ka lungnop ma tin, a thu dongkan nuam pahsun.
26 Itahim titale Lai Thiangtho in, “Leihum le a sungum hempoh hi Topa ta,” ti hi.Ref 10:26 Saam 24:1;
27 Pathian a umngawltu ten an eih tukin a sam haw ten, na mai a koih haw mi cu thudong li ngawlin ei in hi.
28 Mahnaven mi pa kha khatin, “Hi an hi khawhuai lak a piakmi hi,” tin a titale mah a titu i ca ngaisungin, ei ngawlin umin hi.
29 Mihing lungmu ka tih ten, nangma lungmu hi ma hi, midang tei lungmu ka tihnak hi.
Mi khenkhat ten, “Mahtin ahi tale itakaw midang tei ngaihsutnakin ka luatnak a noksak lih tuk?
30 Pathian nelah lungdamnak hilhta in an ei vengin, lungdamnak ka hilh nungten an ka eihmi hangin ita miten kei a sonsiat lih haw.”
31 Hi zuh hi; iti bang nate na bawl uh hei in, na eih uhten hei hihen, na in uhten hei hihen, a venghawngin Pathian sunloihnakin bawl un hi.
32 Phano in nung unna, Judah mi le Gentail mitei lakah hihen, Pathian pawlpi tei lakah hei hihen, buainak suaktik pahsuh un.
33 Ka bawl bangin bawl ten bok un. Keima ca nemcuamnak ngaisung ngawlin, mipi nemcuamnak saw ngaisung ing, nunpatnak a ngah theihnak haw tukin mi hempoh tei lungdamnak bawl tuk cu ka zuammi hi.