7
Huaidunnak Thu
1 Atu-in, lai tuah na dot uhmi hilh tung hi. Pano cu zi huai ngawlinnote 7:1 Pano cu zi huai ngawlin tihmi hi “Numei tawngkha ngawlin” tihnak hei hi in, “Nupa sualnak bawl ngawlin” tihnak hi. a um ahin, pha hi.
2 Mahnaven nupa sualnak a tam hangin pano in ama zi bek nei hen, numei hei in ama pasal bek nei hen.
3 Pano in pasal a hihnak a dehvo cu kimtik henna, numei vangin zi a hihnak dehvo cu kimtik bok hen; a pa nih haw in, a kulnak ten hawah lungkimdun tek haw hen hi.
4 Zi in ama taksa pumpi uk ma hi, a pasalin uk hi; mahti bang bokin a pasalin ama taksa pumpi uk ma hi, a zi in uk bok hi. Hun comno sung thungetnak deih ing tin na pa nih uhin, na lungkim uh tih sial ngawl pa khat le pa khat na deihnak uhte eldun pahsuh un.
5 Mahti bangin lungkimnak na neih nung uhten munkhatin umleh un hi. Mahtin ahimata sup zawh ngawlnak hangin Satan sualloihnak sungah cak kha sual tuk uh ci.
6 Hi bangin ka tih ten thukham pia kha mang hi, nangmuh ka ngaihsut hangin ka tihmi hi.
7 Thungai titale na venghawng uhin keimah bangin na um uh ahin deih ing. Mahnaven Pathian lak pen a ngah uhmi laksawng cu dang tek hi. Mi pa khat lakah laksawng dang pia in, a dang pa khat lakah a dang pia bok hi.
8 Mahten zi nei ngawl, pasal nei ngawl le meivong, pavong tei lakah ka hilh nuammi cu: keimah bangin nangmuh bek na um uh ahin, deih ing.
9 Mahnaven na deihnak uh na sup thei uh ma tale zi le pasal nei un, zi le pasal neih cu taksa deihnak tuah um kawko sangin pha saw hi.
10 Zi le pasal a nei tei lakah keima thupiakmi hi ngawlin Topa i thukham pia ing hi; a zi in, a pasal cu zam pahsuh hen.Ref 7:10-11 Mt 5:32; 19:9; Mk 10:11-12; Lk 16:18;
11 A zam tale amahno in meivongin um hen; mah ahimata a pasal tuah lemdunleh haw henna, a pasalin, a zi ma pahsuh hen.
12 Midang tei lakah ( Topa i thupiakmi hi ngawlin keima tihmi) ka hilh nuammi cu: Khristian pa khatin thu umngawltu zi huai in, mah a zi in amah tuah umkawm tuk a nuam leng tale ma pahsuh hen.
13 Khristian numei pa khatin thu umngawltu pasal nei in, mah a pasalin amah tuah umkawm a nuam leng tale zam pahsuh hen.
14 Itahim titale a zi tuah a umkawm haw hangin mah Pathian thei ngawl a pasal cu Pathian nelah santakmi in suak hi; mahti bang leng bokin Khristian pasal tuah a pehzomdun haw hangin Pathian thei ngawl a zi cu Pathian nelah santakmi in suak hi. Mah ahi ma ahin, a cano haw cu thu umngawltu ca in suak khawng haw tuk hi; mahnaven atu-in Pathian santakmi haw hi.
15 Thu umngawl a zi maw, a pasal maw in, Khristian a zi ahimata a pasal cu a khek nuam tale khek hen. Khristian zi maw, pasal maw cu luat hi, kham tuk imah umma hi. Lemno in um tukin Pathian in nohte sam hi.
16 Khristian numei nu, nang ka pasal i nunpan thei hihim tuk mang tin itin kaw na tih theih? Khristian pano pa, nang ka zi nunpan thei hihim tuk mang tin itin kaw na tih theih?
Pathian Samnak Bangin Nung Un
17 Kua hei hihen, Pathian laksawng na ngah uh bangin le nohte a sam laihin, na umdan uh bangin um poh un. Mahti bangin pawlpi dangte vang zilh ing.
18 Pathian samnak cu vunceptan mipa in, a pom tale, a vunceptalhnak meima pawn pai tukin ngaisung nuam pahsuh hen. Pathian samnak cu vunceptan ngawlmi pa in, a pom tale, a vunceptan pahsuh hen.
19 Itahim titale vunceptan le tan ngawl cu thupi ma hi; a thupi saw mi cu Pathian thukham zui khi hi.
20 Kuakua hei in, Pathian samnak na pom uh laihin, na umdan bang uhin um poh un.
21 Pathian in nohte a sam laihin sal hi uh cim maw? Na hi uh vangin poi sa pahsuh un. Mahnaven mi suakca hihnak hunpha na ngah uh ahi tale suakca tukin tum un hi.
22 Itahim titale Topa i sammi sal cu Topa i mi suakca hi. Mahti bang bok lelengin mi suakca sa Khrih i sam mite cu Khrih i sal hi.
23 Man piakin Pathian i lei mite uh ci; mah hangin mihing tei sila in um pahsuh un.
24 U le naute, Pathian in nohte a sam laihin, na umdan uh bang lengin Pathian tuah na pawlkomnak sung uhah um poh un hi.
Huai Laihngawlte le Meivongte
25 Nupi pasal a nei laih ngawlmi tei thu, lai nganin, a dot haw mi cungcangah: Topa i thupiakmi imah nei mang; mahnaven muantakmi Topa i hehpihnak hangin ka ngaihsutnak ka hilhmi hi muantak hi tin ngaisung ing.
26 Haksat hunte ngaihsut ten pano cu a laihngawl a umdan bang lengin a um ahin, pha hi tin ngaisung ing.
27 Zi nei toh cim? Na nei zo tale ma tukin ngaisung pahsun. Zi nei laih ngawlmi hi cim maw? Mah na hi tale zi zei nuam pahsun.
28 Mahnaven zi na nei tale sualnak bawl hi ma ci; khanglai hei in pasal a nei tale sualnak bawl kha ma hi. Mahnaven zi le pasal nei ten nisial a tawh haw mi a bawmngit pen pial ngah haw hen tih ka deihnak hangin hi.
29 U le naute, ka son nuammi cu hi tin hi: hun ngei tuk ngawl toh a hih hangin tu pepanin zi nei ten a nei ngawl bangin nung hen.
30 A kap miten lungsia ngawl bangin um hen; a nui ten lungdam ngawl bangin um hen; thil a lei ten a lei haw mi cu amuta ngawl bangin um haw hen;
31 leihum nate a ngaisungtu ten leihum nate bek buaipih ngawl bangin um haw hen. Itahim titale leihum hi tubang ahi tale ngeiphat tukma toh hi.
32 Lungmu ngaihsut haksatnak pen suakca un tih deih ing. Zi nei ngawl pa in Topa i lungdamnak bek a tuptahmi a hih hangin Topa i nadehnak bek ngaisung hi.
33 Mahnaven zi nei pa in, a zi i lungdamnak tuk a deih hangin leihum nate ngaisung hi;
34 Mahten amah cu mun nih pen doktu nei hi. Pasal nei ngawl numei, ahimata khanglai ten Topa i lakah a taksa le lungmu haw a piak nuam haw hangin a lungmu sung haw tatak tuah Topa i na cu dek haw hi; Mahnaven pasal nei numei in, a pasal a lungdamtik nuam hangin leihum nate ah buai hi.
35 Hi bangin ka tihnak cu nangmu nemcuamnak tuk ka deih hangin hi. A kham nuam thong kha mang hi. A pha mi le a mawimi na bawl tuk uh deih ing, supmi nei ngawlin Topa i nadehnakah na ihempoh uhin pia khawng unna, deih ing.
36 Huaidun tukin a hamsa in, huaidunleh tukma ung a titu tei thu ah hi bangin um haw hen: pano in, a khanglai humah zoh mawi ngawlin um ing tin ngaisungin, a taksa deihnak a cak leita hangin huaidun saw nung tin, a ngaisung tale, a deihnak bangin huaidun haw hen. Sualnak ma poh hi.
37 Mahnaven pano in kuamah i tiklo ngawlin a ngaihsut ciamciam nungten huai tuk ngawlin a lungmu khencatin, a deihnak lungmu phano ukdun thei in, a bawl tukmi le a zui tuk mite phano in, a ngaisung ngah tale, a khanglai cu huai ngawlin a um vangin poi ma hi.
38 Mah hangin zi a huaitu in, na pha bawl hi; mahnaven a huai ngawltu pa in, a pha saw bawl hi.
39 Pasal nei numei cu a pasal a dam laih sung luat ma hi. Mahnaven a pasal a thi tale, a deihmi pasal nei tukin miluat hi; mahnaven Topa i min tuah bekin bawl tukmi hi.
40 Hi thu ah hei in amah nguakcang a um ahin, nop saw deuh tuk tin ngaisung ing. Hitih bang ka tih ten Pathian Hawvang nei bok ing tin ngaisung ing.