6
Khristian Tei Zuakdunnak
1 Noh Khristian tei sungah pa khat le pa khat na hauhdun uhten na thu uh Pathian mihingte sontik ngawlin itin kaw leihum thukhentu mai ah na hawhpih ngam uh?
2 Pathian mihing ten leihum thu cu khenleh haw tuk hi tih thei ma uh cim? Leihum thukhentu na hih tuk uh hangin, nohtei sung pen thu noinangte cu nangmuhno in son thei ma uh cim?
3 Vancung mite hei a thu haw khenleh tuk laih hung tih hi thei ma uh cim? Mah a hih hangin leihum nuncaknak thute hi a son theih uh kul hi.
4 Mahti bang thu a um ten pawlpi sung thu la imah a thei ngawltu tei lakah maw, “Ka thu uh son sak un,” tin na tih tuk uh?
5 Nohtei ca in, itik zahin zahcakhuai him? Nohtei lak pen na thu uh a khen theitu tuk Khristian unau tei thu sonsaktu tukin micip, thu ngaisung thiam, mi pa khatno bek um haw ma maw?
6 Khristian pa khat le pa khat a sualthu sondunin, thu umngawltu tei mai ah thukhen sak tukin hawh tukmi kha ma uh ci.
7 Pa khat le pa khat thu na neih leleng uh hangin mi cangkim ngawl uh ci tih cu langciang hi. Dik ngawl zetin bawlsiatmi na hi uh vangin nohtei ca in pha saw tukma maw? Na thil uhte a lonsak khawng haw hei in, nohtei ca in pha saw tukma maw?
8 Mahti lalam cu hi ngawlin nohte cu nangmuh pa khat le pa khat thu umtu unau ten hi nave uhcin, pa khat le pa khat na thil uhte longdun uh ci.
9 Mipha ngawl ten Pathian Uknak sungah lut thei haw tukma hi tih cu ciangno in thei uh ci. Nangmuh le nangmuh zoldun pahsuh un; nupa sualnak a bawltu, milim biatu, nupa angkhentu, numei le numei sualnak a bawltu, pano le pano sualnak a bawltu,
10 nguca le hampumte, zukham misil le mi sonsia tute cu Pathian Uknak sungah lut thei haw tukma hi.
11 Mi khenkhat cu mahti bang sualnak a bawlte hi uh ci. Mahnaven sualnak pen thianthohtikmi le Pathian nelah apmi hi zo uh ci; Topa Jesuh Khrih le a Pathian uh i Hawvang thawmin Pathian tuah lemduntikmi hi zo uh ci.
Na Taksa Pumpi Uh Cu Pathian Sunloihnak Tuk
12 Mi khenkhat ten, “Ihempoh bawl theih hi,” ti uh ci. Hizuh hi, bawl theih hi; Mahnaven ihempoh hi nohtei ca in pha ma hi. Kei hei in, “Ihempoh bawl thiang hi,” ti bok tung hi; Mahnaven mahti bang ngamtatnak thong i sila in piadun nuam mang hi.Ref 6:12 1Kor 10:23;
13 Mi khenkhat ten, “an cu pumpi ca hi a, pumpi cu an ca hi,” ti uh ci; manzet hi. Mahnaven a pa nih haw in Pathian in botik tuk hi. A taksa pumpi uh hi nupa sualnakah man tuk hi ma hi; Topa i nadehnak tuk saw mi hi. Topa in taksa cu cawm tuk hi.
14 Pathian in, a Topa uh cu thihnak pen tholehtik zo a hih hangin ohte vang a cahnak huham tuah thotik bok tuk hi.
15 Na taksa pumpi uh hi Khrih i pumpi sungah tel bok tih hi thei ma uh cim? Khrih i pumpi sung a, telmi pa khat cu la in, numei pha ngawl sungtelin bawl tuk hung maw? Bawl tukma hung hi.
16 Ahimata mi pa khatin numei pha ngawl nu i lakah a taksa a khop ten mah nu tuah taksa pumkhat suak haw tih thei ma uh cim? Lai Thiangtho in, “A pa nih haw in taksa pumkhatin suak haw tuk hi,” tin ciangno in hilh hi.Ref 6:16 Pian 2:24;
17 Mahnaven Topa tuah a pehdunmi cu hawvang lamah Topa tuah pumkhat hi haw hi.
18 Nupa sualnak cu bawl ngawlin pial un. Sualnak dang ten mihing taksa siatsuah lawlawm ma hi; mahnaven nupa sualnak a bawltu cu ama taksa hum hihimah sualnak bawl hi.
19 Na taksa pumpi uh cu Pathian i piakmi le na sung uh a nungmi Hawvang Thiangtho i biakinn a hihlam thei ma uh cim? Nohte cu nangmuta hi ma uh ci, Pathian ta uh ci.Ref 6:19 1Kor 3:16; 2Kor 6:16;
20 Aman piakin lei mite uh ci. Mah hangin na taksa uh Pathian sunloihnak tukin mang un hi.