5
Pawlpi Sung Sualnak
1 Nohtei lakah nupa sualnak um hi, mah sualnak cu umngawltute hei in zahcakhuai a tih haw mi sualnak hi tih cu thei ing. Mi pa khat pa cu a pa i zi nungdawl saw sualpih tin hilh haw hi.Ref 5:1 Daan 22:30;
2 Pualthau ngam talaih si uh ci. Lungsia in um saw tukmi ve uhcin hi. Mahtibang mihing cu na pawl sung uh pen na suah tuk uhmi si.
3 Ka taksa pumpi cu ngam khawlapi ah um naveng ka lungmu cu nangmu lakah um hi. Mahtibang sualnak a bawltu tei humah a Topa uh Jesuh minin noh tei lakah a um bangin thu khen zo ing.
4 Munkhatah na khopkhawm uhten a lak uh a um Topa Jesuh i huham tuah nohtei lakah ka hawvangin umpih bok ing.
5 Hi pa cu Topa i Ni a hen ten a hawvang nunpatnak a ngah theihnak tukin a taksa pumpi cu Satan lakah siatsuah tukin pia un.
6 Mi tuangkhawng na hih uh hi pha hihim ma hi. Tehkipnakah, “Naman demno in, cangho lom venghawng thotik hi,” tih thei awng si uh ci.Ref 5:6 Gal 5:9;
7 A thiangthomi hi tukin nohtei lakah a ummi naman lun sualnak cu vawk khawng un hi. Naman tel ngawlin em thakmi cangho lomin suak tuk uh ci, nohte cu naman hel ngawl cangho lom na hih uh lam thei ing. Ohtei Kaltan Puai tuuno Khrih cu biakpiaknakah piak a hih zo hangin a Kaltan Puai uh vang pan zo hi.Ref 5:7 Suah 12:5;
8 Mah hangin a Kaltan Puai uh cu naman lun sualnak le phat ngawlnak tuah a cokhelmi cangho lom tuah hi ngawlin naman hel ngawl thianthohnak le thutak cangho lom tuah bawl nung hi.Ref 5:8 Suah 13:7; Daan 16:3;
9 Nohtei lakah ka ngatmi lai sungah, nupa sualnak bawltu mi suaksualte tuah kopdun pahsuh un, tin hilh ing.
10 Mahti bangin ka hilh ten leihummi, mi suaksualte, mi hampumte, ngucate le milim biatute cu phial pahsuh un ka tihnak kha ma hi. Amuhte tuah phialdun tukma a ti uh tale hi leihum hi na zamsan uh kul tuk hi.
11 Ka hilh nuammi cu, Khristian ing ti sih a, nupa sualnak a bawltute, hampumte, milim biatute, mi sonsia nuamte, zukham misilte le ngucate ka tihnak hi. Mahtibang mi suaksualte tuah an ei tukin a khung hei khungkhawm pahsuh un hi.
12 Thungai ti ahin, a pualam mihingte thukhen tuk cu ka nadeh hi ma hi. A pualam mite cu Pathian in, a thu haw khen tuk hi.
13 Mahnaven nohtei lak a ummite cu a thu haw khen sak tuk si uh ci. Lai Thiangtho in, “Na pawl sung uh pen mi suaksualte cu suah un,” ti hi.Ref 5:13 Suah 13:5; Daan 17:7;