11
1 Khrih nunzia ka zui bangin nohte vang ka nunzia zilbok un hi.Ref 11:1 1Kor 4:16; Fil 3:17;
Pathian Biak Ten Lukhuh Tuk Thu
2 Nohte ka zilhmi thuzilhnakte cing lelengin keimah vang na phawhngilh uh ngawl hangin pakzet ing.
3 Mahnaven na theih tuk uh ka deihmi cu mi hempoh i lu cu Khrih hi. Zi i lu cu a pasal hi a, Khrih i lu cu Pathian hi, tihmi hi.
4 Mah hangin mipi mai ah thungenin, ahimata profet bangin thu a phuan ten a lu a khuhtu pa cu Khrih mualphotiktu hi.
5 Mahten mipi mai ah lukhuh ngawlin thungenin thu a phuangtu numei cu a pasal mualphotiktu hi bok hi. Mahtibang numei cu a lukolh mi numei tuah dangdun haw ma hi.
6 Numei ten a lu a khuh haw ma tale sammet vanglak haw hen. Numei ca in lukolh le sam tan khawng cu zahcakhuai a hih hangin a lukhuh saw hen.
7 Pano cu a lu khuh kulma hi, itahim titale Pathian i lim le sunlawinak langtiktu hi. Mahnaven numei cu pano sunloihnak langtiktu hi.Ref 11:7 Pian 1:26-27;
8 Itahim titale pano cu numei sung pen bawlmi kha ma hi, numei saw hi pano sung pen bawlmi hi.Ref 11:8-9 Pian 2:18-23;
9 Pano cu numei ca tukin bawlmi kha ma hi, numei saw hi pano ca tukin bawlmi hi.
10 Vancung mite hangin numei in, a lukhuh hen, mahten a pasal i huham nuai ah um hi tih cu langtik tuk hi.
11 Mahnaven Topa i sungah a nunnak uhin, numei cu amah bek um tuk kha ma hi; pano vang a dangno in um tukmi kha cuang ma hi.
12 Itahim titale numei cu pano sung pen bawlmi a hih bangin pano vang numei sung pen tulmi hi bok hi. Ihempoh cu Pathian lak pen a piangmi ngeh haw hi.
13 Mipi mai ah lukhuh ngawltu numei in, Pathian nelah thu a nget cu mawi ti uh cim?
14 Nangmuhno ngaisung hem un! Leihum na umdan uhah pano in, samsau khawih cu zahcakhuai hi tih lang hi.
15 Mahnaven numei i samsau cu a sunloihnakbel hi. A samsau cu a lukhuhnak tukin tihmi hi.
16 Mahnaven mi pa khatin, a el nuam tale kam khat bek hilh tung; eimu lakah hihen, Pathian i pawlpi tei lakah hihen biak tuk thu lamdang um cuang ma hi.
Topa i Takeih
(Mt 26:26-29; Mk 14:22-25; Lk 22:14-20)
17 Hiti bangin ka hilh ten, nangmuhte ka pah theih ngawlnak pa khat um hi: itahim titale khawmnak mun a, na tawhdun uh huncan hi, a phami hi ngawlin a pha ngawlmi hi saw hi.
18 Pa khatnakah na khawm uhten hon khat le hon khat lemdun ngawlin um haw hi tin miten hilh haw hi. Hi thu hi thuman hi tuk tin um ing.
19 (Thudik theih theihnak tukin a manmi le a man ngawlmi a dadang a um cu a nemcuamnak um bok hi.)
20 Mahnaven munkhatah na khopkhawm uhten na in le na eih uhmi cu Topa i takeih hi lehma toh hi.
21 Itahim titale mahti bangin nangmuh tek an na eih uhten mi khenkhatte cu ngilkialin um haw naven, mi khenkhatte cu na in le eih uh tam leita a ngui tianin ngui uh ci.
22 In le eihnak tuk nangmu bulin nei ma uh cim? Mahma tale Pathian pawlpi zawnsakin le mi ca-ngahte mualpho in, a um haw tuk khi deih saw uh cim? Hiti bang thu ah itin ti tukin um kam uh ci? Nohte cu pak tung maw? Paak lalam tuk mang hi.
23 Itahim titale nohte ka zilh sa lawnmi thuzilhnak hi Topa i lak pen ka ngahmi hi. Topa Jesuh in, a zuak tuk haw zanin cangho cu la in,
24 Pathian nelah lungdam thu a hilh ceng ten bot themin, “Hihi ka taksa hi, nangmu ca tukin hi. Keimah na phawk lelengnak tuk uhin bawl un,” ti hi.
25 Mahti bang bok lengin, takeih a eih celh haw ten khuat cu la in, “Hi khuat hi ka thisan tuah khohtikmi Pathian thukham thak hi. Na in sial uhten keimah na phawh lelengnak tukin bawl un,” ti hi.Ref 11:25 Suah 24:6-8; Jer 31:31-34;
26 A tihnuammi cu hi cangho na eih sial uh le hi khuat na in sial uhten Topa a kihleh laklawh a thihnak thu phuang uh ci tihnak hi.
27 Mahtibang a hih hangin kuakua hei in, Topa i minsiatnak tuk zoh mawi ngawlin Topa i cangho ei in, a khuat a intu cu Topa i taksaleh thisan humah sualnak bawl hi.
28 Mah hangin kua hei in, hi cangho a eih laih ngawl le hi khuat a in laih ngawlin amah le mah cekdun masa hen hi.
29 Itahim titale hi cangho a eih le hi khuat a in ten Topa i pumpi sullam a thei ma tale a in, a eih ten thukhennak a humah piadunin suak hi.
30 Hi bang na hih uh hangin nohtei lakah mi tampi ten natnak, nawmtamnak le thihnak tianin tawk uh ci.
31 Masabelin eimuh le eimuh a cekdun ciang uh tale Pathian thukhennak a hum uhah heng tukma hi.
32 Mahnaven Pathian thukhennak a hum uhah hengin, amah in, a cawh ngangai tale hi leihum tuah siacih vawk tuk ngawlin a pat nuam hang hi.
33 Mah hangin, u le naute aw, Topa i takeih mang ten tukin na khopkhawm uhten pa khat le pa khat ngakdun un hi.
34 Mahti bangin na khawpdun uhten Pathian thukhennak tawkkha tuk ngawlin ngilkial na um uh hei in, inn pen an ei masa ta un hi. Thu dangte cu ka hen ten ngaisung tenleh tuk hung hi.