12
Hawvang Laksawng
1 U le naute aw, Hawvang Thiangtho i piakmi laksawng thu ah na laikuat uhmi humah ka theihtik nuammi um hi. Thutak na theihnak tuk uhin deih ing.
2 Umngawltu na hih uh laihin lampial in nunnak nei ngawl milimte bia uh ci.
3 Mahnaven Pathian Hawvang i lampui miten, “Jesuh cu tamsiat hi tahen,” tin ti thei tukma hi. Hawvang Thiangtho lampui mite bekin, “Jesuh cu Topa hi,” tin ti thei haw tuk hi.
4 Hawvang laksawng a phunkim um hi, mahnaven mah laksawngte hempoh a piatu cu hawvang amah bek hi.Ref 12:4-11 Rom 12:6-8;
5 Topa i nadeh a tuatuam um hi, mahnaven a na a deh uhmi Topa cu amah pa khat bek hi.
6 Nadeh theihnak a tuatuam um hi, mahnaven mah nadeh theihnak cu a kuakua lakah hei hihen amuh le zawntekin, a piatu cu Pathian amah leleng hi.
7 Eimu sung a, Hawvang a um lam phun kha khatin lang a, mahmi cu mi zapi tei nemcuamnak tukin hi.
8 Hawvangin mi pa khat cu cihnak le thuhilh thiamnak tuah pia in, a dang pa khat cu thuthuk phuan thiamnak pia hi.
9 Mah Hawvang lelengin, mi pa khat cu upnak pia in, midang pa khat cu tina damtik theihnak pia hi.
10 Hawvangin mi pa khat lakah thasiahhuai nalamdang bawl theihnak pia in, a dang pa khat lakah Pathian thu hilhthiamnak pia hi; a dang pa khat lakah Hawvang Thiangtho lak pen a hungmi hi maw hi ma him tih khenkhuai thiamnak pia hi. Mahti bang lelengin mi pa khat lakah awn dang tuah ot theihnak pia in, midang pa khat lakah mahtibang a awn haw mi hilhcian theihnak pia hi.
11 Hite hempoh a piatu cu Hawvang pa khat bek hi; Ama deih bangin laksawng dadang cu bulpak lakah pia tek hi.
Pumpi Pa khat Taksa Khen Tampi
12 Khrih cu taksa pumpi bang hi. Taksa pum cu pa khat hi, mahnaven khen tampi um hi.Ref 12:12 Rom 12:4-5;
13 Mah bangin ohte vang Judah mi le Gentail mi tin le suakca le sal tin a um uh vangin a venghawng uhin mah pumpi pa khat sungah Hawvang pa khat i nipmi hung hi. A venghawng uhin mah Hawvang pa khat cu in tukin piak hi zo hi.
14 Pumpi hi taksa khen pa khat bek kha ma, khen tampi um hi.
15 Ke in, “Kei cu khut ka hih ngawl hangin taksa khen sungah tel mang,” a ti bang ahin, mahti bangin a tih hangin taksa khen hi kha ngawl ngangai ni maw?
16 Mahten bengin, “Kei cu mit ka hih ngawl hangin taksa khen hi mang,” a ti ahin mahtin a tih hangin taksa khen hi ngawlin um ngangai ni maw?
17 Pumpi hi mit ahi khawng bang ahin itin kaw thu a theihtheih tuk? Mahten beng ahi khawng bang ahin itin kaw ngim a nap theih tuk?
18 Mahnaven tu a na umdan uh bangin Pathian in taksa khen dangte cu a umnak haw tuk mun tenah ama deih bangin koih hi.
19 Pumpi hi taksa khen pa khat bek ahi bang ahin pumpi hi tukma hi.
20 Mahnaven tu a umdan bang ahi tale taksa khen tampi um naven pumpi cu pa khat bek hi.
21 Mah bangin mitin, “Nang kul mang,” tin khut lakah ti thei tukma hi. Mahten lu in ke cu, “Nang kul mang,” tin ti thei bok tukma hi.
22 Thu ngangai ti ahin a pumpi uh a taksa khen a nawmtambelno hei a umma ahin cangthei hihim tukma hi.
23 Thupi sapma a tih uhmi taksa khente cu ngalling deuhin tuamlawm hung, a mawi nial ngawlmi taksa khen cu pha deuhin thuam hung hi.
24 A taksa hum uhah zoh a mawi deuhmi cu thuam lih kulma hi. Pathian in, a taksa uh bawlin maizahnak a kulmi taksa khen cu maizah a ngah cuangnak tukin bawl zo hi.
25 Mahten pumpi humah khenkheknak imah umma hi. Taksa khen pa khat le pa khat humah midang ca ngaihsak dunnak nei saw haw hi.
26 Taksa khen pa khatin, a thuak tale, taksa khen dangte vangin thuakpih bok hi. Taksa khenkhat sunloihnak a ngah tale, a dangte vangin lungdampih bok haw hi.
27 Na venghawng uhin Khrih i pumpi hi uh ci. Mahten bulpak tekin, taksa khen hi ten uh ci.
28 Mah hangin Pathian in pawlpi sungah mihingte cu eimu hihnak zawn tenah koih hi. Masabelin tiikmi koih hi. A pa nihnakah profet, a pa thumnakah zilhtute, mahten thasiahhuai nalamdang bawltute, mahten damtik theihnak a piakmite, ahimata midang bop theihnak a piakmite, ahimata mipui thiamnak a piakmite, ahimata theih ngawl awn ot theihnak a piakmite haw hi.Ref 12:28 Efe 4:11;
29 A venghawng haw in tiikmi hi khawng haw ma hi, profet hei hi khawng haw ma, zilhtu vang hi khawng haw ma hi. Na lamdang bawltu vang hi khawng haw ma hi.
30 Natnak damtiktu vang hi khawng haw ma hi, theih ngawl awn a awn thei vang hi khawng haw ma hi. Awn phundang awnlet thiamtu hei hi khawng haw ma hi.
31 Mahtibang a hih hangin a thupi deuhmi laksawng tumtah tukmi saw na hi.
Mahten hite sangin a thupibel hilh hih tung hi.