22
1 Paul in, “Nu le pa, u le naute, nangmu mai ah ka sihsannak thu ka hilh bokmi hi ngaibok un!” tin ti hi.
2 Hebru awnin, a ot hangin mipi cu dai diudeu haw hi. Paul in peh lehin:
3 “Keimah cu Judah mi ing hi. Silisia ngam Tarsas pen piangmi ing. Mahnaven Jerusalem khua pen khangto in, Gamaliel i khutnuai tawngta pa khat ing hi. A pu le pa tei daan thu vang komzetno in zilhmi ing. Tuni hilai ah a hungmi nangmuh bangbokin Pathian nelah pum a piatu bok ing hi.Ref 22:3 Nung 5:34-39;
4 Topa i Lampi le a thu zuitute cu bawlsia in, that ing. Numei, pano tih um ngawl man khawngin thawngah khia ing.Ref 22:4-5 Nung 8:3; 26:9-11;
5 Thiampi Sang le khonsil upa ten thutak ka hilh cu za bok haw hi. Mah upa tei lak pen Damaskas khua a, Judah unaupih tei lakah piak tuk lai cawi ing. Topa i lampi a zuitute man tukin le taicin tuah khihin Jerusalem khua ah hawhpih tuk le bawlsia tukin Damaskas khua ah hawh ing.
Paul i Lungtheknak
(Nung 9:1-19; 26:12-18)
6 “Damaskas khua ka hen kuanno ah sunlaih takin, van pen a de zetmi vaknakin ka elkim cu det hi.
7 Lei ah lum ing a, aw pa khatin, “Saul, Saul! Itakaw keimah na bawlsiat lih? a tih khi za ing.
8 ‘Akua nge cim, Topa?’ tin dong ing. Amah in, ‘Na bawlsiat lihmi Nazareth mi Jesuh ing,’ ti hi.
9 Ka lakah a um boktu ten vaknak cu mu bok haw naven ka lakah a otmi cu za haw ma hi.
10 ‘Ikaw ka bawl tuk Topa?’ tin dong ing. Topa in, ‘Tho in, Damaskas khua ah hawh inna, na bawl tukmi, Topa i tuptahsa mi hempoh khi hilh haw tuk hi,’ tin ti hi.
11 Vak leita in khua ka muh theih ngawl hangin ngualcam ten ka khut pen kai-in Damaskas khua ah hawhpih haw hi.
12 Mah khuapi ah Ananias a tih haw mi pa Judah mi hempoh ten a upatzet mipa um hi.
13 Ananias cu ka elah dingin, ‘Unau pa Saul, khua mu lehin hi,’ tin ti hi. Mah a tih bek ten khua mu lehin, amah cu zo ing.
14 Amah in, ‘A pu le pa tei Pathian in ama deihnak a theitu tukin le a dikcangmi Salpa tukin le ama aw loli zatu tukin teng zo hi.
15 Mah hangin na muhmi le na theihmi hempoh hi tei lakah a hilhtu tukin ama thu theihpihtu hi tuk ci.
16 Mahti bang a hih hangin ngeipi ngak pahsun! Tho in, tuiphum inna ama lak a, na thungetnak hangin na sualnak cu thiantik hi tuk ci,’ tin ti hi.
Gentail Ah Thuhilh Tukin Sammi
17 “Mah nungten Jerusalem ah kikleh ing a, Biakinn sungah ka thunget laihin muhnak nei ing.
18 Mah ka muhnakah Topa cu mu ing ama ka lakah, ‘Tho inna, manlang zetin Jerusalem pen tulin hi, itahim titale hi khua miten ka thu na phuanmi hi pom haw tukma hi,’ tin ti hi.
19 Keimah in, ‘ Topa, pumkhawm innah hawhin, nangmah a thu umtute manin ka vah lih mek khi a theih khawng sate haw hi.
20 Mahten na thu theihpihtu Stefen a thah haw ten keimah loli umbokin, a thah haw vang ka lungkimpih i humah a thattu tei puan cawisaktu ing hi,’ tin ti hi.Ref 22:20 Nung 7:58;
21 Topa in, ‘Hawhta poh inna, Gentail mitei umnak ngam khua ah tiik tung hi,’ tin ti hi.”
22 Mahtin a hilh tian cu mipi ten phano in ngai haw hi. Mahnaven mahnung ten a aw neihtawp haw tuah “Hi pa cu lalthong tahen! That un! Nung takma hi,” tin au haw hi.
23 A venghawng haw au le kio in, a puan hawte zapin le leivui khi vanah thehto haw hi.
24 Rom ngalbawipa in, a ngalkapte cu Paul hi ngal kulhtian innah hawhpih unna, mipi ten hiti bang lawlawm hua in, auhsan li haw him tih theihnak tukin vat un, tin thupia hi.
25 Mahnaven vat tukin a keen celh haw ten mahlai munah a dingmi bawi pa khat i lakah, “Rom mihing pa khat, a sualnak cu ihim tih sonciang laih ngawlin na vat uh cu daan a maw?” tin dong hi.
26 Mah thu cu ngalbawipa in, a zak ten ngalbawi upa lakah hawhin, “Ikaw na bawl? Hi pa khi Rom mihing si!” ti hi.
27 Mah hangin Paul i lakah hawhin, “Rom mi cim? Hilhin hi,” tin ngalbawi pa in dong hi. “Hi zuh ing hi,” tin Paul in don hi.
28 Ngalbawi pa in, “Keimah vang tangka tampi ka piak nungten mah bok ing,” ti hi. Paul in, “Kei cu ka suahkehnak pen Rom mi toh ing hi,” tin don hi.
29 Mahbek ten Paul thudong tukin a tumtute cu nungkikleh khawng haw hi. Ngalbawi pa vangin Paul cu Rom mi hi tih a theih i humah Rom mi thik taicinin, a khih khi a theihleh ten lauleh mahtak hi.
Khonsil Mai Ah Paul Henpih
30 Ngalbawipa in, Paul i humah Judah ten sual a notmi haw hi i bel nantim tih theiciang nuamin, a zingten Paul i thik taicin cu duktik hi. Thiampi upate le khonsil upate cu tawkdun khawm tukin thupia hi. Mahten Paul cu pui in, a mai hawah dingtik hi.